إستشارة طبية

2023-02-01 17:14:11 18 نصيحه لما بعد العمليه القيصرية بأول اسبوع إلى اسبوعين
١. حاولي تسيطرين على السعال اما بالعلاج او شرب السوائل الدافيه
٢. مثلها حاولي تقللين من العطاس و تجنبي الأشياء اللي تحفزه
٣. الضحك حلو و خوش طريقه لازاله الالم بس لا تضحكين بشده مجرد ابتسمي
٤. خلي المخده او مسند من القماش تكون صديقتك بكل حركه خليها دائما على جرحك و اكيد مفيده بالطسات من تطلعين من المستشفى
٥. أبدا لا تاكلين شي يسوي غازات
٦. و أبدا لا تاكلين شي يسوي عندك امساك
٧. أبدا لا تضوجين و لا تفكرين بعلامات العمليه القيصرية
٨. حاولي قدر الإمكان ما تستخدمين الدرج استخدمي المصعد
٩. من يصير عندك الم شديد أبدا لا تبجين بعنف ممكن البجي يزيد الالم أكثر من الجرح نفسه
١٠. أبدا لا تدنجين و بقوه و تشوفين بطنك اللي ممكن يزيد ضغط البطن
١١. و لا تفكرين و لا تخطر ببالك تشوفين الجرح
١٢. اذا ردتي تشوفين انه الجرح شفى او لا اسألي زوجك او طبيبتك
١٣. لا تستعجلين انه ترجعين للحياه الطبيعيه
راح ترجعين شويه شويه
١٤. لا تفكرين أبدا بالخدر و التنمل اللي يصير بمكان العمليه هذا شي طبيعي
١٥. لا تخجلي ان تطلبي المساعده من الأشخاص اللي بجانبك
١٦. لا تنسين أبدا المسكنات اللي كتبتها الك طبيبتك و العلاج اللي تاخذيه
١٧. لا تضوجين نفسك انه ما جبتي طبيعي
١٨. لا تقللين من شانك انه ما جبتي طبيعي لانه بالمحصله انت ولدتي طفلك كهديه لتعب ٩ اشهر


د. سيف سمير البياتي اخصائي طب الاطفال باز کردن / نظر دهید

2023-01-30 13:00:23 ابني ما يحجي
و نادرا ما يكون بنتي ما تحجي
او تاخر بالكلام
تاخر الكلام من الاشياء المقلقه للام و الاب و حتى الطبيب
السؤال الشائع هو ابني عمره سنتين او ٣ سنوات و ما يكول بس ماما و بابا و احيانا يكولهن بدون قصد و لا على التعيين
هل ابني فعلا متاخر في الكلام او لا ؟
الاجابة اي نعم متاخر طبعا
بس اريد تجاوبيني
لما تصيحيه يجاوبك ؟
هل ينفذ اوامرك ؟
لما تصيحيه يجاوبك ؟
لما يريد شغله ياخذ ايدك و يكولك اريد فلان شي و فلان شي ؟
عالكتله التلفزيون ٢٤ / ٢٤ ساعة ؟
اكو مشاكل بالولادة او بعدها؟
اكو تاخر ببقية الفعاليات مثل الجلوس او الوقوف او المشي ؟
ممكن هذا ينطينا فكرة عن سلوكيات الطفل النفسية و العصبية
صدك التلفزيون ياثر على الكلام؟
طبعا
عندي بوست طويل عريض عن هذا الموضوع و مؤكد بالبحوث النفسيه على مئات الاطفال
ملخصها انه تخلين طفلك مستلم فقط
يسمع اللي يكوله اله هذا الجهاز و بدون رد
بعد عليمن يحجي!!!
ماكو تلفزيون او شاشه تحت ١٨ شهر
انسوا
لا من ياكل و لا من يشرب و لا لاي حجه
راح يكولن مو كبرتوا و ما صار شي كالعادة
اي صح كبروا و ما صار شي
بس هل قبل مثل هسه دا تسمعون مشاكل نفسية عند الاطفال ؟
الجواب لا طبعا
لذلك بلا تلفزيون و بلا تلفون و لا ايباد تحت ١٨ شهر
نجي لعمر بعد ١٨ شهر
هذوله نكعد وياهم و نكوللهم شدا يصير و نسولف عن شنو دا يسولف التلفزيون
زائد نختارلهم محتوى تعليمي عالي
عدهم يكولون برنامج افتح يا سمسم النسخه الامريكيه
اللي هو يشبه جدا افتح يا سمسم العربي
هسه تاكدنا ان الطفل طبيعي و مجرد متاخر بالكلام
شنو اسوي؟
١. سجليه حضانة او روضه حتى لو عمره سنتين ليش لا
٢. استغلي كل مكان للكلام مع الطفل
٣. الطفل يتعلم من ابوه اكثر مما يتعلم من امه ابدي طلعات و استغل الطلعات بالكلام
٤. مع السلامه تلفزيون و موبايل و ايباد
٥. اوصفي كل شيء
هذه الطماطه حمرة
هذا القلم اسود
هذا البيت كبير
هذه السيارة اكبر
٦. لا تجاوبين من ياشر
كوليله اي ابني شتريد ؟
لح كلش كولي مدا افهم
لا تستجيبن للغة الاشارة او اخري الاستجابة
٧. اطلبي منه هوايه
افتح الباب
جيب المفتاح
اكعد
اوكف
اصعد
انزل
٨. غني
يحبون اللحن
غني الكلمات بلحن
٩. طلعه الشارع اكبر مجال تعليمي
هذا رجال
هذه سيارة
هذة شجرة
١٠. اختاري العاب محفزه للعقل مو العاب بس صوره او بس صوت و بدون اي محتوى تعليمي للطفل
المكعبات مثلا او الحزورات مثال اخر
١١. الدفاتر المصورة رائعه و هي عبارة عن دفاتر بيها صور حيوانات و اشجار و ارقام


د. سيف سمير البياتي
أخصائي طب الاطفال باز کردن / نظر دهید

2023-01-25 01:34:39 ترتيب طعام الطفل شهر بشهر
خطوة بخطوة
عندي بوستات طويله عريضه عن طعام الاطفال و شون نبدي بوجبه رقم 1
خلونا نبدي بوجبه رقم 2 و نستمر
الشهر الرابع
الوجبه رقم 1 كانت الرز و وقت الغداء
بعدها نبدي وجبه رقم 2 مثل بيوريه الجزر او بيوريه الفاصوليا الخضراء او بيوريه البطاطا
اريدكم تعرفون انه الوجبات تنطي على مدى 3 ايام
و ننطي وجبه وحده باليوم الى وجبتين فقط حتى نعرف نن شنو تحسس الطفل
الشهر الخامس :
بالشهر الخامس نبدي نضيف خلطات من الاطعمه اللي جربناها بالشهر الرابع
مثل رز و جزر
او رز و بطاطا
قطعه دجاج صغيره مع الرز
قطعه لحم صغيره خاليه من الدهون مع الرز
شوفان و تمر
شوفان و موز
الخ الخ الخ الخ
و هم وجبه الى ٢ يوميا
الشهر السادس
اذا ما دخل اللحم بالشهر الخامس
هاهيه بلشي ادخال اللحم
و الجدول بسيط دجاج ثم لحم
اللحم سهل جدا يتحول الى بيوريه باستخدام الخلاط
عادي تكدرين تسوين البيوريه و تجمديه و تخليه ويه اكل الطفل العادي
و اذا عندك وقت فحضري يوميا و هو الافضل
الوجبات هنا وجبتين لازم و ممكن ايام ٣ وجبات
و لا ننسى الفاكهه كطعام بين الوجبات
الحليب يتراجع و يقل بعد الشهر السادس
الشهر السادس ممكن ادخال اللبن بيه
و باللبن نكدر نضيف الفواكهه كطعم
البيض ممكن الان بس لا ننسى انه لابد للبيض يطبخ لفتره ٥ دقائق و اكثر
الشهر السابع :
الشهر السابع ادمجي طعام الاصابع مع الشوربات و البيوريهات اللي تسويهن
انطي لطفلك معكرونه مسلوقه و راقبي
او قطعه بطاطا او بروكلي او اصبع تفاح
ابدي سمكي قوام البيوريهات و الشوربات الان
الاكل تدريب و اذا ما سمكتي القوام اشوفك بعمر السنتين تخلطين طعام طفلك !
مثال على وجبات يوم واحد للطفل بعمر ٧ اشهر
الفطور بيض
الغداء شوربه رز و لحم
العشاء مخلوط فواكه مع لبن
الشهر الثامن
كثري طعام الاصابع
الاطفال اللي يستكشفون الطعام بايديهم هم الاكثر تقبلا للطعام بالمستقبل
لذلك اتركي طفلك يستكشف
كلشي ممكن يكون طعام اصابع
حتى البيتزا
و الدجاج و كل شيء
اذا ما علمتي الطفل على الكوب بعمر ٦ اشهر الان ابدي علميه و انطي بيه الماء
الجبن و السمك ممكن ادخاله الان و لو افضل السمك بعد السنه بس لا باس اذا بعد الشهر الثامن
الشهر التاسع
المفروض بهذا الشهر الابهام يبدي يشتغل لذلك كلشي و حرفيا كلشي راح يروح للفم سواء عجبك او ما عجبك الموضوع
فلذلك نستفاد من هذه الحاله و ننطيه طعام مقسم الى مكعبات
الجبن ممكن يعطى الان بيد الطفل
المميات او الرضاعه الطبيعيه تقريبا بكد عدد الوجبات ٣ الى ٤ مرات
الشهر العاشر
البطله تفطم من المميه و تنطي الحليب بالكوب
نفس المقدار السابق
بس لا باس اذا استمريتي للسنه
بس اكثر من ام فطمت من المميه بعمر ال ١٠ اشهر و اطفالهم ما شاء الله
عاشت ايدك
الاكل ما يفرق كثير عن الشهر اللي قبله
بس شويه من اكل البيت ممكن الان باعتبار انه اقتربنا من عمر السنه
اللي نشجع الطفل بيه ياكل اكل بيت عادي
الشهر 11
خلصت المهمه تقريبا و هسه ممكن جدا يكون فطوره كورن فلكس و نضيف اله حليب من رقم ٢
يعني كلش بدا الطفل ياكل اكل الكبار
١٢ شهر و اكثر
ياكل اكل بيت
ملاحظات اخيره
1. عمر ٤ اشهر يعني اكبر من ١٢٠ يوم
عمر ٦ اشهر يعني اكبر من ١٨٠ يوم
عمر ١٠ اشهر يعني اكبر من ٣٠٠ يوم
2. اللعب مع الطعام ضروري و ضروري جدا
3. نحترم شهيه الطفل ما عجبه ما نجبره
4. خلي ببالك كلما تنطين اكل اكثر باول سنه كلما طفلك يكون اكثر تقبلا للطعام فيما بعد
5. الممنوع تحت عمر سنه
العصير و العسل و السكر و الملح و اي طعام ممكن يشكل خطر اختناق
د. سيف سمير البياتي اخصائي طب الاطفال باز کردن / نظر دهید

2023-01-24 11:34:17 شنو رايكم نسوي جدول للطفل حديث الولاده اسبوع بأسبوع
و نمشي ببطء و نحاول ننظم نوم و حياه الطفل ؟
نبدي بالأسبوع الاول
بأول اسبوع من العادي ان ينام الطفل ١٦ إلى ١٨ ساعه يوميا
و يقضي اول اسبوع بين رضاعه و نوم فقط
نتعلم اولا كيف نعرف ان الطفل جوعان و نتدخل
و أثناء الرضاعه نحاول نخليه كاعد مثل لمس خدوده او كم ضربه صغيره على القدم او التربيت على الظهر أو فك الكماط
نسوي جدول صغير
8:00 صباحا نكعد الطفل و نرضعه و نغيرله
8:45 صباحا يلا اتركيه ينام
10:15 نرضعه و نلعب وياه و نربت على ظهره
11:00 وقت النوم
12:30 نكعده من النوم و نلعب وياه اذا محتاج نرضعه يرضع
1:15 وقت النوم
2:45 نصحيه ننطيه الرضاعه و نلعب وياه
3:45 قيلوله قصيره
5:15 نصحيه و ننطيه الرضاعه و نغير ملابسه
6:00 قيلوله أخرى
7:00نصحيه ننطيه الرضاعه
8:35 اخر قيلوله
9:15 نصحيه و نغير ملابسه للنوم
10:00 نغلق الاضويه
و ننطي الرضاعه فقط عند الحاجه و نصحيه فقط الا اذا نام اكثر من ٤ ساعات
ملاحظات الاسبوع الاول
اعرف جيدا ان اغلب الاطفال ما يصحون لهاي الفتره الطويله اللي هي ٤٥ دقيقه إلى ساعه بس نحاول قدر الإمكان
اذا رضعتي طبيعي فالطفل ما راح ينام هوايه مثل اللي يرضع صناعي
طبيعي ان الرضاعه تكون من ٨ إلى ١٢ مره باليوم
اذا مقرره تبدين ببروبايوتك من اول يوم ابدي حتى هم ننشيء نظام مناعي جيد و هم نقلل المغص و الارتجاع
نبدي بالأسبوع الثاني
الاسبوع الثاني يشبه الاول
بس تبدين تعرفيله اكثر انه فترات النوم واضحه و الرضاعه تسهل و تعرفين علامات الجوع
بنهايه الاسبوع الثاني راح تجي طفره نمو
و راح يبدي الطفل يرضع اكثر و تجي نوبات يريد يرضع كل ساعه او اقل
كل اللي عليك ترضعيه كما يطلب
و يسموها هاي الحاله
Cluster feeding
بالأسبوع الثاني همين لا تكعدين الطفل الا اذا مرت ٤ ساعات بلا رضاعه
احسن وقت للعب على البطن و تعليمه على
Tummy time
هو الآن
ابدي انت اكلي زين لان الحليب راح يزيد و إنتاجه يزيد و اشربي الكثير من الماء
لا تنسين تغلقين الاضويه مثل ما سوينا بالأسبوع الاول
الاسبوع الثالث
الطفل راح يبدي يكون نشط اكثر و يقل النوم
المشكله تصير انه بعض الاطفال يصير نشاطهم ليلا
لذلك مهم جدا نعلم الاطفال على الليل و النهار من خلال الضوضاء و الضوء
من نصبح الصبح نفتح الاضاءه و نفتح الستائر و نتحدث بصوت واضح بين بعضنا
اغفاءات الصباح خلي تكون بغرفه بيها ضوء و ضوضاء
يعني بالصالة او اي مكان تجتمع بيه العائله
اما نوم الليل فيكون بغرفته بفراشه بعد مساج او تربيت او اغنيه او ضوضاء بيضاء بدون ضوء اهم شي
ملاحظات الاسبوع الثالث :
النوم يقل قليلا ليكون حوالي ١٦ اسبوع
لا توقظ طفلك للرضاعه و اتركه ينظم رضعاته بنفسه
اطفال اعرفهم هنا يبدون ينامون الليل بطوله او نصفه
اذا جيكت الوزن ويه طبيب الاطفال و كالك لا تكعديهم لا تكعديهم
أطفالي من هذا النوع اللي ينامون الليل بطوله من هذا الأسبوع
و الكثير من الاطفال هذا وضعهم ماكو اي داعي للقلق اذا تطمنت بخصوص الوزن ويه طبيبك
اعرف جيدا ان ما ذكر ممكن يكون ما يتطبق على طفلك بس مطبق على اخرين و ماشيه الأمور
نكمل بعد؟


د. سيف سمير البياتي اخصائي طب الاطفال باز کردن / نظر دهید

2023-01-23 22:28:19 عندي بنيه صغيره عمرها ٤ سنوات الا شويه
تصعد لغرفه صغيره مخليها بالبيت
بيها مجموعه العاب
تصعد على المكنسه الكهربائيه على اساس هي حصان طائر
و ساعه تشيل الموزه و تخابر بالموزه صديقتها او صديقها
و ساعات تضحك على نفسها و ساعات تضحك على صديقتها
مجرد متابعتها لساعه وحده هي تعب حقيقي
من كرسي لاخر
لطاوله لأخرى
و كل شويه اخ اوي تعورت اني
ما تعرف الخطر و الأمان
و تقفز من أعلى مكان
و تحب تلعب هوايه
و اذا لكت علبه مكياج هاهيه سلملي
و الحمد لله بيتي صغير و ما بيه حديقه و الا الطين ترس البيت !
اكول لا ما يفيد
امها تكول لا ما يفيد
و مصره على انها صغيره و انه هي صح و انه احنا خطأ
نجي نشرح ليش هيجي تتصرف ؟
هي تعرف كل شيء و تعرف الالوان و تكمل محاوره كامله و تكمل جمله و تحجي قصص بالتفصيل و تعرف اسمها و جنسها و عنوان سكنها
زين ليش هذه التصرفات؟
الكل راح تجاوب انه هي صغيره طبعا بعدها
و بعدها ما تفهم شنو الموضوع
الجواب بين صح و خطأ
صح صغير بس مو معناه عقله مو كامل
بس معناه ان هو إنسان مختلف بتلقي المعلومه و ترجمتها
و ماله واهس يعرف كيف وجهه نظر الاخرين بيه و بتصرفاته
لو فهمنا هذه الجزئيه بالاختلاف لفهمنا اتهاماتنا الخطأ لاولادنا إنه هم عنيدين او قليلين ادب و اللي يعرضهم لعقاب اما جسدي او لفظي
خليني اضوي الموضوع اكثر
الطفل يشوف التصرف من وجهه نظره فقط و متصور إنه اللي داير مدايره نفس الشي يشوفوه
و هذا يسموه Egocentric
يعني ماله علاقه بالاخر
يعني من ياخذ قلم الكحله مالتك و يلون بيها المرايه يشوفها إنه هذا فن عليك تقديره
و ما راح يفتهم ابدا و لا راح يقدر إنه ليش تعيطين و تصيحين
و هذا نفس السبب من يوكع بيده قلم جاف راح يصبغ بيه الحايط ثاني حتى لو ملختي نفسك من العياط
لان بنفسه يكول هاي شنو الاوفره قابل شسوينا!
هو مو مؤدب و لا يعاندك و لا عاجبه يكسر كلامك
هو مجرد مدا يعرف ليش انت دا تبالغين
لا تنسين ابدا انه تفكيره بهذه المرحله يكون خيالي و يتخيل المكنسه حصان و الموزه تلفون و الكارتونه بيت و لذلك ما راح يفهم اصلة اي تداعيات لأي شي و هذه هي حياته
يضاف إلى ذلك رغبه جامحه بالتعرف على الأشياء من خلال حواسه الخمسه لذلك يكون اسئلته كثيره و حركته اكثر و حوادثه اكثر
طيب دكتور إلى عمر يبقى Egocentric؟
يستمر بهذا الفهم من عمر سنتين إلى عمر ٧ سنوات
و بعدها يبدي يفكر بطريقه منطقيه اكثر
و يهتم لمشاعر الاخرين اكثر
إلى أن يوصل لمرحله النضوج بعمر ١٢ سنه و اللي بيه يشبه الكبار و يشبه خيالاتنا الواقعيه اكثر

مختصر مفيد
لغايه ١٢ سنه الطفل راح يتعلم و يتعلم و يتغير بطريقته و تصرفاته و كلشي بيه
احنا لو عرفنا كيف يفكر فتأكد راح نكبر شخص سوي محترم و عاقل
ننطيه مساحه يجرب و يتعلم و يلون و يشخبط و يقذر نفسه
و احنا نعلمه بهذا المشوار و نفهمه و نعيد و نزيد و نكرر
اي راح تعصبين
و اي راح تغضب
و اي راح ننفعل
اي احنا بشر و من حقنا
بس حاول قدر الإمكان تبعد غضبك عنهم و ترجع تفهم و تشرح و تخلي بعقلك جمله وحده ( كل ما راح تتعامل بعقلانيه ويه الامور كلما راح يكون الطفل اكثر تفهما و تقبلا و ردود فعله أكبر من عمره )
#إعرفوهم_صح_علمود_تتعاملون_وياهم_صح
#مراحل_تطور_مو_اكثر
#حاول_تفهمهم
د. سيف سمير البياتي اخصائي طب الاطفال باز کردن / نظر دهید

2023-01-19 00:51:33 بس لا تستعجلين بتغيير الحليب !
من أهم التوصيات اللي تخص الحليب انه لا تستعجلين بتغيير الحليب من نوعيه إلى أخرى
او من شكل لآخر
يعني اكو انواع حليب طبيه صحيح
بس من الطبيعي ان الطفل يصير عنده مغص
و من الطبيعي ان يصير عند الطفل ارتجاع
تعالوا نسولف عليها
اذا الطفل صار عنده مغص من الحليب
ماكو اي داعي لتغيير الحليب
فكل انواع الحليب تسوي مغص
اي اكو حليب خاص للمغص
بس اكو قطرات كوليف اللي حلت المشكله و صار ماكو اي داعي لتغيير الحليب بخصوص المغص
بالاضافه لفائدتها بزياده الوزن كونها تسهل الهضم
الارتجاع
40 بالميه من الاطفال عدهم ارتجاع
و هيج هيج راح تتحسن الوضعيه بعد الشهر السادس للتاسع و لو أحيانا تستمر لغايه سنتين
شركات الحليب هم سوت حليب مضاد للارتجاع
بس مشكلته شويه صعب بالحل و التحضير
الارتجاع كذلك ممكن التقليل منه باستخدام قطرات البروبايوتك في بعض الاحيان
لذلك لا نستعجل بالتغيير من نوع لآخر
ممكن تغيرين ضمن الشركه نفسها
بس لا تستعجلين بالتغيير


د. سيف سمير البياتي اخصائي طب الاطفال باز کردن / نظر دهید

2023-01-17 22:59:45 الذات المتشظية…

التقيتُ بـ (م) ذا الثلاثين ربيعاً مع أخيه أول مرة في العيادة، وكانت تبدو عليه أمارات الخجل والقلق من هذه الزيارة، وكان يتجنب قدر الإمكان أي اتصال بالعينين معي، ويكتفي بما يقدمه أخوه من إجابات. وعندما سألته عن سبب الحراجة من التواصل البصري، أفترض أنه يكافح "الأفكار الجنسية غير اللائقة" حين ينظر إلى شخص ما؛ إذ إن النظر المباشر يحرك في نفسه المواجع، ويتخيل جسد الطرف المقابل عارياً. على الرغم من الخجل والقلق الملموسين في الزيارة الأولى، كان م يمنح أنطباعاً بأن هذه العيادة مألوفة بسبب كثرة مراجعات الأطباء النفسيين لسنوات.

تبدأ الحكاية حين راودته أوهام متكررة بأنه كان مسؤولاً عن طرد بعض الطلبة في الجامعة بسبب اختراقه لموقعهم الإلكتروني وتقديمه ملاحظات فظّة عن أدائهم، وكان يعتقد أنه مصدر متاعب للآخرين، وعبء دائمي لعائلته وأصدقائه. وقد جاء، في إحدى الزيارات، يشكو من قلة النوم في الليلة السابقة لأنه كان يعتقد أن كلب جاره ينبح طوال الليل، لا لشيء إلا لينذره بأنه عرضة للمشاكل. تحدث م أيضًا عن اجتراره لفكرة أنه بيدوفيل بسبب أفكاره الاقحامية عن الأطفال - والأسوأ من ذلك، أن أفكاره "السيئة" يمكن أن تنتقل بالعدوى للآخرين.

سرعان ما تحولت النوبات الذهانية إلى تجربة مقلقة، بحيث أغرقت صاحبها في وحلٍ من أفكار وسلوكيات مختلّة. وتفاقمت الحالة في أواخر سنته الدراسية الأولى، ونقل عن أثرها إلى المستشفى بسبب سلوكه، وقلة عنايته بنفسه، وأفكاره الانتحارية. تتابعت بعد ذلك النوبات الذهانية ودخولات المستشفيات في صراع طويل على ما يبدو من الشيزوفرينيا المعندة للعلاجات.

وعلى الرغم من هذه النوبات المتعاقبة، تمكن م من إكمال دراسته الجامعية. وكان يسترجع أيام الطفولة والدراسة الجامعية في جلساتنا، على عكس تجهمه حين نتطرق إلى حالته النفسية، بشغف واهتمام كبيرين. يضاف إلى ذلك أن خلف ملامح م المتخشبة نتيجة تعاطي الأدوية، والشكوك الذاتية، والمعاناة، ثمة شخص حنون ومراعٍ. كان يواضب على التبرع بجزء من راتبه (لأنه موظف مخلص وعتيد) إلى الفقراء. وقد أعرب، في إحدى الزيارات، عن ارتياحٍ بالغ حين أدرك أن أفكاره الاقتحامية ليست معدية، وأنه غير مسؤول عن عدوى الآخرين بالوسواس القهري. لكن نادراً ما كان بالإمكان أن يفصح عن مشاعره باسترسالٍ وعفوية أو يجيب بإسهاب على الأسئلة التي أطرحها.

العظيم في م أنه يشعر، طوال المراجعات، بحنين وحزن إلى الذات القديمة. وذكر، في عدة محافل، أنه يستذكر بوجع بالغ كيف اعتاد ممارسة هواياته في المراهقة، وكيف يفتخر بنبوغه في الرياضيات والسباحة. لا يزال يحاول الخروج والسباحة حين تهدأ حدّة الوساوس ولا تشغل تفكيره، لكن أغلب الوقت يمضيه في المنزل يتفقد الرسائل، أو يشغل نفسه في الخروج إلى المتنبي حين لا يشعر أنه يسبب مشاكل للآخرين.

العظيم الذي علمني إياه (م) أنه، رغم مقاومته للأفكار، لكنه يعتقدها جزءاً لا يتجزأ من ذاته، وليست عارضاً يعاني منه، خصوصًا حين يتحدث عن النظر إلى أعضاء الآخرين التناسلية. لذلك قرر ملازمة المنزل وعدم الخروج. ولا يجد السلام والسكينة إلا في سواد الليل، حين يتنزه وحيداً في الطرقات بدون أن يشاهد أو يشاهده أي شخص كان. قال لي في آخر مراجعة "ذاتي أشبه بالمرآة المتشظية"، فأنا عدّة ذوات ولست بذات واحدة..! وليت صديقي يقتنع أن لكل شخص منا عدّة ذوات، وجميعنا متشظّون. ولكن الاختلاف أننا لا نعترف بذلك فقط…

النص مكتوبٌ بعد موافقة (م) بكل تأكيد
د. حميد يونس باز کردن / نظر دهید

2023-01-17 01:25:39 نصائح لتجاوز الاكتئاب الشتوي

برودة الطقس وغياب الشمس وقصر النهار تسبب في تغيير الساعة البيولوجية وتشعر الشخص بالحزن والقلق وعدم القدرة على أداء أي نشاط، والميل إلى الانعزال عن محيطه تماماً.

أولاً:
الاستمرار في ممارسة الأنشطة الرياضية مثل الجري، المشي، السباحة، تساعد على تحفيز إفراز هرمونات الإندورفين ونواقل المشاعر فيقل الحزن والاكتئاب.

ثانياً:
تعرّض لأشعة الشمس تعمل أشعة الشمس على إعادة التوازن لهرمونات الجسم وخاصة تلك المسؤولة عن الشعور بالاكتئاب.

ثالثاً:
تناول الشوكولا الداكنة تُحسّن الحالة المزاجية وتنشط الجهاز العصبي وتخلّص الجسم التعب والإجهاد، كما أنها تحتوي أيضاً على التربتوفان الذي يرفع مستويات السيروتونين.

رابعاً:
لايُحبّذ أبداً أن تختلي بنفسك في المنزل حين تشعر بالاكتئاب.

خامساً:
تُسبّب التغيرات المناخية بحالة من الأرق وهذا ما يزيد من حالة الاكتئاب التي تشعر بها، لذا ندعوك لكي تغيّر نظام حياتك كأن تتجنّب السهر لوقت متأخر، وأن تنام وتستيقظ في مواعيد ثابتة، وحاول ألا تغفو في منتصف اليوم.

سادساً:
اعتني بمظهرك الخارجي، مثلاً اختر تسريحة جديدة لشعرك، ارتدي الملابس ذات الألوان الزاهية بدلاً من الداكنة، ضع العطور المنعشة، أضف الإكسسوار إلى إطلالتك، اهتم بصفاء بشرتك، نظّف أسنانك، كل هذه الأمور تولد بداخلك السعادة والرضا.

سابعاً:
مارس هواياتك المفضّلة بدلاً من الانعزال لساعات طويلة في غرفة نومك.

د. حميد يونس
أخصائي الطب النفسي باز کردن / نظر دهید

2023-01-15 12:56:57 مبدأ الكتل للطفل او الراشدي ( الكف ) او جره الاذن او العضه او اي مبدأ لعقاب الاطفال شنو رايك بيه ؟
بأحد كروبات الفيس بوك صار تصويت على مبدأ هل الضرب الخفيف للطفل انت معه او ضد ؟
التصويت كان في الأغلب مع
التصويت مو جديد و لا غريب لو عرفنا انه ٨١ بالميه من الامريكان مع ضرب الطفل
اعرف و اقدر حجم الضغوط على الآباء و الامهات بالأخص الظروف الماديه و العائليه و السكنيه بس لازم نعرف الحقيقه و لازم نعرف تاثير الضرب على الاطفال
اول تاثير
الضرب يؤخر تطور الطفل
من المعروف ان الطفل و عقله ينمو جيدا في البيئه الامينه و عندما يشعر بالأمان
التأثير العقلي واضح على معدل الذكاء حسب دراسه كنديه فان معدل الذكاء ينزل بمعدل ٥ درجات بالاطفال اللي ينضربون ( معدل الذكاء يبلغ من 80 إلى 120 ) للأشخاص السليمين
قسم من الآباء و الامهات يكولون احنا بس نضربهم من صغار ما يفتهمون
بس اذكركم بمعلومه انه اكثر النمو الدماغي يصير بأول سنين
لذلك قالوا التعليم في الصغر مثل النقش على الحجر
التأثير الثاني للضرب و العنف ضد الاطفال هو التأثير النفسي و العقلي للطفل بحيث ربطت الكثير من الدراسات بين ضرب الطفل و امراض نفسيه متعدده مثل الاكتئاب و فرط الحركه
الضرب يخنق الجرح في الداخل
قسم من الآباء و الامهات يضربون لان الطفل يبجي و الطفل من ينضرب راح يسكت
قسم يتصورون انه هاهيه تمت المهمه بنجاح
في حين انت خلقت شعور و جرح في داخل الطفل
ابدا ما أسعى انه اخلق جو توتر عدكم بس فكر زين قبل ما تمد ايدك على طفلك
هو مو ذنبه ظروفك الاقتصاديه
و لا ذنبه الضغط اللي تتعرضيله ببيت زوجك أو اهل زوجك أو ظروفك
الضرب عمره ما كان وسيله تربيه
التعليم اي
التربيه اي
بس الضرب؟
لا
استحاله
الموضوع ماله علاقه باني و انت و انضربنا شو ما صار بينا شي
قبل ما كان اكو شي اسمه فيس بوك و لا احد يعلم و لا احد يتعلم
و هسه صار وقت التغيير
دمتم و اولادكم بكل خير


د. سيف سمير البياتي اخصائي طب الاطفال باز کردن / نظر دهید

2023-01-14 01:53:40 الراشي للاطفال !
الراشي او الطحينيه
ذلك المستخلص من بذور السمسم بقوام خفيف و بطعم المكسرات
ممكن يقدم لوحده او يدخل في صنع حلويات و ممكن يضاف لاطباق مختلفه و اشهرها الحمص
للراشي فوائد كثيره و عليه ماخذ واحد او اثنين راح نستكشفها بهذا البوست
نجي اول شي للفوائد :
غني جدا بالطاقه
ملعقه طعام منه تساوي ٩٠ كيلوكالوري
يعني تقريبا موزه كامله
لذلك يفيد بالاطفال اللي اوزانهم تحت الطبيعي
الملعقه الوحده منه تعادل 10 بالميه من احتياجك لهوايه فيتامينات و معادن اشهرها
B1
B6
Phosphorus
Manganese
اي نعم فسفور و منغنيز مثل ما قريتوا
يعني مفيد لصحه العظام
لذلك مفيد للنساء بعد سن الياس
الدهن اللي بيه غير مشبع
و لهذا يكون غني بمضادات الأكسدة
اللي تمنع الكثير من الأمراض مثل امراض الشرايين و القلب و السكر
يقلل خطر اصابتك بالسكر النوع الثاني و يقلل الدهون السيئه حسب اكثر من دراسه بعد تناول ٣ ملاعق سمسم يوميا
عنده بعض الخواص المضاده للالتهابات لذلك كانوا يستخدموه لضماد الجروح
بيه مضاد التهاب و عند تجربته على الحيوانات شافوا انه يقلل الاصابه بالربو القصبي
الكالسيوم اللي بيه كثير جدا بحيث ملعقه طعام سمسم بيها ٨٧ ملغرام كالسيوم
عده فوائد أخرى تخص الصحه العقليه و الكليه و الكبد
.
.
مشكله السمسم هو التحسس منه
السمسم اي نعم مو من اشهر الاكلات اللي تسوي تحسس
بس مع كل الاسف بامريكا وحدها اكو مليون شخص يتحسس من السمسم و مشتقاته
و هذا يخلي السمسم بالمرتبه 9 على مقياس التحسس العالي
طيب متى أكدر ادخل الراشي للاطفال؟
حسب توصيات التغذيه الصحيه للطعام الامريكي فانه ممكن ادخال السمسم بعمر ٤ إلى ٦ اشهر
بس رأيي الخاص انه ننتظر بعد ٦ اشهر كونه عالي على مقياس التحسس
انطي الصغير سمسم لو راشي ؟
كون الطفل معرض للاختناق بالسمسم فأفضل شي انه نبدي بالراشي للطفل
افكار لاطعمه للاطفال؟
ممكن اضافته للحمص و تخفيفه بطريقه يتقبلها الطفل
و الكوكل مليان بوصفات تستخدم الراشي مع الجزر او مع اللبن او مع الليمون


د. سيف سمير البياتي اخصائي طب الاطفال باز کردن / نظر دهید