2021-07-28 00:02:17
مكان مِن الأحلام .. في حوش نعرف تفاصيله كويس
دار صغيرة، على حيوطها مكتبة كبيرة، موسيقى هادية، على طرف الكرسي كِتاب وشال ومخدتين، جنبه نبتة تعرفني كويس وأني (نحبها) هلبا
تتفكر قصتها ؟
كانت هدية (زعل) وترضاية (دلع)،
ويامكثرهم الأتنين فيا.
نبتة صغيرة، قداشها شهدت عَلينا وسمعت حكايات،
قداشها راقبتنا وتأملت حاجات، قداشها حَبتنا وحفظت ذكريات.
لونها الأخضر الي راكب على الأتات زي أهم (قطعة) مِنه،
أسمها المميز وطريقة الإعتناء بيها الي تعلمتها بوفاء
كأنها بيبي أني مسؤولة عليه، حُبي الواضح ليها، وقربها الباين مِني.
(كِيف حد يحب نبتة للحَد هذا ؟) في حديث بيني وبيني سألت روحي، (لأنها مِنك) أكيد أكيد لأنها مِنك، أني ديما نحب كل شي
يجي منك بزيادة على العادة .. يا عادتي المبهرة وروتيني المبهج.
مكان بعيد عليا قريب في خيالي .. (شتي) ومطر
برا زايدة لذة الدفي، (الدفي) الي معرفتاش الا في قربك،
(قربك) الي نموت فيه أكثر مِن (الكرسي والنبتة).
- نُـورا نصـر
372 views21:02