2021-04-30 09:16:27
شەوەو هەستم چراخانە بە جۆرێ
مەلی ڕۆحم لە لاشەی دا دەتۆرێ
دەمت نۆقڵە و بە شیرینی دەبم لاڵ
وەرە با دڵ لە دڵ هاڵێ و نەگۆڕێ
شەوە عەتری هەناسەت دێ بە رەو ڕووم
لە کازیوەی بەیان دەرکەوت بەروو بووم
من و ئاهی سڕ و ساردی بە بێ تۆ
بە باهۆزی وەریگێڕان خدە و خووم
لە لا من شەو هەواری شێعرە بێ تۆ
گوڕەی هەستی بەهاریمە لە سەرخۆ
دەبزۆێنێ خەیاڵ و مەست دەبێ دڵ
وڕ و کاسم لە عەزرەت هاتنی تۆ
لە لای من دوو سەری یاری قەپاتە
خەیاڵم بوو ، ئەویش دیلی وەفاتە
وەرە سەر فەڕشی برژۆڵی دووچاوم
هەتا تیری حەسوودانت نەهاتە
شەوی کورتی بەهارە و دڵ پڕە لێت
هەتا تۆ دێی ئەویش دەگری و دەسووتێت
بە تاسەی جووتە لیمۆت تا بەیانی
سەرم خستۆتە بەر حوکمی دەس و پێت
سەرم چێ دڵ لە لای تۆ هەر دەمێنێ
زەکاتی ماچ لە لێوانت دەسێنێ
شەڕی ئەمن و دەروونم بەردەوامە
شەماڵ گەر بێ ، هەواڵی نوێ دەهێنێ
قەڵەم تێغە، چەکی دەستە لە لای من
شەڕابی خەستە بۆ مەستی و سەفای من
نمەی بارانی وەرزی وشکە ساڵین
بەوە ئەلحەق پلە و نرخ و بەهای من
وەرە یارێ بە دیقی چاوی چاو پیس
لە ئەستۆکە دەس و مەیلت نەبێ سیس
دەسووڕێ ئاشە کۆنی چەرخ و هاکا
لە دۆڵیانەی خولی دا پاک و هەم پیس
چ ڕووناکە بە تۆوە کەپر و کۆزم
چ سەربەرزم لە نێوان خێڵ و هۆزم
ئەتۆ بی شام لە موڵکی هەر دوو لاوە
مەپرسە قەت لە ڕەنگی ڕیشی بۆزم
غەفوور کەسنەزانی
35 views06:16