2021-07-27 00:07:49
اللقاء هالمرة مِش فشارع مع طاستين قهوة وطقس مصقع.
أفتح صفحة جديدة مِن الأيام وتعالى نأخدك مشوار في أغنية،
مبدئيًا غمض عيونك .. " فكرك ليش بصفن فيك ؟ " ..
لأني نحبك مِن غير ما نغوص هلبا في تفاصيل الأمور، مِن
غير مايأخد حبري على الكلام لأن إنهماره لما تنجاب سيرتك
واضح لكل مِن يقرأ، مفضوح لكل مِن يحس.
"من دونك بحس إني ضعيف بأوقع من الهواء الخفيف"
إعتراف صغيرون؛ أني مِش قوية الا بحضورك، مِش مسيطرة
الا لما بعد كل تنهيدة نتفكر إنك معاي، أني مِش شاطرة
وبطلة وقادرة كل شي الا لأنك هني.
"لسة بابي مفتوح، لسة عِطرك بيفوح"
حيقعد ديما مفتوحلك زي حضن صاحبه يحبك هلبا،
زي حوشكم، زي ليبيا، زي غريان .. مفتوح برِقة بالغة مخلي
كل مِن يمر قدامه يعرف كويس أنه 'يستنى في حد مِش زي أي حد'.
"كل يوم أصعب مِن إمبارح"
لكن أنتَ بسلاسة قادر تسهله، قادر تأخد كل خوفي بخفة
وتطمنه، زي صندوق الأمان، زي سترة النجاة، زي الحُب.
الحُب الي مايسدوشي نصوص الي مينصفاش شعر ولا
يحصره نثر، الحُب الي برغم شطارتي الواضحة في الكِتابة
الا أنني منقدرش نكتبه بطريقة تسدك فحاولت نجيبهولك
في أغنية.
أغنية أسمعها وتفكرني ..
⁃ نُـورا نصر
718 views21:07