2021-12-02 20:54:42
#الليالي_الفاطمية ( السيدة زينب والزهراء ع )
بحلامي بسمار . شاهدت انه او نار
يم بابي وامي . مطروحة تحتار
من نومي فزيت . او للباب انه امشيت
شفت امي تنحب . يم عتبة البيت
ثاري الحلم واقع . او محسن شفت واگع
يم عتبة البيت
ساعة وحدة . اعله المخدة
راسي خليتة ييمى او طيف اجاني
ابحلمي بسمار . وشاهدت نار
چنه واصلني الجمر يمى وچواني
من الحلم . فزيت انه . او گمت اركض اعله الباب
شفتچ صدگ . يم عتبته . مطروحة ماكو احجاب
شفتچ عله الگاع . مطروحة كل ساع
او لاحيدر اهنا . اتمديلة الذراع
ياوسفه عصروچ . او يايمى دفعوچ
ابكل حيلة يدفع . ابيا ونه خلوچ
دمچ شفت طابع . او محسن شفت واگع
يم عتبة البيت
_____ابحلمي شفتچ . يم عتبتچ
طايحه او محمره عينچ يالزچية
او دمچ ايسيل . امهدمة الحيل
وآنه الچ يافاطمة مديت ادية
رت احملچ . يمى العلي . وايطلع البسمار
من الصدر . من الجمر . بسمارچ اعرف حار
گتيلي عوفيه . لا لا تشلعيه
بسماري بالروح . يالحرة عوفيه
لا لا تناديه . حيدرنه تركيه
لو صدني يحتار . ما ريد أذيه
حيدرنه ليباوع . او محسن شفت واگع
يم عتبة البيت
_____وجهچ اصفر . جفنچ احمر
امورمة إمن السطرة عينچ شاهدتها
ابصدرچ اجروح . او دمچ ايفوح
او چلمة وحدة فضة سنديني اسمعتها
جيبي العصا . اعليها انتچي . يافضة أسمع زين
وآنه انظرچ . ازغيرة عمر . واعله العصا تمشين
جيبيلي عصاة . اعليها آنه ساعات
أتچه يمى . من امشي خطوات
كل صدري موجوع . مكسورة الضلوع
جيبي الچفن وين . يافضة واشموع
ياموت اللي سارع . او محسن شفت واگع
يم عتبة البيت
_____اسمعتة محسن . گاعد ايون
يمى بالباب انكسر گلبة اعله وضعچ
ابگلبة هضمة . او ناده يمى
خل اموتن والمهم بس يشفة ضلعچ
محسن صرخ . يالوالده . مسحي ابدموعچ هاي
قبل الأجل . فاطم ردت . من ايدچ اشرب ماي
ظل محسن ايگول . منچ دللول
قبل الأجل راد . محسن دللول
لتهلي دمعات . لو محسنچ مات
لو گلچ إحسين . مات الولد مات
صوت امة ماسامع . او محسن شفت واگع
يم عتبة البيت
____ابآخر الطيف . يمى ياحيف
شفت ابوية ايغسّلچ هاي النهاية
وشفت الحسين . ابدمعة العين
شابگ احجابچ ييمى والعباية
ناده العلي . عوف الچفن . لتلفها أمي انوب
إتعودت . انظرها انه . يا والدي ابهالثوب
متعود اهواي . تحچي امي وياي
كل ساعة حيدر . تلزمها يمناي
ياوسفة تابوت . ايشيل امي بسكوت
معقولة أمي . تحت الثرى اتفوت
ليهسه ما قانع . او محسن شفت واگع
يم عتبة البيت
___ثاري طالع . حلمي واقع
اتحقق الطيف الذي شفتة ابمنامي
لومه فزيت . ابحلمي وابقيت
چا وصلت الكربلة او حلمي ابخيامي
لومه اگعدت . من نومتي . چان احلمت بحبال
چا شاهدت . خيل او جمر . او بين الخيام اطفال
چا شفت الطفوف . چا شفت الچفوف
مرمية عالماي . واعليهن انطوف
چا شفت الحسين . ماعنده إيدين
والخنصر ايموت . وابروحي جرحين
حتى الصبع ضايع . او محسن شفت واگع
يم عتبة البيت
حيدر الحلفي
383 viewsedited 17:54
ا
