2021-12-29 00:41:36
لطفِ اظہار ہے لفظ و بیاں سے آگے--------------------
اصلاحی مجلس کے بیان کا خلاصہ:
*اتوار مورخہ21 جمادی الاول 1443ھ بمطابق 26 دســــمبر 2021،
*شیخ الاسلام حضرت مولانا مفتی محمد تقی عثمانی صاحب مدظلہ العالی
اس بیان میں حضرت والا نے ایک مسنون دعا کے چند جملوں کی تشریح فرمائی، پہلے : *’’اللھم لاتجعل الدنیا اکبر ھمنا...‘‘* کی تشریح کرتے ہوئے فرمایا:
اکبر ھمنا کا مطلب ہے کہ ہمارے اکثر خیالات دنیا سے متعلق نہ ہوں، اس میں ہماری رعایت کی گئی ہے۔ورنہ تھوڑے بہت خیلاات تو آہی جاتے ہیں۔فرمایا: ایک مومن کا کام یہ ہے کہ وہ دنیا میں رہے، دنیا کے حقوق ادا کرے لیکن اس کی اصل فکرآخرت ہو۔ یہاں پر تقویٰ کی تشریح بھی فرمائی اور غفلت کی زندگی کا نقصان بتایا۔
دعا کے اس جملے کی تشریح سابقہ بیان میں مفصل انداز میں فرما دی گئی تھی، اس لیے حضرت والا نے اس کے بعد والے دوسرے جملے *’’ولا مبلغ علمنا‘‘* پر مفصل گفتگو فرمائی۔ مبلغ علمنا کا مطلب بتایا کہ ’’ہمارے علم کی رسائی صرف دنیا ہی تک محدود نہ ہو۔‘‘
اس کے بعد علم کی طلب،علم کی اقسام وغیرہ پر بات کرنے کے بعد *’’ایک بڑی اہم بات*‘‘ ارشاد فرمائی؛ اور وہ تھی قرآنِ کریم کی آیات سے دنیاوی مقاصد حاصل کرنے کی روش....اس پر حضرت نے بڑے ہی مفصل انداز میں گفتگو فرمائی اور آجکل لوگوں کے وظائف اور تعویذ گنڈوں کے پیچھے پڑ جانے اور اس علم میں اشتغال کے حوالے سے فرمایا ’’خوب سمجھ لو دنیا کی غرض سے قرآنِ کریم پڑھنے پر تلاوت کا ثواب نہیں ملتا۔‘‘
پھر اس حوالے سے حضرت گنگوہی رح کے دو دلچسپ واقعات سنائے اور فرمایا: *’’ایک مسلمان کیلئے سب سے بڑا وظیفہ اور تعویذ نماز اور استغفار ہے‘‘۔* اور نماز و دعا سے مشکلات اور پریشانیوں کے حل پر کئی پہلووں سے گفتگو فرمائی....
علاوہ ازیں قرآنِ کریم کے نسخۂ ہدایت ہونے، علمِ تجوید کی اہمیت و خصوصیت، دعاؤں کی ضرورت، قرآنِ کریم کی تفاسیر پڑھنے کی اہمیت اور دیگر کئی موضوعات پر گفتگو فرمائی اور ایک شعر پڑھا کہ
کوئی جو نا شناسِ ادا ہو تو کیا علاج
ان کی نوازشوں میں تو کوئی کمی نہیں
نیز حضرت نے فرمایا کہ جب دعا مانگنی نہ آئے تو بس ہاتھ اٹھا کر اللہ سے کہو کہ مجھے مانگنا نہیں آتا، بن مانگے عطا کردے،اس پر اپنا ایک شعر بھی سنایا کہ
درگہِ حسن پہ ٹوٹے ہوئے لفظوں پہ نہ جا
لطفِ اظہار ہے لفظ و بیاں سے آگے
---------
خلاصہ یہ کہ سارا بیان ہی اہم اور سننے لائق ہے۔
___________________*Link:*
█▓█ *معارف عثمانی* █▓█
28دسمبر 2021
30 views21:41