2021-07-25 14:32:33
البارت37
~~~~~~~~~~~~~~~~~~~~~~
سبحان من جمّعَ التوت والرمانَ
في خدِّ مليحةٍ تسرقُ الانظارَ
وسبحان من جعل القمرَ اثنانَ
أصبحوا في جوفِ جميلةٍ سكانَ.
~~~~~~~~~~~~~~~~~~~~~~
زهرة /
من تزوجت لهذا اليوم غسان ابد ما قصر وياي
بلعكس كان نعم الزوج الي عوضني عن كلشي
حبيت اهتمامه الي و حنيته عليه و خوفه ..
اول بداية زواجي حسبالي زواجي منه فقط علمود
سماا اربيه لا اكثر ..
بس بعدين اكتشفت غير حتى هو احس بنظراته
اليه وين ماروح و من اضوج يكلي امشي نطلع
مايحبني ابجي يكلي ماريد اشوف دموعج ..
اعترف اني بديت اتعلق بغساان صار هو سما
عائلتي الي ماكدر ابتعد عنهم ولا لحظة حسيت الله عوضني عن كلشي و انطاني هاي العائلة كلهم زينين وياي وناس طيبة ما الومه اسراء الله يرحمه من جانت فرحانة و تكلي احبهم لان همه يحبوني و مامقصرين وياي ..
صار عندي شعور اتجاه غسان هل هو حب أم إعجاب
بس المهم شعوور حلوو ..
بس هاي الاياام كام ينشغل و كلنه انشغلنه بحادث علي أبن شهاب كلش انقهرنه عليه و هم من صار زين و جابو يوميه خطار عدنه يعني ما الحك حتى اشوفه منا شغله ويرجع هنا يم الخطار يجي بليل ينام ويكعد الصبح ..
اني من اجيت هنا العائلة يوميه بسالفة يطلعون
واكثره بسبب شهاب و جوري تصير هذوله الاثنين بس يكابرون و هو واحد يحب الثاني ..
اليوم هم جان عدنه خطاار على الغده من مشو كعدنه اني و زهراء نغسل المواعين تعبت كلش من الصبح كاعدة و انكسر ظهري ..
اجه غسان من باب المطبخ الخارجي اجه من الشغل
باوع علينه و رجع باوع عليه ابتسم كال : السلام عليكم الله يساعدكم ..
ابتسمت اله و ردينه عليه : وعليكم السلام..
ردت اكوم كال : لا ابقي بمكانج اني صاعد ابدل و انزل ..
رجعت لمكاني و هو صعد فوك كملنه غسل مواعين وهاي زهراء بس ساكتة و تفكر مو على بعضه بس ماحبيت اسئله مالي دخل بيه ..
خلصت و غسان لحد هسه مانزل يتغده
كلت خل اصعد اشوفه شو طول بس لا نام عفت الي بأيدي و رحت صعدت فوك ..
فتحت الباب دخلت لكيته مبدل وكاعد على الجرباية و منزل راسه سديت الباب وراي ..
رحت عليه كتله : غساان ليش مانزلت ناكل مو كلت تبدل و تنزل ؟
ماحجه شي بقه بمكانه كاعد حتى مارفع راسه
كتله : غساان احجي ويااك شبيك ..
حجه بهدوء : يهمج شنو الي بيه ..
استغربت من سؤاله بس جاوبته : طبعا يهمني ..
بقه مدنك راسه بس كال : ليش يهمج شنو اني بلنسبة الج ؟
رفعت حاجبي : شبيك غساان شتحجي أنت..
رفع راسه عليه و وجهه احمر و عيونه مايتفسرن من العصبية ماشفته ابد كال بحدة : جاااوبي من اسئلج تجاوبين فهمتي ..
خفت من نبرة صوته و هم استغربته كتله : يهمني لأن زوجي أنت..
حجيت هيج وهو طفر عليه مثل المخبل اجه ولزمني من زندي بقووة : زوجج ولج تضحكين عليه أنتي؟
غمضت عيوني بألم كتله : ااا شبيك غساان..
دفعني عنه : تردين تعرفين شبيه مااشي..
رفع الصورة كبال وجهي كال : هذاا الي بيه و الي مخبلني ...
فتحت عيوني بصدمة من الي اشوفه صورة خالد و عد غساان شلون و منين اخذه ؟
كال بعصبية : هذااا منوو زهرة ؟
ماجاوبته ماكدرت و شجاوبه اكله هذا خطيبي و حبيبي شحجي و شأكول ..
فزيت من عاط عليه:جااووبي لا تسكتين .. هذا منوو؟
ولا تكولين اخوي لو شي ترى ادري كلش زين ماعندج اخوان ..
كتله بهدوء و اني بكلبي ميتة خوف منه : هذا مو أخوي..
رفع حاجبة و ايده الي بيه الصورة ترجف كال بعصبية
: إدري مو أخوج لهذا السبب سئلتج هذا منووو ..
غوركت عيوني و دمعة طاحت كتله بخوف
: افهمني غساان فدووة ..
صاح بعصبية :احجي وخل افهم ..
غمضت عيوني وظليت ابجي من صياحه خووف دب بكلبي و اخرسيت ماكدرت احجي ..
ابتعد من يمي و كام يصيح :عليش هذااا البجي احجي ولج لا تموتين كولي منو هذا الي بلصورة ..
مدنكة راسي ماحس غير لزمني من فكي بقوة ورفع راسي عليه صارت عيوني كدام عيونه الغاضبة ..
كال بفحيح : شتحسين من افتح الكنتور و اكله صورة محتفظة بيه زوجتي بصندوق اول مره اشوفه هاااا ..
ماحجيت شي رجع سئل : احجي منو هذا لا اموت والحسين ...
كتله بتوتر : اا هذا ابن عمي ..
باوعلي بأستغراب :ابن عمج شو مشايفه و شعده صورته يمج ..
بجيت و كتله بحركة : موو هو مااات ..
حجيت هيج وكمت ابجي من خوفي و هم على خالد
باوعتله هو يباوعلي مستغرب و رافع حاجبه بعصبية
من شافني هيج ..
كال بحدة : سئلتج شعده صورته و شنو علاقتج بيه احجي ولج ..
باوعت بعيونه و كتله بتوتر : مو هو جان خ خطيبي بس صاارت و مات هو بحاادث ..
اتسعت عيونه من حجيت هيج كال بهمس : خطيبج؟
هزيت راسي و ماحجيت اي شي بس دموعي تنزل
كام يقترب من يمي و عيونه عليه كال بحدة :من سئلتج كلتي ماعندي علاقه بأي شخص و اني اول واحد بحياتج .. مو هيج حجيتي لو لا؟
1.7K views11:32
ق
