2022-02-22 22:26:27
قصيدة بحق مولانا الإمام المسموم
#الكاظم عليه السلام
تشييع عدنا انشيع الكاظم
غمضت عينه اوعالجسر نايم
اي وا اماماه ..... اي وا اماماه
وين النشامه اتجمعوا الليله
الكاظم غريب ومنهدم حيله
الجسر الرصافه انروح نمشيله
جسمه انشمر ظل بزناجيله
ويلي عليه.......امسنسله الظام
تشييع عدنا......انشيع الكاظم
اي وا اماماه ..... اي وا اماماه
.............................................
مشمور نعشه اوفوگه العمامه
وبس الرضا یتلوه گدامه
بویه يبويه ایصیح وآلامه
اتهد الصخر ویدگ عله الهامه
ممرود چبدك.......يافخر هاشم
تشييع عدنا......انشيع الكاظم
اي وا اماماه ..... اي وا اماماه
.............................................
يكسر الخاطر نعش إبن جعفر
وين اليريد ايفوز خل يحظر
يشيع امامه وعالنعش كبّر
خل ننصب الچادر عله المعبر
وندگ صدرنا...... والدمع ساجم
تشييع عدنا......انشيع الكاظم
اي وا اماماه ..... اي وا اماماه
.............................................
هزوا البيارغ لبن الكحيله
ابعرضه وبهوسات نمشيله
وي الرضا ماتم نسويله
ونشوف چم گید ابمفاصیله
والگید ماخله......عظم سالم
تشييع عدنا......انشيع الكاظم
اي وا اماماه ..... اي وا اماماه
.............................................
یالساجنه چالیش سمیته
یتلوه بالتربان خلیته
یتمت بزره ومات تالیته
ماعنده سایه من تعنیته
بالسم رویته.......وبالسجن صایم
تشييع عدنا......انشيع الكاظم
اي وا اماماه ..... اي وا اماماه
.............................................
خلص حیاته ومضی ابطاموره
مامر عله اهله ولاوصل دوره
میت ومتنه اکسور مکسوره
ولاواحد الیوصله وایزوره
واشگد صبر.......بس ربك العالم
تشييع عدنا......انشيع الكاظم
اي وا اماماه ..... اي وا اماماه
.............................................
*تمت*
العمل مهدى إلى مولاي صاحب الزمان عج
*ام علي رضا الشريفي الحسيني*
نسأل الله تعالى القبول والتوفيق وحسن العاقبة
https://t.me/umAliridasharify
https://t.me/umaliridashrify
146 views19:26