إستشارة طبية

2023-02-10 23:41:14 ولو اني أبدا ما انصح بالجداول الخاصه بالاكل
بس جدا حبيت هذا الجدول المقترح لطعام الطفل حتى ناخذ فكره عن بعض الأفكار الغذائيه بالعالم واترجمه الكم
هذه العلامه تعني مستوى حساسيه عالي :
٤ الى ٦ اشهور يعني اكبر من ١٢٠ يوم
الحبوب
رز اسمر
رز ابيض
الخضراوات و تصنع كبيوريه
بطاطا حلوه
بطاطا بيضاء
جزر
يقطين
شجر
الجزر الابيض
الفواكه و تخفق كبيوريه
الموز
العرموط
افوكادو
الخوخ
المشمش
٦ إلى ٩ اشهر
الحبوب
الحنطه
الشعير
الشوفان
الكينوا
الفواكه كبيوريه او مقطعه او مهروسه
كرز
بطيخ
مشمش
كيوي
اناناس
طماطم
الحمضيات
الفراوله
الخضراوات و البقوليات كبيوريه او مهروسه
الفاصوليا
البزاليا الخضراء
الشجر
الباذنجان
القرنابيط
الحمص المهروس
البصل
السبانغ
مشتقات الحليب
اللبن
البيض
اهم شي بيض مسلوق او مقلي
اللحم
أبدا بالدجاج
اللحم
الديك الرومي
السمك
السمك الابيض
التونا
السردين
زبده الفستق
أخرى
الثوم
الأعشاب
الفطر
٩ إلى ١٢ شهر
نفس الخضراوات و الفواكه بس مقطعه و تكون اصلب أكثر
جبن ابيض
الحبوب: المعكرونه
أكثر من ١٢ شهر
الذره
العسل
الحليب الكامل الدسم
اللي نستفاده من الجدول هو اولا عدم الاستعجال
و كل ٤ ايام ننطي وجبه جديده
و ناكد على اللحم بحدود ال ٦ اشهر و ما ناجله بعد السنه كما تقول الخرافه العراقيه يسوي دود اللي محد يدري شون !!!
ناكد على الحليب الكامل الدسم بعد السنه يلا
بالنهايه اؤكد على أن هذا الجدول مجرد ترجمه
انت حره باتباعه او رفضه
بس حبيت نطلع عليه
د. سيف سمير البياتي
اخصائي طب الأطفال باز کردن / نظر دهید

2023-02-09 23:36:33 انت خوش ام؟ !!!
السؤال يتبادر بذهن كل ام تهتم لموضوع انه هل هي كافيه ؟
هل هي تؤدي المهمه بصوره صحيحه؟
هذه ١٥ نقطه تقولك انه الامور تمشي بصوره صحيحه و انه انت خوش ام
يلا نبدي
1. اول نقطه
الأم الجيده هي الأم اللي تطمح انه تكون أفضل و افضل و افضل
طموحها لا يقف عند حد
مجرد انه هذا المقال استهواك و بديتي تقريه معناها انت راغبه بالأفضل لعائلتك
و الطريقه للحصول على الأم الأفضل هي بالقراءه و التمعن بالقراءه لكل معلومه طبيه و تربويه و ان لا تثق بمقوله ( كننا ) و ( مو سوينا ) و ان تعرف ان العلم هو أساس التربيه الحقه
2. الأمهات الجيدات هي اللي عدها وقت لنفسها
حتى لو ١٠ دقائق يوميا لنفسها لصحتها للتعافي النفسي
3. الأمهات الجيدات هي اللي تخلي الحدود
حدود للاطفال حتى
مو معنى اكون ام جيده اخلي الاطفال براحتهم
بالعكس تعليم الأطفال على المسئولية و ان يكونوا جزء من المجتمع دور مهم و اساس تضطلع بيه الأم الجيده
الأم الجيده ما تفكر لقريب
تفكر لبعيد و بعيد جدا
4. الأم الجيده يكونون اطفالها متفاعلين وياها و يحجولها كلشي و تصادقهم كلهم و تسمع كل احاديثهم
5. من الطبيعي و العادي ان يكون بيت الأم مبعثرا بعض الشيء
مو شرط يكون البيت يلمع ٢٤ ساعه باليوم ابدا
البيت اللي بيه ضوضاء الاطفال و العابهم هو بيت صحي
6. الأم الجيده هي الأم اللي تحب اطفالها!
تسأل ام و تكول شنو هالنقطة اكو ام ما تحب اطفالها ؟
لا مو الحب اللي هو الحب الاعتيادي
تحبهم تتحاور وياهم تضحك وياهم
مو مشغوله بالموبايل ٢٤ ساعه و تدير البيت من خلف جدار
7. يشع قلب الأم الجيده فرحا عند رؤيه اطفالها
احساس بالسعاده لازم يكون مرافقك من تشوفين اطفالك
8. الأم الجيده تمر بأيام سيئه
هذا قانون و ماكو اي شي يمنع و بالعكس لازم تمرين بفترات عصيبه هذا دليل على أن الحياه ماشيه صح و انه الظروف صعبه
9. الأم الجيده تهتم بموضوع المدرسه و الدراسه
تروح للمدرسه و تشوف الدروس و تشوف المدرسين و تسأل و تتابع و تشوف الكتب و الواجبات و تبحث عن الأفضل من المدارس و الدورات و كل الأشياء التعليميه اللي تطلع اطفالها إلى الأمام
10. الأم الجيده تتحدى الصعاب و المشاكل و تجد دائما الوسيله لحل المشاكل و التواصل
ابدا الأم الجيده ما تيأس و ماكو بقانونها ( مو شاسوي مو الطفل ما يقبل ) تعرف انه هي القائد و المسؤول
11. الأم الجيده هي من تجعل اللحظات العصيبه مميزه و ذكرى للتعلم
اي الحياه صعبه
و اي الظروف تعيسه
بس ما بيها شي لو بنص هذه الظروف تحولين هذا الظرف إلى لعب و ضحك
12. الأم الجيده هي اللي تعمل الأخطاء و تعتذر عنها
مو عيب الخطأ ابدا
بس الاعتذار راقي و يعلم الطفل على الأفضل
13. الأم الجيده هي اللي تقلل وقت الشاشه عن طفلها
اي الوضع صعب الان و بظروفنا
و نخوض صراع يومي من أجل تقليل الشاشات بالبيت بس نحاول و نقلل و نجحنا لحد ما فحاولي انت تستطيعين
14. الأم الجيده هي الأم اللي تحب أن يكون اطفالها مسؤولين و ناجحين بالحياه
تعجبني جدا الأمهات اللي يعرفن انه هدفنا بالحياه هو تاديه الامانه
انه نكبرهم و نوصلهم لبر الأمان
نعلمهم كيف يكونوا أشخاص جيدين بدون مشاكل نفسيه او عقليه او جسديه
15. الأم الجيده هي اللي تقول لا لاطفالها
اي نعم
هي الأم اللي تعلم و تفهم ليش اللا
و انه مو كل شيء اي
الأم الجيده هي اللي تكول لا للتدخل بحياتها و حياه اطفالها
دمتن بود يا امهاتنا
د. سيف سمير البياتي اخصائي طب الاطفال باز کردن / نظر دهید

2023-02-06 13:08:59 10 أسباب تخلي طفلك ما ياكل
و 10 علاجات للحالات بنفس الوقت
١. طفلك يشعر بالضغط
اي نعم طفلك يشعر بالضغط و بالأخص باعمار سنه و فوك
نتيجه جبركم و انه يحس انه لازم ياكل المسكين
اكو يكعدون يكابلون الطفل و الا تاكل
و اكو من يضربوهم
الحل:
أبدا لا تحسسيه بالضغط
اعطيه الحريه
اعطيه كل الخيارات و الحريه بالاكل
اكعدوا كعائله و خليكم متفاهمين
و اكلوا سويه
و لا تخليه يحس انه مراقب
.

٢. طفلك يشعر أنه لا قيمه للطعام!!!
الدراسات تكول لما طفلك يشارك بتحضير الاكل ياكل اكثر !!!
و عليه شجعيه يحضر الاكل وياك
و يخبط الكيك وياك
و يحضر المائده وياك
.

٣. طفلك يشعر بالملل و الضوجه من الوجبات
كل يوم بيض؟!!!
كل يوم يوم دجاج !!!
و الحل : غيري الوجبات
غيري طريقه الاعداد
غيري طريقه التقديم
الوان و اشكال
.
٤. ببساطه هو ما جوعان !!!
اي و الله
الطفل ما جوعان
احترميه
احترمي احساسه بالشبع
ما جوعان ببساطه
معدل النمو مالتهم اقل من اول سنه
فعادي جدا ما ياكل
كان ينمو و يزيد وزنه بمعدل ٣٠ غرام باليوم اول ٣ اشهر
و هسه دا يزيد بمعدل ٤ غرامات باليوم بعمر السنه
تتخيلين الفرق؟
ما يحتاج للطاقه
.
٥. طفلك مشغول!!
طفلي ما ياكل الا يشوف تلفزيون
اعترفلك انه ممكن ياكل ويه التلفزيون او اللعبه
بس راح ياثر عليه بالسوء
لان راح يلتهي باللعبه و لا راح يعرف شكد اكل و شكد ياكل
لا راح يصير عنده احساس الشبع
و لا احساس الجوع
لا تعلموهم على هذا التصرف الخطأ
.
.
٦. لا يكون موضوع الاكل هو الشغل الشاغل للبيت و العائله و الاب و الام
سوي نفسك غير مهتمه أبدا
يميل الأطفال للعناد أكثر
و عليه اهملي الموضوع
.
.
٧. كثره الحليب و العصير بين الوجبات
و طبعا يستخدم كمبرر انه الطفل ما ياكل فانطيه حليب احسن ما يجوع
و اكو من يكول انه دكتور ٩ ساعات ما انطيته حليب و ما اكل
اختي افطمي كامل و لمده اسابيع
خصوصا بعمر فوك سنه و نص
تعرفين مو انه آخر موعد للمميه هو سنه و نص صحيح ؟
الحل: استخدمي الماء فقط بين الوجبات الرئيسيه
و الحليب اعطيه مره او مرتين باليوم
بعد وجبه الفطور او قبل النوم
العصير ؟
العصير كلما تقلليه احسن لطفلك و لصحته و لشهيته
و ما بيه فائده عظيمه أبدا
.
٨. اكل بين وجبات هوايه!
ياكل الطفل بين الوجبات هوايه
يعني جكليت مثلا او نساتل بين الوجبات ؟!!
شون راح ياكل مثلا اذا انطيتيه جبس؟
او نستله قبل الغدا بساعتين
خلي اكل بين الوجبات صحي خضراوات او فواكه
كانت بنتي الكبيره من تاكل تفاح الساعه بال ١٠ الصبح تتغدى كلش زين
.
.

٩. الأمراض و بالأخص فقر الدم و من مراجعيني بس ادزه تحليل دم او تحليل التهاب مسالك بوليه يطلع عنده اما فقر دم او التهاب مسالك بوليه و من اعالجه يتحسن اكله
١٠. التسنين عادي هم لا تقلقين
فتره و تعدي
و طبعا تدرون التسنين لا يسبب أي حمى او اسهال او قيء
الإسهال اللي يصير ويه التسنين هو نتيجه انه الطفل يخلي اشياء بفمه و بالتالي هذه اشياء ملوثه و يصير عنده التهاب أمعاء و بس
.
.

تحياتي الكم
د. سيف سمير البياتي
اخصائي طب الأطفال باز کردن / نظر دهید

2023-02-03 00:31:44 و بظل الازمه الاقتصاديه و الدولار و الارتفاع الحالي
شويه حلول اقتصاديه نحاول نقتصد شويه بيها
نبدي باسم الله
اذا الوضع الاقتصادي على المحك اكيد ما نسوي طفل ثاني و نحسب حساب جيد للامور
الوقايه خير من العلاج و المباعده بين الاطفال بالغرف تقلل الامراض و انتقالها لذلك ما نسوي طفل ثاني اذا ما نعزل الطفل الاول بغرفه منفصله بالاخص اذا الطفل الاول عنده تحسس قصبات او ربو
و نكمل تحت عنوان الوقايه خير من العلاج فالاطفال بعمر أقل من سنتين اقلل اختلاطهم بس اكيد بالاخص الاطفال اللي أعمارهم اقل من سته اشهر
يعني مو ضروري اروح للحفله و عندي طفل رضيع عمره اقل من ٦ أشهر و ارجع بيه لاكف التهاب القصيبات او غيرها
و لان الوقايه ارخص من العلاج لا تنسين ان تفوير المميه يجب أن يتم قبل كل رضعه لتجنب الاسهال
فلوس الجبس و النساتل و الحلويات حولها إلى فلوس تفاح و موز و فراوله و شوف المناعه شلون راح تصعد و شوف شلون المرض راح يقل
الرضاعه الطبيعيه ارخص و انظف و اكثر أمانا بالاضافه إلى انه ماكو و لا حليب صناعي يشبهه
عدد المميات ما بيه مجال للتقليل و هو عدد الرضعات زائد واحد يعني بحوالي ٦ إلى ٨ مميات
خوافض الحراره ممكن تبقى بعد الفتح ٦ اشهر و شراب منع القيء و اكثر شرابات السعال ممكن تبقى ٦ اشهر بعد الفتح
مرهم الزنك العراقي بالف دينار فقط جدا مناسب بديل عن السودوكريم
الحبوب و الكبسول ارخص بهوايه من الشرابات فاول ما يتعلم يبلع حبوب راح تكون الوصفه ارخص
جهاز التبخير مو بس اكثر أمانا من شرابات و حبوب الفنتولين بس اذا طفلك عنده تحسس صدكني جهاز التبخير راح يطلع اصرف
بالحفاظات مع كل الاسف ما عندي خيار اقتصادي انصحكم بيه و فعلا الحفاظات ذات الجوده العاليه هي اللي سعرها غالي
و نرجع للوقايه و نكول لفه بيتنجان بالبيت اكثر أمانا من كنتاكي دجاج من فلان مطعم ممكن تتسمم بيه و تدخل مستشفى
الله يفرجها لهذه الازمه عن الجميع بس بالهداوه بالهداوه بعدد الاطفال لان هوايه دا تحملون نفسكم طاقه اكثر مما تكدرون
احساس الاموه و الابوه تحسه بطفل او بعشرين و الله
مو شرط تكولون احنا تعبنا بس مبين هالشي من ملامح التعب و الارهاق و الحيره على وجوهكم
د. سيف سمير البياتي اخصائي طب الاطفال باز کردن / نظر دهید

2023-02-01 17:14:11 18 نصيحه لما بعد العمليه القيصرية بأول اسبوع إلى اسبوعين
١. حاولي تسيطرين على السعال اما بالعلاج او شرب السوائل الدافيه
٢. مثلها حاولي تقللين من العطاس و تجنبي الأشياء اللي تحفزه
٣. الضحك حلو و خوش طريقه لازاله الالم بس لا تضحكين بشده مجرد ابتسمي
٤. خلي المخده او مسند من القماش تكون صديقتك بكل حركه خليها دائما على جرحك و اكيد مفيده بالطسات من تطلعين من المستشفى
٥. أبدا لا تاكلين شي يسوي غازات
٦. و أبدا لا تاكلين شي يسوي عندك امساك
٧. أبدا لا تضوجين و لا تفكرين بعلامات العمليه القيصرية
٨. حاولي قدر الإمكان ما تستخدمين الدرج استخدمي المصعد
٩. من يصير عندك الم شديد أبدا لا تبجين بعنف ممكن البجي يزيد الالم أكثر من الجرح نفسه
١٠. أبدا لا تدنجين و بقوه و تشوفين بطنك اللي ممكن يزيد ضغط البطن
١١. و لا تفكرين و لا تخطر ببالك تشوفين الجرح
١٢. اذا ردتي تشوفين انه الجرح شفى او لا اسألي زوجك او طبيبتك
١٣. لا تستعجلين انه ترجعين للحياه الطبيعيه
راح ترجعين شويه شويه
١٤. لا تفكرين أبدا بالخدر و التنمل اللي يصير بمكان العمليه هذا شي طبيعي
١٥. لا تخجلي ان تطلبي المساعده من الأشخاص اللي بجانبك
١٦. لا تنسين أبدا المسكنات اللي كتبتها الك طبيبتك و العلاج اللي تاخذيه
١٧. لا تضوجين نفسك انه ما جبتي طبيعي
١٨. لا تقللين من شانك انه ما جبتي طبيعي لانه بالمحصله انت ولدتي طفلك كهديه لتعب ٩ اشهر


د. سيف سمير البياتي اخصائي طب الاطفال باز کردن / نظر دهید

2023-01-30 13:00:23 ابني ما يحجي
و نادرا ما يكون بنتي ما تحجي
او تاخر بالكلام
تاخر الكلام من الاشياء المقلقه للام و الاب و حتى الطبيب
السؤال الشائع هو ابني عمره سنتين او ٣ سنوات و ما يكول بس ماما و بابا و احيانا يكولهن بدون قصد و لا على التعيين
هل ابني فعلا متاخر في الكلام او لا ؟
الاجابة اي نعم متاخر طبعا
بس اريد تجاوبيني
لما تصيحيه يجاوبك ؟
هل ينفذ اوامرك ؟
لما تصيحيه يجاوبك ؟
لما يريد شغله ياخذ ايدك و يكولك اريد فلان شي و فلان شي ؟
عالكتله التلفزيون ٢٤ / ٢٤ ساعة ؟
اكو مشاكل بالولادة او بعدها؟
اكو تاخر ببقية الفعاليات مثل الجلوس او الوقوف او المشي ؟
ممكن هذا ينطينا فكرة عن سلوكيات الطفل النفسية و العصبية
صدك التلفزيون ياثر على الكلام؟
طبعا
عندي بوست طويل عريض عن هذا الموضوع و مؤكد بالبحوث النفسيه على مئات الاطفال
ملخصها انه تخلين طفلك مستلم فقط
يسمع اللي يكوله اله هذا الجهاز و بدون رد
بعد عليمن يحجي!!!
ماكو تلفزيون او شاشه تحت ١٨ شهر
انسوا
لا من ياكل و لا من يشرب و لا لاي حجه
راح يكولن مو كبرتوا و ما صار شي كالعادة
اي صح كبروا و ما صار شي
بس هل قبل مثل هسه دا تسمعون مشاكل نفسية عند الاطفال ؟
الجواب لا طبعا
لذلك بلا تلفزيون و بلا تلفون و لا ايباد تحت ١٨ شهر
نجي لعمر بعد ١٨ شهر
هذوله نكعد وياهم و نكوللهم شدا يصير و نسولف عن شنو دا يسولف التلفزيون
زائد نختارلهم محتوى تعليمي عالي
عدهم يكولون برنامج افتح يا سمسم النسخه الامريكيه
اللي هو يشبه جدا افتح يا سمسم العربي
هسه تاكدنا ان الطفل طبيعي و مجرد متاخر بالكلام
شنو اسوي؟
١. سجليه حضانة او روضه حتى لو عمره سنتين ليش لا
٢. استغلي كل مكان للكلام مع الطفل
٣. الطفل يتعلم من ابوه اكثر مما يتعلم من امه ابدي طلعات و استغل الطلعات بالكلام
٤. مع السلامه تلفزيون و موبايل و ايباد
٥. اوصفي كل شيء
هذه الطماطه حمرة
هذا القلم اسود
هذا البيت كبير
هذه السيارة اكبر
٦. لا تجاوبين من ياشر
كوليله اي ابني شتريد ؟
لح كلش كولي مدا افهم
لا تستجيبن للغة الاشارة او اخري الاستجابة
٧. اطلبي منه هوايه
افتح الباب
جيب المفتاح
اكعد
اوكف
اصعد
انزل
٨. غني
يحبون اللحن
غني الكلمات بلحن
٩. طلعه الشارع اكبر مجال تعليمي
هذا رجال
هذه سيارة
هذة شجرة
١٠. اختاري العاب محفزه للعقل مو العاب بس صوره او بس صوت و بدون اي محتوى تعليمي للطفل
المكعبات مثلا او الحزورات مثال اخر
١١. الدفاتر المصورة رائعه و هي عبارة عن دفاتر بيها صور حيوانات و اشجار و ارقام


د. سيف سمير البياتي
أخصائي طب الاطفال باز کردن / نظر دهید

2023-01-25 01:34:39 ترتيب طعام الطفل شهر بشهر
خطوة بخطوة
عندي بوستات طويله عريضه عن طعام الاطفال و شون نبدي بوجبه رقم 1
خلونا نبدي بوجبه رقم 2 و نستمر
الشهر الرابع
الوجبه رقم 1 كانت الرز و وقت الغداء
بعدها نبدي وجبه رقم 2 مثل بيوريه الجزر او بيوريه الفاصوليا الخضراء او بيوريه البطاطا
اريدكم تعرفون انه الوجبات تنطي على مدى 3 ايام
و ننطي وجبه وحده باليوم الى وجبتين فقط حتى نعرف نن شنو تحسس الطفل
الشهر الخامس :
بالشهر الخامس نبدي نضيف خلطات من الاطعمه اللي جربناها بالشهر الرابع
مثل رز و جزر
او رز و بطاطا
قطعه دجاج صغيره مع الرز
قطعه لحم صغيره خاليه من الدهون مع الرز
شوفان و تمر
شوفان و موز
الخ الخ الخ الخ
و هم وجبه الى ٢ يوميا
الشهر السادس
اذا ما دخل اللحم بالشهر الخامس
هاهيه بلشي ادخال اللحم
و الجدول بسيط دجاج ثم لحم
اللحم سهل جدا يتحول الى بيوريه باستخدام الخلاط
عادي تكدرين تسوين البيوريه و تجمديه و تخليه ويه اكل الطفل العادي
و اذا عندك وقت فحضري يوميا و هو الافضل
الوجبات هنا وجبتين لازم و ممكن ايام ٣ وجبات
و لا ننسى الفاكهه كطعام بين الوجبات
الحليب يتراجع و يقل بعد الشهر السادس
الشهر السادس ممكن ادخال اللبن بيه
و باللبن نكدر نضيف الفواكهه كطعم
البيض ممكن الان بس لا ننسى انه لابد للبيض يطبخ لفتره ٥ دقائق و اكثر
الشهر السابع :
الشهر السابع ادمجي طعام الاصابع مع الشوربات و البيوريهات اللي تسويهن
انطي لطفلك معكرونه مسلوقه و راقبي
او قطعه بطاطا او بروكلي او اصبع تفاح
ابدي سمكي قوام البيوريهات و الشوربات الان
الاكل تدريب و اذا ما سمكتي القوام اشوفك بعمر السنتين تخلطين طعام طفلك !
مثال على وجبات يوم واحد للطفل بعمر ٧ اشهر
الفطور بيض
الغداء شوربه رز و لحم
العشاء مخلوط فواكه مع لبن
الشهر الثامن
كثري طعام الاصابع
الاطفال اللي يستكشفون الطعام بايديهم هم الاكثر تقبلا للطعام بالمستقبل
لذلك اتركي طفلك يستكشف
كلشي ممكن يكون طعام اصابع
حتى البيتزا
و الدجاج و كل شيء
اذا ما علمتي الطفل على الكوب بعمر ٦ اشهر الان ابدي علميه و انطي بيه الماء
الجبن و السمك ممكن ادخاله الان و لو افضل السمك بعد السنه بس لا باس اذا بعد الشهر الثامن
الشهر التاسع
المفروض بهذا الشهر الابهام يبدي يشتغل لذلك كلشي و حرفيا كلشي راح يروح للفم سواء عجبك او ما عجبك الموضوع
فلذلك نستفاد من هذه الحاله و ننطيه طعام مقسم الى مكعبات
الجبن ممكن يعطى الان بيد الطفل
المميات او الرضاعه الطبيعيه تقريبا بكد عدد الوجبات ٣ الى ٤ مرات
الشهر العاشر
البطله تفطم من المميه و تنطي الحليب بالكوب
نفس المقدار السابق
بس لا باس اذا استمريتي للسنه
بس اكثر من ام فطمت من المميه بعمر ال ١٠ اشهر و اطفالهم ما شاء الله
عاشت ايدك
الاكل ما يفرق كثير عن الشهر اللي قبله
بس شويه من اكل البيت ممكن الان باعتبار انه اقتربنا من عمر السنه
اللي نشجع الطفل بيه ياكل اكل بيت عادي
الشهر 11
خلصت المهمه تقريبا و هسه ممكن جدا يكون فطوره كورن فلكس و نضيف اله حليب من رقم ٢
يعني كلش بدا الطفل ياكل اكل الكبار
١٢ شهر و اكثر
ياكل اكل بيت
ملاحظات اخيره
1. عمر ٤ اشهر يعني اكبر من ١٢٠ يوم
عمر ٦ اشهر يعني اكبر من ١٨٠ يوم
عمر ١٠ اشهر يعني اكبر من ٣٠٠ يوم
2. اللعب مع الطعام ضروري و ضروري جدا
3. نحترم شهيه الطفل ما عجبه ما نجبره
4. خلي ببالك كلما تنطين اكل اكثر باول سنه كلما طفلك يكون اكثر تقبلا للطعام فيما بعد
5. الممنوع تحت عمر سنه
العصير و العسل و السكر و الملح و اي طعام ممكن يشكل خطر اختناق
د. سيف سمير البياتي اخصائي طب الاطفال باز کردن / نظر دهید

2023-01-24 11:34:17 شنو رايكم نسوي جدول للطفل حديث الولاده اسبوع بأسبوع
و نمشي ببطء و نحاول ننظم نوم و حياه الطفل ؟
نبدي بالأسبوع الاول
بأول اسبوع من العادي ان ينام الطفل ١٦ إلى ١٨ ساعه يوميا
و يقضي اول اسبوع بين رضاعه و نوم فقط
نتعلم اولا كيف نعرف ان الطفل جوعان و نتدخل
و أثناء الرضاعه نحاول نخليه كاعد مثل لمس خدوده او كم ضربه صغيره على القدم او التربيت على الظهر أو فك الكماط
نسوي جدول صغير
8:00 صباحا نكعد الطفل و نرضعه و نغيرله
8:45 صباحا يلا اتركيه ينام
10:15 نرضعه و نلعب وياه و نربت على ظهره
11:00 وقت النوم
12:30 نكعده من النوم و نلعب وياه اذا محتاج نرضعه يرضع
1:15 وقت النوم
2:45 نصحيه ننطيه الرضاعه و نلعب وياه
3:45 قيلوله قصيره
5:15 نصحيه و ننطيه الرضاعه و نغير ملابسه
6:00 قيلوله أخرى
7:00نصحيه ننطيه الرضاعه
8:35 اخر قيلوله
9:15 نصحيه و نغير ملابسه للنوم
10:00 نغلق الاضويه
و ننطي الرضاعه فقط عند الحاجه و نصحيه فقط الا اذا نام اكثر من ٤ ساعات
ملاحظات الاسبوع الاول
اعرف جيدا ان اغلب الاطفال ما يصحون لهاي الفتره الطويله اللي هي ٤٥ دقيقه إلى ساعه بس نحاول قدر الإمكان
اذا رضعتي طبيعي فالطفل ما راح ينام هوايه مثل اللي يرضع صناعي
طبيعي ان الرضاعه تكون من ٨ إلى ١٢ مره باليوم
اذا مقرره تبدين ببروبايوتك من اول يوم ابدي حتى هم ننشيء نظام مناعي جيد و هم نقلل المغص و الارتجاع
نبدي بالأسبوع الثاني
الاسبوع الثاني يشبه الاول
بس تبدين تعرفيله اكثر انه فترات النوم واضحه و الرضاعه تسهل و تعرفين علامات الجوع
بنهايه الاسبوع الثاني راح تجي طفره نمو
و راح يبدي الطفل يرضع اكثر و تجي نوبات يريد يرضع كل ساعه او اقل
كل اللي عليك ترضعيه كما يطلب
و يسموها هاي الحاله
Cluster feeding
بالأسبوع الثاني همين لا تكعدين الطفل الا اذا مرت ٤ ساعات بلا رضاعه
احسن وقت للعب على البطن و تعليمه على
Tummy time
هو الآن
ابدي انت اكلي زين لان الحليب راح يزيد و إنتاجه يزيد و اشربي الكثير من الماء
لا تنسين تغلقين الاضويه مثل ما سوينا بالأسبوع الاول
الاسبوع الثالث
الطفل راح يبدي يكون نشط اكثر و يقل النوم
المشكله تصير انه بعض الاطفال يصير نشاطهم ليلا
لذلك مهم جدا نعلم الاطفال على الليل و النهار من خلال الضوضاء و الضوء
من نصبح الصبح نفتح الاضاءه و نفتح الستائر و نتحدث بصوت واضح بين بعضنا
اغفاءات الصباح خلي تكون بغرفه بيها ضوء و ضوضاء
يعني بالصالة او اي مكان تجتمع بيه العائله
اما نوم الليل فيكون بغرفته بفراشه بعد مساج او تربيت او اغنيه او ضوضاء بيضاء بدون ضوء اهم شي
ملاحظات الاسبوع الثالث :
النوم يقل قليلا ليكون حوالي ١٦ اسبوع
لا توقظ طفلك للرضاعه و اتركه ينظم رضعاته بنفسه
اطفال اعرفهم هنا يبدون ينامون الليل بطوله او نصفه
اذا جيكت الوزن ويه طبيب الاطفال و كالك لا تكعديهم لا تكعديهم
أطفالي من هذا النوع اللي ينامون الليل بطوله من هذا الأسبوع
و الكثير من الاطفال هذا وضعهم ماكو اي داعي للقلق اذا تطمنت بخصوص الوزن ويه طبيبك
اعرف جيدا ان ما ذكر ممكن يكون ما يتطبق على طفلك بس مطبق على اخرين و ماشيه الأمور
نكمل بعد؟


د. سيف سمير البياتي اخصائي طب الاطفال باز کردن / نظر دهید

2023-01-23 22:28:19 عندي بنيه صغيره عمرها ٤ سنوات الا شويه
تصعد لغرفه صغيره مخليها بالبيت
بيها مجموعه العاب
تصعد على المكنسه الكهربائيه على اساس هي حصان طائر
و ساعه تشيل الموزه و تخابر بالموزه صديقتها او صديقها
و ساعات تضحك على نفسها و ساعات تضحك على صديقتها
مجرد متابعتها لساعه وحده هي تعب حقيقي
من كرسي لاخر
لطاوله لأخرى
و كل شويه اخ اوي تعورت اني
ما تعرف الخطر و الأمان
و تقفز من أعلى مكان
و تحب تلعب هوايه
و اذا لكت علبه مكياج هاهيه سلملي
و الحمد لله بيتي صغير و ما بيه حديقه و الا الطين ترس البيت !
اكول لا ما يفيد
امها تكول لا ما يفيد
و مصره على انها صغيره و انه هي صح و انه احنا خطأ
نجي نشرح ليش هيجي تتصرف ؟
هي تعرف كل شيء و تعرف الالوان و تكمل محاوره كامله و تكمل جمله و تحجي قصص بالتفصيل و تعرف اسمها و جنسها و عنوان سكنها
زين ليش هذه التصرفات؟
الكل راح تجاوب انه هي صغيره طبعا بعدها
و بعدها ما تفهم شنو الموضوع
الجواب بين صح و خطأ
صح صغير بس مو معناه عقله مو كامل
بس معناه ان هو إنسان مختلف بتلقي المعلومه و ترجمتها
و ماله واهس يعرف كيف وجهه نظر الاخرين بيه و بتصرفاته
لو فهمنا هذه الجزئيه بالاختلاف لفهمنا اتهاماتنا الخطأ لاولادنا إنه هم عنيدين او قليلين ادب و اللي يعرضهم لعقاب اما جسدي او لفظي
خليني اضوي الموضوع اكثر
الطفل يشوف التصرف من وجهه نظره فقط و متصور إنه اللي داير مدايره نفس الشي يشوفوه
و هذا يسموه Egocentric
يعني ماله علاقه بالاخر
يعني من ياخذ قلم الكحله مالتك و يلون بيها المرايه يشوفها إنه هذا فن عليك تقديره
و ما راح يفتهم ابدا و لا راح يقدر إنه ليش تعيطين و تصيحين
و هذا نفس السبب من يوكع بيده قلم جاف راح يصبغ بيه الحايط ثاني حتى لو ملختي نفسك من العياط
لان بنفسه يكول هاي شنو الاوفره قابل شسوينا!
هو مو مؤدب و لا يعاندك و لا عاجبه يكسر كلامك
هو مجرد مدا يعرف ليش انت دا تبالغين
لا تنسين ابدا انه تفكيره بهذه المرحله يكون خيالي و يتخيل المكنسه حصان و الموزه تلفون و الكارتونه بيت و لذلك ما راح يفهم اصلة اي تداعيات لأي شي و هذه هي حياته
يضاف إلى ذلك رغبه جامحه بالتعرف على الأشياء من خلال حواسه الخمسه لذلك يكون اسئلته كثيره و حركته اكثر و حوادثه اكثر
طيب دكتور إلى عمر يبقى Egocentric؟
يستمر بهذا الفهم من عمر سنتين إلى عمر ٧ سنوات
و بعدها يبدي يفكر بطريقه منطقيه اكثر
و يهتم لمشاعر الاخرين اكثر
إلى أن يوصل لمرحله النضوج بعمر ١٢ سنه و اللي بيه يشبه الكبار و يشبه خيالاتنا الواقعيه اكثر

مختصر مفيد
لغايه ١٢ سنه الطفل راح يتعلم و يتعلم و يتغير بطريقته و تصرفاته و كلشي بيه
احنا لو عرفنا كيف يفكر فتأكد راح نكبر شخص سوي محترم و عاقل
ننطيه مساحه يجرب و يتعلم و يلون و يشخبط و يقذر نفسه
و احنا نعلمه بهذا المشوار و نفهمه و نعيد و نزيد و نكرر
اي راح تعصبين
و اي راح تغضب
و اي راح ننفعل
اي احنا بشر و من حقنا
بس حاول قدر الإمكان تبعد غضبك عنهم و ترجع تفهم و تشرح و تخلي بعقلك جمله وحده ( كل ما راح تتعامل بعقلانيه ويه الامور كلما راح يكون الطفل اكثر تفهما و تقبلا و ردود فعله أكبر من عمره )
#إعرفوهم_صح_علمود_تتعاملون_وياهم_صح
#مراحل_تطور_مو_اكثر
#حاول_تفهمهم
د. سيف سمير البياتي اخصائي طب الاطفال باز کردن / نظر دهید

2023-01-19 00:51:33 بس لا تستعجلين بتغيير الحليب !
من أهم التوصيات اللي تخص الحليب انه لا تستعجلين بتغيير الحليب من نوعيه إلى أخرى
او من شكل لآخر
يعني اكو انواع حليب طبيه صحيح
بس من الطبيعي ان الطفل يصير عنده مغص
و من الطبيعي ان يصير عند الطفل ارتجاع
تعالوا نسولف عليها
اذا الطفل صار عنده مغص من الحليب
ماكو اي داعي لتغيير الحليب
فكل انواع الحليب تسوي مغص
اي اكو حليب خاص للمغص
بس اكو قطرات كوليف اللي حلت المشكله و صار ماكو اي داعي لتغيير الحليب بخصوص المغص
بالاضافه لفائدتها بزياده الوزن كونها تسهل الهضم
الارتجاع
40 بالميه من الاطفال عدهم ارتجاع
و هيج هيج راح تتحسن الوضعيه بعد الشهر السادس للتاسع و لو أحيانا تستمر لغايه سنتين
شركات الحليب هم سوت حليب مضاد للارتجاع
بس مشكلته شويه صعب بالحل و التحضير
الارتجاع كذلك ممكن التقليل منه باستخدام قطرات البروبايوتك في بعض الاحيان
لذلك لا نستعجل بالتغيير من نوع لآخر
ممكن تغيرين ضمن الشركه نفسها
بس لا تستعجلين بالتغيير


د. سيف سمير البياتي اخصائي طب الاطفال باز کردن / نظر دهید