2022-01-10 13:29:41
#أم_البنين_ع_
خذه روحي إحسين . يا ملك الممات
وانه من ازمان .. فارگت الحياة
خلصته عمري بس جسد . ماعندي روح او لا ولد . من عندي اشتاخذ بعد
خذه روحي إحسين
اعتذرلك .. يالمعتني او جاي انته تاخذ روحي
اعتذرلك .. ما تلگه عندي بس الم واجروحي
اعتذرلك .. واسمع يملك الموت وني او نوحي
اعتذرلك .. روحي انته تلگاها ابگرب مذبوحي
ماعندي روح او لا وطن عدت سنين
محبوبي اخذ حتى الهوى او حتى الحنين
گضه عمري ابآه .. وماظن استراح
وانه وحدي ابقيت .. من محبوبي راح
كل عمري خلصته ابحزن . او شاغلي بالي هالأبن . كل مغربيه ليه احن
خذه روحي إحسين
____
روحي عنده .. خذها او بعد ماظن تعود ابجسمي
روحي عنده .. يمه يملك الموت لا مو يمي
روحي عنده .. بس حبه هسه باقي يسري ابدمي
روحي عنده .. وام البلا روح آنا جن صار اسمي
جان اسمي تعرف يا ملك ام البنين
ومن خذها روحي اسمي صار ام الحُسين
انه ام الراح .. صوب ارض الطفوف
خذه عيني إحسين .. وما خلاني اشوف
بغيابه ماشوف الدرب . ماعندي عين او لا گلب . صبح ومسه دمعي يصب
خذه روحي إحسين
___
لا تدور .. صدگني بس دم او جسد ظل بيه
لا تدور .. ما تلگه بس اضلوع الي محنيه
لا تدور .. تعبتك ادري او روحي مو بيديه
لاتدور .. في كربله صدگني صارت هيه
تلگاها روحي ابكربله فوگ التراب
الف او تسعمية جرح بيها او مصاب
على خد الگاع .. نامت مو حرام
وبقى بيها السيف .. نايم والسهام
تلگاها روحي اعله الرمح . لازمها جف شايل ملح . يلجمها كل طلعة صبح
خذه روحي إحسين
____
اخذه مني .. هذه الجسد وابدال روحي اعتبره
اخذه مني .. او ودي يملك الموت لبن الزهره
اخذه مني .. او نزله انته من تنظر جسد بي حفره
اخذه مني .. او خلي يملك الموت يشبگ صدره
خلي جسد يشبگ جسد في كربلاء
لو حتى ميتين ارد اشم ذاكى الرداء
على جنحك ريت .. تاخذني او تطير
وابأرض لطفوف .. ننزل بالأخير
لا ما اتيه ريحته . اشتمه حتى ابنومته . محبوبي واعرف جثته
خذه روحي إحسين
_يمه خلني .. بيديه الملم جثته المتگطعه
يمه خلني .. اذرف على اشفافه فقط جم دمعه
يمه خلني .. ابحث يملك الموت بس عن صبعه
يمه خلني .. انحبله واقراله واون او انعه
احرسها جثته لاتجي يمه الخيول
وبلكت اشاهدها تجي الزهره البتول
ومن يجينه الليل .. افرشله الثياب
ابني صعبه شلون .. يغفه اعله التراب
لو عندي روح افرشها اله . هو او عياله او كل هله . وازرع ورد في كربله
خذه روحي إحسين
_
تلگه
روحي .. انته ابحضن طفله تون ملجومه
تلگه روحي .. ابجفها رقيه حايره او مهمومه
تلگه روحي .. ابراس الي سلبوا ويلي حتى اهدومه
تلگه روحي .. عد سكنه لو عد زينب المظلومه
وسط الخرابه تلگه اطفال او نساء
فوگ الهزل من الصبح حد المساء
عله ذيج النوگ .. دور تلگه روح
ويه راس إحسين .. عطري اهنا يفوح
روحي اويه روحه تنجمع . وني اويه ونه ينسمع . نفسي اويه نفسه ينگطع
خذه روحي إحسين
حيدر الحلفي
33 views10:29