2021-05-04 08:59:47
#مامۆستا_قانع
#لەگەڵ_بولبول
#شێعری_ژمارە ۱۲۵
دیوانی قانع لاپەڕە ۱٨۶ــ۱٨۷
ئەی بولبولی بێ دانە، من و ئێوە هەژارین
هەردوو وەکوو یەک، مونتەزری فەسڵی بەهارین
تۆ چەشنی من و من، وەکوو تۆ بێ کەس و کارین
داماو و کز و دەربەدەری کووچەیی شارین
یا بەندی قەفەسخانە، وە یا وێڵی دیارین
من قوڕ بەسەری دەستی فەلەک، چەرخی جەفاکار
تۆ دڵ بەخەمی دەردی گوڵ و خونچەیی گوڵزار
من دەربەدەری فیتنەیی جاسووسی خەتابار
تۆ بێ پەڕ و بێ باڵی، لە دەس زوڵمی لقی خار
هەردوو بە یەکۆ چاکە بڵێین، دیل و هەژارین
تۆ شێتی دڵ و من هیوای بەرزی وڵاتم
تۆ مەستی گوڵ و من بە فیدای عەزم و سوباتم
بەم جۆرە ئەڕۆم، شەرتە هەتا ماوە حەیاتم
تا دەس نەکەمە گەردنی ئاواتی نەجاتم
ڕووم نایێ بڵێم زادەیی شێرانی شکارین
من ، شیوەن و گریان و ئەتۆ شۆر و تەرانە
تۆ بەزمی سبەینان و منیش ئاهی شەوانە
من ، بۆ وەتەنی بێکەس و تۆ دانە و لانە
بنواڕین لە بۆ سووڕی کەچی چەرخی زەمانە
بێ سوچ و خەتا ، بۆچی وەها بێ بەشی یارین
ئەی بولبولی هاودەردی خەفەتباری دەرون ڕێش
تۆش هەروەکوو من ، بێ کەس و بێ یاوەر و بێ خوێش
هەردوو ، وەکوو یەک پەست و بریندار و جەفاکێش
کەی بێ کە برینی دڵی هەردوو ببێ ساڕێش
بێ باک بڵێین ئێمە لەناو گێتی دیارین
[قانع] من و تۆو ، بلبل و خەم ، چەشنی برابووین
بۆ یەکتری ئەم چوارە ، تەواو پشت و پەنابووین
هەریەک ، لەبۆ ئەو سیانی ترە ، زۆر بەوەفا بووین
بۆچی من و خەم؟ ئێستە لە ئەو دوانە جیابووین
بولبول لە گوڵ و، گوڵ لە چڵ و، ئێمە لە خارین ؟
قانع
73 views05:59
ش
