2022-04-20 19:34:42
ياجرح فكَد الابو امرافكَ خيالي
بويه والله صورتك دوم اعله بالي
ما انامن ليلي بعدك ما انامه
يالرحت بويه آنه اوعدك ما انامه
ـــــــــــــــــ
بين هاذي وهاذي اعيوني اربيّه
شما اديرن عيني ترميني الرزيه
شما اصد للباب اذكرهه الزجيه
ولو شفت محرابه دمعاتي جريه
فجعني الدهر ...بعلي أمن انطبر ..صار الجرح جرحين
جرح فاطمه ... علبابي الدمه .. صوّب دليلي البين
يومي نفس الامس نفس المصيبه
صدر ينزف دمه وشيبه خضيبه
جنت ليلي ادعيه يرجع بالسلامه
يالرحت بويه آنه اوعدك ما انامه
ـــــــــــــــــ
زينب آنه المارحم بيّه زماني
حسرتي اعله اهلي غدت تجوي بلساني
ليش ابوي الراح عني ماخذاني
الكَالي يازينب اكسيج ابحناني
وحيده صرت ...بغيابه متت ..موحش اشوفه البيت
ينبض الكَلب .. يريت آنه اطب ..بنفس الكَبر ياريت
بعده يوم الرحل شلّي بحياتي
غالي عندي واخذ كل امنياتي
والله موحش داري من جل بي ضلامه
يالرحت بويه آنه اوعدك ما انامه
ـــــــــــــــــ
بحيره محتاره وصفت جمره بضلوعي
مدري انشف ادموع اخوتي لو دموعي
الليله وحشه وبالحزن اعلكَ شموعي
لوعي يازينب صحت عالوالي لوعي
لطت الوجه .. لوين اتجه .. ودهري اليّه اشضام
شلت ياجمر ... وأنه امن الزغر ... وتكفّليت ايتام
بعيني شفت الحسن شابكَ على حسين
بلا شعور وتضل دم تهمل العين
تدري بي ما ينحمل ليل اليتامه
يالرحت بويه آنه اوعدك ما انامه
ـــــــــــــــــ
يلّي بيك آنه اعرفت عزّي ودلالي
بويه صار المغرب ودمعي يلالي
يمّي اخوتي وآنه حال الضيم حالي
ياعلي بويه مجانك والله خالي
اصد غرفتك .. وعلى اعمامتك ..واركض اشمهه ابنوح
الجرح ضل اثر ... ينور البصر .. ياوسفه عنّه تروح
عمامتك بيدي انه احطهه بعتبة الباب
يلتقي دم العليهه بدم الاعتاب
واحجي وي ليلي اليمر دوم ابملامه
يالرحت بويه آنه اوعدك ما انامه
ـــــــــــــــــ
ياهو ون ونّي ومنو المر بعذابي
آنه بجّيت السمه ابدمعة مصابي
من امّي لاخر موتي سود اتضل ثيابي
بس دموع وحسره مكتوب ابكتابي
اليفاركَ هله ..بحياته شله ..ضل موته يتمناه
سنين اليتم .. مناحه وهظم ...والحسره والويلاه
يمسح ابروس اليتامه والدي جان
ومنهو يمسح راس اخوتي يابو الاحسان
جنّه ليل امصيبتك ليل القيامه
يالرحت بويه آنه اوعدك ما انامه
ـــــــــــــــــ
هاي قصه اتسولفت من امّي اليّه
هيّن الشفته اليجي اصعب عليّه
كل جروحي اتهون يم الغاضريه
وعكَب اخوتي اعله الهزل امشي سبيه
يطيح العلم ... تشب الخيم ...وتهجم علينه الخيل
ودمعتي تهل .. ونياك الهزل ...عرجه بحرمنه اتميل
الما نظر واحد خيال بذيج الازمان
حرمه مجتوفات اديه واطب ديوان
بالخرابه ليلي ضل يترك علامه
يالرحت بويه آنه اوعدك ما انامه
ـــــــــــــــــ
الشاعر محمد حسن ضيغم
1.5K views16:34