2021-07-23 15:28:27
البارت 29
~~~~~~~~~~~~~~~~~~~~~~
هم تدرون ؟
تدرون الحزن يمته ؟
من ناسك يسالونك على الـ ردته
من عمداً يحاچونك بسالفته
الفشلة تفيض
چي مامش جواب خلاف
فضت عافني وعفته ..
~~~~~~~~~~~~~~~~~~~~~
جمارة /
: عمي بنتكم جماارة ماتروح لغريب اني ابنه عمه اوله بيه و انهي عليه ...
فتحت عيني بقوووه كله ظلت بتاووعلي
امي : دهررر شيريد هذاااا شنو ينهي ...
اني واكفة مصدوومه هذا شيحجي دخيلك ربي
اني بحلم لو بعلم شصااير ..
غساان بحده : شنو هذا الأسلوب غيث عيب احنه
وين كاعدين ..
: ماكو شي اسمه عيب واني ماسويت غلط بنت عمي
واريده الي اني اوله من الغريب لو تردون تردوني
وتفضلون الغريب عليه ..
كال أبوي :طبعا ما نفضل الغريب عليك وانت اولى
بس مو هيج تجي ترى عدنه بيت تجي وتحجي ويانه
ولا هيج تريد تشهرنه انت ..
: آسف عمي بس من سمعت هذا اجه وخطب جمارة
اني ماظل عقل براسي حتى اهلي مايدرون هيج سويت ..
: شووف اني راح انطي القرار لبنتي ماكدر اجبره على شي ماتريده حتى لو ابن عمه انت بس يبقى
القرار الاول و الأخير الها لأن هذا زواج مو لعبة ..
سكت غيث شوية رجع كال : ميخالف مثل ماتكول عمي وهذا راسك احبه واعتذر على السويته ..
اجه بااس راسه ومشه حسيت الجو هدئ
سمعنه صوت خطواتهم اجوو دخلو للبيت وغسان معصب من الي سواه غيث بس شهااب هادئ و لا كأنو صاير شي ..
امي اقترب من أبوي وكالت : هذاا شيريد وشعنده ..
كعد علر القنفة أبوي و كال :مثل ماسمعتي الولد خطب جمارة مني و ماقبل تروح للغريبة ..
كالت أمي بأستنكار : يااا وهذا اكو واحد عاقل يخطب هيج بس والله هم بيت سلمان كلهم مسودنين
انت نسيت سوايت جويريه ..
باوعنه على شهااب سكت ماحجه شي خزره أبوي
وكال : مالنه دخل بهاي السالفة هسه احنه نحجي بسالفة جمارة و غيث ..
امي حجت : وشنو بس لا تريده توافق عليه ..
: يي وليش لا أبن عمه اولى بيه عاد نعرفه ونعرف اطباعه بس كلت القرار الاول لجمارة اني مااغصبه على اي شي و هيا تدري كلش زين ..
رفعت حاجبه امي : يعني عادي عندك اذا توافق ..
: والله افرح اذا توافق عليه ..
عصبت امي : شنووو واني مااقبل انطيه لغيث
نسيت شسوت اخته وشلون فشلتنه و جابت الحجي النه و كسرت بكلب أبني هسه تريدني على الجاهز اقبل و اكللهم هاكم اخذوو بنتي لا والله احرك كلبه مثل ماحركوو كلب أبني صح جنت ما قابله على الزواج بس هو اختاره ..
كام شهاب بعصبية : يمه شدخل هاي بهااي ..انتي نسيتي شنوو لو تردين اذكرج ترى لا تنسين اني عفته بيوم الخطوبة و اني كسرت كلبه وخليت الناس تحجي عليه و على اهله و هيا ماسوت شي غير حقه و اني وراه لحد ما تقبل تسامحني و تكلي مسامحتك بهاي الساعه ارتااااح و افرح ..
زهراء حجت بقهر : وكرامتك شهااب ترى هيج كاعد تنزل بكرامتك و ياريت هيا تستاهل ..
باوعله و خزره اني من يمي خفت كال بعصيية :
انعل أبوو الكرامة اذا هيج .. ترى اني ماسويت شي ينزل من كرامتي بلعكس بهيج شي اريد ارجعه
لان كرامتي من كرامة جوري و مارتاح الا من تسامحني ..
رجع كال وهو يباوعله : واذا جوري ماتستاهل انزل نفسي علموده لعد منو الي يستااهل !؟
اخذ ابنه وصعد فووك وعافنه صاار الجوو متوتر
ومشحووون ..
كالت امي :اني هذا الي عليه كتلكم غيث ما ياخذ جمارة ..
ابوي كال : مو بكيفج فهمتي ..
باوعلي و كال بحنية :بويه القرار الج و انتي بكيفج توافقين لو لا صح ابن اخوي وصعب اكله لا بس يبقى زواج وحياة طول العمر انتو الي راح تعيشونه بحلوه ومره و ماريد اجبرج وبعدين اتحاسب اذا صارت مشكله انتي وياه ..
هم و أنزاح على كلبي من سمعت كلام أبوي هيج
كتله :ماعرف بابا ..
كال : فكري وباجر رجعيلي الخبر ..
كام وراح لغرفته باوعتلي امي وخرزتني :وعلي يا جمارة اذا توافقين تنزلين بكرامتنه كلنه ..
صاح غسان بعصبية : يمه شكال أبوي هسه محد اله دخل غيره هيااا شو امشي جمارة معليج بيهم ..
كام هو هم كامت وراه زهره واخذت سما وصعدو فوك
بقت زهراء و امي الي بس تخزر بيه خفت اني
وكمت بسرعه وصعدت هم فوك لغرفتي ..
دخلت للغرفة وسديت الباب وراي كعدت على الجرباية
مامصدكه الي اسمعه غيث اجه و طلب ايدي زين
ليش شنو يحبني محد يسوي هيج غير الي يحب ..
ابتسمت واني اخلي ايدي على كلبي يدك بسرعه
حقه مامصدك اذا اني لحد هسه ما مستوعبه الي يصير
حلمي وحبي راح يتحقق ...
فجاءة وبدون سابق إنذار اجه ابالي كلامه (تكدرين تكولين تحدي )
اختفت ابتسامتي واني اتذكر الي صاار كله
غيث علمود يسوي الي يريده طلب ايدي مو حبن بيه
غمضت عيني و اني اريد اهدي بنفسي اووف
فتحت عيني و اني اخذت القرار الي لازم اسووي .
ثاني يوم كلنه كاعدين وابوي يشرب جاي واني كاعده متوتره المفروض هسه اكللهم بلقرار الاخير ..
باوعلي أبوي خله الاسكتان على الميز و كال بهدوء : هااي بوية فكرتي ..
هزيت راسي : يي بابا فكرت ..
ابتسم : وشنو قرارج ان شاءالله خير..
اخذت نفس و كلت بهدوء : بابا اني ماموافقة على هذا الزواج ..
1.1K views12:28