إستشارة طبية

2022-11-04 00:43:32 82. في حال ابنك تقي يكون تنظيف البقعة اسهل
83. لا يحتوي على مواد مصنعة بالهندسة الوراثية
84. لا يحتوي على عوامل نمو اضافيه صناعيه
85. غياب الرضاعه الطبيعيه وجد أن لها علاقه بالإصابة بمرض التصلب المنتشر multiple sclerosis
86. أقل عرضه للإصابة الفتق المبني (غير معروف السبب)
87. أكثر تطورا و إدراكا
88. أكثر تطورا من الناحيه الاجتماعيه
89. أقل عرضه للإصابة بالتهاب المسالك البولية
90. يحمي الأم من ال أصابه بفقر الدم (لأن تنقطع الدوره الشهريه و يقل النزف)
91. أقل صرفا للنقود على مشاكل الدوره الشهريه بعد الولادة
92. تعزيز ثقه الأم بنفسها
93. أقل عرضه للإصابة بالتهاب العين
94. مضاد حيوي جيد في حالات الجروح
95. لا داعي للقلق من أنه تم إكتشاف ماده مفقودة في الحليب الصناعي و ستضاف لاحقا
96. عطر الأطفال اللي يرضعون طبيعي اطيب
97. الخروج اسهل و ريحته أقل بالرضاعه الطبيعه .
98. لا يحتاج إلى مواد للشراء من زجاجات ارضاع و قدور و غيرها
99. حليب الأم رب العالمين خلقه لهاي الغايه !!!!
#ملاحظه : الموضوع بالنسب يعني مو الا حمايه 100 بالميه أو أنه اللي ترضع ما يصير بابنها حساسيه أو ما يصير عدها ورم و إنما يقلل النسبة


د. سيف سمير البياتي اخصائي طب الاطفال باز کردن / نظر دهید

2022-11-04 00:43:32 99 سبب لارضاع طفلك طبيعيا:
1. توصي الأكاديمية الأمريكية لطب الأطفال به
2. الرضاعة الطبيعية تزيد التواصل بينك و بين طفلك
3. تشبع احتياجات طفلك العاطفيه
4. يعطيه الغذاء الأمثل
5. عدم ارضاعك طفلك تزيد فرص اصابتك بسرطان الثدي
6. الأطفال البنات اللذين يرضعون صناعيا أكثر عرضه للإصابة بسرطان الثدي عند البلوغ
7. معدل الذكاء أعلى عند الأطفال اللذين يرضعون طبيعيا
8. دائما جاهز و متوفر
9. يساعد على خروج ( العق ) الخروج الأسود اول ايام الولاده
10. يحمي طفلك مناعيا و يساعد على تطور النظام المناعي لطفلك
11. اسهل بالهضم
12. تساعد الرضاعه الطبيعيه على عوده الرحم إلى طبيعته بعد الولاده
13. يقلل من النزف اللي يحدث بعد الولاده
14. يساعد على تخفيف الوزن الزائد للأم المرضع
15. حليب الأم يلائم الطفل الخديج الغير مكتمل النمو أكثر من الحليب الصناعي
16. توصي بيه منظمه الصحه العالميه و اليونسيف
17. تحمي الرضاعه الطبيعيه ابنك من تقرح القولون Ulcerative colitis
18. تحمي الرضاعه الطبيعيه ابنك من تقرح الأمعاء
Crohn's disease
19. تزيد الرضاعه الصناعيه احتمال أصابه طفلك بالسكري من النوع الأول المعتمد على الانسولين
20. تقلل الرضاعه الطبيعيه حاجه الأم الانسولين
21. الرضاعه الطبيعه تعمل على تثبيت بطانة الرحم endometriosis
22. تقلل الرضاعه الطبيعيه خطر اصابتك بسرطان المبيض
23. تقلل الرضاعه الطبيعيه خطر اصابتك بسرطان بطانة الرحم
24. تزيد الرضاعه الصناعيه من فرصه أصابه ابنك بالحساسيه بمختلف أنواعها
25. تقلل الرضاعه الطبيعيه خطر أصابه ابنك بالربو
26. تزيد الرضاعه الصناعيه فرصة أصابه ابنك بالتهاب الأذن الوسطى
27. تزيد الرضاعه الصناعيه من احتمالية موت المهد
28 تحمي الرضاعه الطبيعيه ابنك من الاسهال
29. تحمي الرضاعه الطبيعيه ابنك من التهاب السحايا
30. تحمي الرضاعه الطبيعيه ابنك من الالتهابات التنفسية
31. الرضاعه الصناعيه تزيد من فرصه أصابه ابنك ببعض أنواع الأورام
32. تقلل الرضاعه الطبيعيه من خطر أصابه ابنك بالتهاب المفاصل الرثوي
33. تقلل الرضاعه الطبيعيه من خطر الإصابة بسرطان العقد اللمفاويه
34. تحمي الرضاعه الطبيعيه ابنك من الاصابه بالعشو الليلي و فقدان النظر
35. تقلل من خطر اصابتك بتنخر العظام
36. حليب الأم مريح للأمعاء
37. حليب البقر مخرش للأمعاء
38. الأطفال اللذين يرضعون صناعيا أكثر عرضه للإصابة بالسمنة في حياتهم المستقبلية
39. الأطفال اللذين يرضعون طبيعيا تقل عندهم نسبه الاصابه بالضيق القلبي التنفسي عند الرضاعه
40. تحمي الرضاعه الطبيعيه ابنك من الاصابه ببعض الفايروسات و البكتريا
41. يحتاج الطفل اللذي يرضع طبيعيا إلى فتره صوم أقصر قبل و بعد إجراء العمليه الجراحية
42. أقل أياما مريضه عن الأطفال الذين يرضعون طبيعيا
43. يزيد فاعلية اللقاح
44 أقل عرضه للإصابة بتنخر الأمعاء Necrotizing enterocolitis
45. مانع حمل طبيعي
46. اسهل من الرضاعه الصناعيه
47. مجاني
48 . الرضاعه الصناعيه غاليه و مكلفة
49. تكلف الدوله الملايين من الدولارات
50. حراره الرضاعه الطبيعيه دائما مناسبه
51. تحتوي الرضاعه الطبيعيه على النسب الأمثل من النشويات و الدهون و البروتينات
52. يعمل كمسكن و ملطف للطفل
53. يعمل كمسكن و مهديء للأم
54. طعمه يفضله الطفل أكثر من الصناعي
55. بصوره عامه يكونون الأطفال أكثر صحه
56. أقل عرضه للوفاة
57. أقل مراجعه للطبيب الأطفال
58. يحافظ على نقودك للذهاب للطبيب و شراء الادويه
59. تكلف الرضاعه الصناعيه البيئة 86000 طن من البلاستك و العلب سنويا
60. لا تحتاج إلى عبوات و تنظيف و تعقيم
61. أقل تلوثا للبيئة بسبب المعامل اللازمه لإنتاج الحليب
62. لا توجد حاجه للثلاجه
63. حليب البشر مخصص للبشر
64. مسكن الأم رهيب للطفل
65. يلائم طفلك عند المرض
66. يوفر نوم أكثر للطفل
67. يوفر نوم أكثر للأم
68. يوفر نوم أكثر للاب
69.لا يحتاج إلى مواد للخزن و الحفظ و التبريد
70. لا داعي للقلق من سوء التخزين
71. و لا مره اتهم الحليب الطبيعي بتسببه باعاقه أو وفاة
72. الطازج من الحليب الطبيعي ابدا لا يتلوث
73. ماكو داعي للسؤال (اي حليب هو الافضل؟)
74. ماكو داعي للخوف من الماء الغير معقم و اي نوعيه ماء أفضل
75. يساعد على نمو الأسنان و الفك بصوره أفضل
76. يحمي من الاصابه بالتسوس بنسبه أعلى
77. أقل صرفا للنقود على مشاكل الأسنان
78. قابلية تطور بالكلام أفضل
79. أقل فرصه للإصابة بالاكزيما
80. جلد الأطفال يكون أنعم
81. أقل نوبات ارتجاع باز کردن / نظر دهید

2022-11-04 00:41:33 شكد ياكل الطفل!!
السؤال الابرز حول كل الاطفال هو شكد ياكل الطفل و شوكت و كم و شنو النوعيه و غيرها
اتصور اني ما مقصر بالاجابه عنها كلها
هذا البوست عن شكد ياكل الطفل بالاعمار اقل من سنه
شهر بشهر
البوست طويل جدا
خلينا نتفق انه شهيه الطفل للاكل مو ثابته
و تتغير يوميا
و حتى تتغير باليوم الواحد
ممكن التسنين جدا يؤثر على شهيته
و المرض
انسداد الانف ممكن يؤثر
لا ننسى انه ممكن يكون منزعج لاي سبب و ما عاجبه ياكل
شون اعرف انه شبع الطفل؟
ببساطه اتبعي احساس طفلك من يرفض الملعقه التاليه خلص لا تجبريه عليها
اتبعي إحساسه
و تذكري دائما انه ادخال الوجبه او الاكله الثانيه صعب و ما ممكن يتم من اول مره و لا ثاني مره و لا ثالث مره و لا حتى عشرين مره
و على مدى شهر فانتظري و اصبري و ظلي حاولي
ما حب خلص لا تستلمين دخلي الوجبه بطبق اخر
مثل البيض بالمعجنات
و الفواكه باللبن
و غيرها من افكار الطبخ المختلفه
نبدا بسم الله شهر بشهر
.
.
قسم يقررون انه يبدون يوكلون بعمر ٦ اشهر و قسم بعمر ٤ اشهر
يعني ١٨٠ يوم او ١٢٠ يوم
ما علينا بكل الحالات اذا اقل من ٦ اشهر نبدي وجبه وحده فقط باليوم
فقط
و ما نروح لوجبه رقم ٢ الا بعمر ٦ اشهر
ماكو مشكله اذا انطينا وجبه يوم و ثاني يوم وجبتين
بس بصوره عامه افضل وجبه واحده الى حد عمر ال ٦ اشهر
شون نبدي؟
نبدي ملعقه كوب صغيره من الرز مثلا ( اكيد اقصد مي الرز او الرز المهروس بالمحضره )
و ثاني يوم ملعقتين
و ثالث يوم ٣
و نطبق قاعده ال ٣ ايام
اي كل ٣ ايام وجبه جديده
حتى نعرف الطفل تحسس او لا
و صلنا لعمر ٦ اشهر
نبدي نثبت وجبتين
و كل وجبه تكون ٢ الى ٣ ملعقه اكل اما حبوب او فواكه مهروسه او خضراوات مهروسه
الشهر السادس لا تزيدين الكميه خليها نفسها
الا اذا الطفل جدا مستمع فزيديها شويه
نذكر بالقاعده
لا تجبرين الطفل على الاكل
و لا تنسين ادخال اللحم بالوجبات
هنا ممكن ندخل اللبن
وصلنا لل ٧ اشهر
و نذكر كنا ننطي وجبتين بال ٦ اشهر
اوكي نبدي منا و جاي ٣ وجبات باليوم
و تذكري احنا من اول يوم نريد طفل متربي على روتين
فنريد ٣ وجبات هي فطور و غداء و عشاء
الاكل بعد سهل تقديره بكد قبضه ايده مسدوده
احسبي و شوفي شكد هو هذا حجم معدته و راح ياكل بكده
الحليب يبدي يتراجع و نزيد الاكل
مو تنسين هنا ممكن الجبن يدخل
و اللحم يزيد طبعا
و البقوليات اكثر
خطوه اخرى مهمه هنا ؟
الاكل شويه يثخن و ممكن تاجليه لل ٩ اشهر
بس ثخني بساع حتى نسهل المهمه
اذا ترضغين طبيعي استمري طبعا ويه الاكل
وصلنا لعمر ٨ اشهر الى ٩ اشهر
بعمر ٨ اشهر يبدي الطفل يلزم بيده
هنا نستغل هذه الوضعيه و ننطيه بيده و نكعد كدامه و نراقبه
تتذكرون وصلنا ٣ وجبات؟
اي ال ٣ وجبات باقيه
و ذني الوجبات الاضافيه تصير انه يوكل نفسه بنفسه
و بما انه بدينا هو يوكل نفسه بنفسه
اذا الاكل يبدي يكون اثخن قواما
كميه الاكل ؟
تتذكرون بالبوست السابق كلنا انه الكميه هي بكد قبضه اليد
هنا نبدي نزيد عن الشهر السابق ملعقه اكل او ٢
و الحليب كلش كلش كلش تراجع
و يبقى الحليب عند الحاجه خصوصا لاطفال الرضاعه الطبيعيه
لذلك بالمختصر بهذا العمر نكول
٣ وجبات رئيسيه انت توكليها للطفل او هو ياكلها
و وجبه او ٢ بين الوجبات على شكل طعام الاصابع هو ياكلها
و الحليب بالاخص الرضاعه الطبيعيه عند الحاجه
وصلنا لعمر ١٠ الى ١١ شهر
هنا بعد كافي شوربات خفيفه او ثخينه
ندخل اكل البيت
و ننتبه لا سكر
و لا ملح
و لا عسل
و لا عصير
و لا حليب بقري كامل الدسم ( حليب رقم ٣ او حليب اكياس او حليب باكيتات )
ممكن ذرات ملح
بس الباقيات ممنوعه
و بالاخص لا اكلات ممكن تسبب الاختناق كالمكسرات
تكدرين تضيفين بهارات خفيفه علمود الاطعم المختلفه
راح تلاحظين بهذا العمر انه كميه الاكل بدت تقل
اي عادي لان النمو يبدي يقل
كان يزيد بمعدل ٣٠ غرام باليوم
هسه دا يزيد بمعدل ٥ غرام باليوم !
الوجبات تكون ٣ وجبات
و بين وجبات عدد ٢
نذكر بالملخص :
1. انطي كميه اكل بكد ما يريد
2. ماكو شي اسمه تجبرين الطفل على الاكل
3. كملي رضاعه طبيعيه عند الحاجه
4. افهمي طفلك من يشبع
دائما اؤكد ان اكل الطفل مو علم صواريخ و لا يرادله
يرادلك نفس هاديء و تقليل توتر
و هي الامور تمشي


د. سيف سمير البياتي
اخصائي طب الاطفال باز کردن / نظر دهید

2022-11-03 16:51:30 باز کردن / نظر دهید

2022-11-03 16:51:22 تدرين لو لا ؟
صوت الخنفره ( الصوت اللي يطلع من الأنف بشكل خخخخخخ ) طبيعي و ماله علاقه بمي الراس و راح يستمر لغايه ٦ اشهر او سنه و هذا صوت طبيعي
الخنفره تحسيها بالصدر لأنها كصوت تنتقل من الأنف للاسفل مو اكثر
التقيؤ شي طبيعي اول ٦ اشهر شرط أن الوزن يزيد
بعض الافرازات المهبليه طبيعيه و حتى ممكن دم من منطقه المهبل كذلك طبيعيه بعد الولاده
السره عاده توكع بأول اسبوع او اسبوعين او ٣ اسابيع
و ما نكول عليها تأخرت الا اذا بعد ٤٥ يوم و بعدها ما واكعه
ابو صفار ما تفرق وياه لا شمعه البيت و المي و شكر و لا فص الثوم ابو صفار اما خفيف كلش و يطيب وحده او عالي و يحتاج دخول مستشفى
لون الخروج الأخضر و الأصفر طبيعي سواءا ساده او مقلم او مربعات بالأخص اذا الرضاعه الطبيعيه فلون الخروج الأخضر طبيعي بسبب تدعيم الحليب الصناعي بالحديد و في حاله الرضاعه الطبيعيه فان السبب يعود إلى أنك ما تفرغين الصدر جيدا و تنطين فقط الجزء السائل من الحليب او حضرتك متناوله اكل اخضر
معدة طفلك ضبط بكد الدعبله الصغيره محاوله مليء الطفل اكثر راح ينتج عنه غازات اكثر
مص الإصبع او مص الببرونه ماله علاقه بالطفل جوعان او لا
فيولد الاطفال و هم يمصون اصابعهم و هم ببطنك تخيلي !
شويه سعال بسيط اتركيه
شويه سيلان انف بسيط قطره انف و نظفيه
مو كلشي علاج مو كلشي مضاد حيوي مو كلشي كولدين و فنستيل
الحليب البقري ممنوع تحت سنه بس اللبن مسموح من ٦ اشهر و الجبن من ٨ اشهر
عسل و سكر و ملح و حليب بقري ممنوع جوه السنه
فيتامين دي ضروري من اول يوم
الباريستول امين من اليوم الأول
البروفين ممكن من عمر ٤ اشهر و الأفضل ٦ اشهر
الفولتارين لا مو بكيفك ممنوع
يسند راسه بعمر ٤ إلى ٥ اشهر
و يوكف مسنود بعمر ١٠ إلى ١٢ شهر
و عادي التسنين يتأخر ل ١٨ شهر
و عادي المشي يتأخر ل ١٨ شهر
فيتامين دي امين من اول يوم و ضروري و مهم
اللي بالصوره شي طبيعي لأي طفل عمره اقل من سنتين و نص و ما عنده الطفل لا كساح و لا غير شي
طفل طبيعي راح تتعدل رجله بعمر سنتين و نص إلى ٣ سنوات
ابره الكالسيون مو مهمه و بيها اعراض جانبيه
قطره فيتامين دي هي الامينه
و الجرعه هي ٤٠٠ وحده دوليه تحت السنه
و هي ٦٠٠ وحده دوليه فوق السنه
د. سيف سمير البياتي اخصائي طب الاطفال باز کردن / نظر دهید

2022-11-03 16:49:37 غسل حديث الولاده!
غسل حديث الولاده من الامور اللي تفكر بيها الامهات و خصوصا الامهات لاول مره او الامهات اللي بالغربه او وحدهن
اريدك قبل ما نفوت بالموضوع تتذكرين نقطتين
1. طفلك مو بهاي الهشاشه بحيث تخافين عليه من الغسل
2. و طفلك ما يحتاج يغسل يوميا
او بالاحرى لطفا لا تغسلين طفلك يوميا علمود صحه جلده
.
.
شوكت اغسل للطفل؟
مو الا اول ما يجي الطفل ينغسل لا لا
الطفل اصلا يجي من مكان نظيف خالي من الجراثيم مغطى بطبقه بيضاء اللون
هذه الطبقه البيضاء تحافظ على رطوبه جلد طفلك
لذلك نكول ما نغسل للطفل كاملا الا ان يسقط الحبل السري
.
.
نروح للاساسيات
شنو نحتاج لغسل الطفل كاملا
1. ليفه ناعمه
2. حوض صغير للاستحمام ( ممكن يكون بلاستيكي او قابل لل
3. منشفه
4. طفل
5. صابون ( اختياري )
.
.
نجي نحمم الطفل اول حمام يصير بعد ما توكع السره تماما
عادي بنفس اليوم ماكو مشكله
السره توكع خلال اسبوع و ممكن تتاخر الى ٣ اسابيع عادي
.
.
كيف نغسل الطفل خطوه بخطوه ؟
اختار مكان دافيء
مو شرط يكون الحمام
اي مكان دافيء
الماء نظمي حرارته بحيث يكون دافيء بحوالي حراره جسمك تكدرين تستخدمين مرفقك حتى تقدرين مدى ملائمه درجه حراره الماء
وراها ابدي شويه شويه بغسل الطفل
و اسندي طفلك كاملا
و انزليه للماء
ابدي بوجه الطفل
و بعدين راسه و شعره
و بعدين باقي جسمه
الغسل اول شي فقط ماء
اذا حابه تستخدمين الصابون عادي
بس ان جيتي اني شنو افضل؟
اني افضل الرغوات او الشامبوات لغسل الاطفال كاملا خصوصا الخاليه من العطور
و مكتوب عليها
Fragrance free
يعني ما بيه معطرات و مواد كيماويه
لا تنسين نقطه مهمه
5 الى 10 دقايق كلش طويله حاولي تكون اول حمامات قصيره
و نذكر بمعلومه انه الطفل ما يحتاج الى الغسل اليومي و ما يحتاج بكل مره للصابون او الشامبو
اخيرا البوست يخص غسل حديث الولاده كاملا و اكيد ممكن تغسيل الطفل عدا السرة بعد الولاده مباشرة

د. سيف سمير البياتي اخصائي طب الاطفال باز کردن / نظر دهید

2022-11-03 00:13:45 بمكان ما تعيطين و تصيحين على الاطفال ليش ما تجربين التالي ؟
هذا البوست للاطفال العنيدين و اللي بس يبجون لاي سبب و اللي بسرعه تنثار عدهم نوبات المزاج
يعني اعرف جيدا انه هم يلحون و يزعجوك لاي سبب و لمختلف الاسباب
بس جربي التالي ليش لا
١. خلي طفلك متحضر !!
شون يعني ؟
يعني دا تروحين للجيران بزياره فهميه اللي راح يصير و شون راح نتصرف حتى ما يتفاجيء
راح ترحون للطبيب احجيله و سوي تمثيليه شنو اللي راح يسويه
تاكدي من انه تحضير الطفل كذلك جسديا
يعني لا تاخذيه و هو نعسان او جوعان
ما بيها شي اذا اخذ البطه مالته وياه او سيارته او لعابتها وياها
احسن ما يطلب وحده من المحل
٢. خليه يختار
اكثر الاطفال اللي اشوفهم مطيعين هم الاطفال اللي اهلهم ينطوهم الخيار و يكولوهم اختاروا
خليه يحس بالقياده و انه هو المتحكم بالقرار
اكيد بالقرارت المو مهمه
مو مثل بعض الامهات من اكولها العفو شو ملهيه بحلكه لو ما فاطمته من المميه و عمره سنه و نص
تكولي مو ما يقبل
٣. افتهم شنو اللي زاعجه
ليش هو هيجي عنيد
تره و الله ما يعرفون يعبرون
و خصوصا ذوله اللي اعمارهم اقل من ٣ سنين
هم ببساطه مدا يفتهمون شيردون منك
و ما يفتهمون شون يردون عليك
و بالتالي شنو يسوون؟
عفيه
نوبه غضب و بكاء و عويل
ما يفتهمون اصلا الموضوع
فهمهم شويه شويه
احجي وياهم ع كد عقلهم ببساطه
٤. الهيه !!
اي جديات احنا ما داخلين بمصارعه
شفته منزعج و ضايج
غير الموود
طلع كتاب و اقراله
او كوله يلا اطلع العب ( هاي بعد كورونا ان شاء الله)
نوبات مجرد لعبه غميضه بسيطه راح تنتهي الازمه مال بكاء
٥. كن معلم
علمه شون يتجاوز نوبات الغضب
نمي بداخله المهارات
الرسم الغناء او اي شي
طفلك يريد يسوي الشي الصح بس ما يعرف لان محد معلمه
انت فهمه و سوي امامه الصح
و هو راح يتعلم
٦. لا تستشيط غضبه
يعني هو يحب الجكليت تجيبين الجكليت و تخلين كدامه ١٠ قطع و هو ما راح يكتفي بوحده و انت تردين تنطين وحده فقط
ليش عرضتي ١٠ جكليتات كدامه؟
هذا نفس الشي بالنسبه لشراء العصير و الجبس
ليش تاخذهم للمحل القريب ؟
اني اجيب اللي اريده
و اختار و انطيه
خصوصا من اريد اعلمه على نظام صحي
٧. استخدم الكلمات الايجابيه و الافكار الايجابيه
يلا جربوا كولوا لطفلك اللي عمره اقل من ٦ سنين لا تكمز ع السرير شنو راح يسوي ؟
اي راح يكمز بالعناد
بس جرب تكوله تعال نكمز بره البيت لان السرير للنوم مو للقفز
و شوف الفرق
استخدم الافكار الايجابية
٨. دائما انطيهم الوجه الحاد من يبدي الونين و النق و النحيب
دائما فهمه انه هذا التصرف غير مقبول بنظره
مو الا تتكلم
مجرد نظره
٩. امدح امدح امدح
١٠. جدول النجمه و عندي بوست مفصل عنه
طبقه مثلا من الطفل ما عاند او ما سوه نوبه غضب
.
.
اخر شي هذا البوست بيه افكار سهله التطبيق و ما راح تلكين نتيجه من اول ايام
بس حاولي و حاول
هدفي مجتمع صحي
و تربيه سهله
د. سيف سمير البياتي
اخصائي طب الاطفال باز کردن / نظر دهید

2022-11-01 08:37:28 السلام عليكم .
انتشر في الاونه الاخيرة في عدد من المحافظات هجوم ذئاب وكلاب على البشر في مواقع سكناهم .وثبت ان هذه الحيوانات كان سبب الهجوم هو اصابتها بداء الكلب .نذكر نبذه مختصرة عن داء الكَلَب .
هومرض فيروسي مميت يسبب التهاب حاد في الدماغ. ينتقل إلى البشر من لعاب الحيوانات المصابة بالعدوى. وعادة ما ينتقل فيروس داء الكلب من خلال العض.
وتشمل الحيوانات التي من المحتمل بشدة أن تنقل داء الكَلَب هي الخفافيش والذئاب وبن اوى والثعالب وغرير العسل وابن عرس والكلاب هذه ابرز الحيوانات (ولكن كل الثديات لها القدره على الاصابه بهذ الفايروس سواء كانت بريه او حيوان مزرعة) . تكون الكلاب الضالة الأكثر احتمالًا لنقل داء الكَلَب إلى البشر.
- كيف يمكن ان نميز بين الحيوان المصاب والغير مصاب بداء الكلب .وغالبا يكون من الكلاب والذئاب .اذا تصرف الكلب بشراسة مفرطه غير طبيعية وبدء بمهاجمة الاشخاص والعض وعدم الخوف او التراجع والهرب .هذا يعتبر مؤشر عالي للاصابه بداء الكلب . وهذا الامر ايضا يقرا على الذئاب وابن اوى والثعالب .لان بطبيعة هذه الحيوانات لاتهاجم مباشرة الانسان حتى الذئاب رغم الشراسه فهي لاتقترب لمهاجمة الاشخاص في المناطق السكنية .
يسبب فيروس الكلب عدوى داء الكلب. وينتقل الفيروس عبر لعاب الحيوانات الحاملة للعدوى. وقد تنقل الحيوانات المصابة بالعدوى الفيروس عند عضها حيوانًا آخر أو شخصًا.
وفي حالات نادرة، قد ينتشر داء الكلب عند دخول اللعاب المصاب إلى جرح مفتوح أو إلى الأغشية المخاطية، مثل الفم أو العينين. ويمكن أن يحدث هذا إذا لعق حيوان مصاب بالعدوى جرحًا مفتوحًا في الجلد.
تتضمَّن مجموعة الحقن المُعالِجة لداء الكلب ما يلي:
حقنة سريعة المفعول (الغلوبيولين المناعي لداء الكلب) لمنع إصابتك بالعدوى الفيروسية. وتُعطى هذه الحقنة إذا لم تكن قد تلقيت لقاح داء الكلب. تُعطى هذه الحقن بالقرب من موضع عضة الحيوان إن أمكن، وفي أقرب وقت ممكن بعد العضة.
سلسلة من لقاحات داء الكلب لمساعدة جسمك على التعرُّف على فيروس داء الكلب ومكافحته. تُحقَن لقاحات داء الكلب في الذراع. وإذا لم تكن قد تلقيت لقاحات داء الكلب من قبل، فسوف تتلقى أربع حقن على مدار 14 يومًا. أما إذا كنت قد تلقيت لقاح داء الكلب، فسوف تتلقى حقنتين خلال أول ثلاثة أيام.
(حفظ الله الجميع من كل سوء )
#الباحث :هشام خيرالله باز کردن / نظر دهید

2022-10-31 11:44:49 بوست عن اليرقان ( الابو صفار )
السلام عليكم دكتور كيف الحال
اليوم جايتك باستشارة ابني اللي عمره ٣ أيام صار عنده ابو صفار فعندي كم سؤال عنه لو تسمح
اولا ليش يصير ابو صفار؟
_ ابو صفار يصير نتيجه عدم نضوج انزيمات الكبد اللي تنتج عن تكسر الدم الطبيعي
هذا الملخص بس خلينا نحجي تفاصيل شويه
شوفي اختي خلايا الدم تعيش عادي بالجسم ١٢٠ باليوم و بعدين تتكسر من تتكسر تطلع مواد منها و من ضمنها ماده البلوربين هذا البلوروبين لونه اصفر و يأخذه الكبد و يحوله إلى ماده الصفراء و يفرزها بالامعاء و لهذا تشوفون لون الخروج اصفر او مشتقات الأصفر
زين دكتور ليش ما يطلع الطفل اصفر؟ يعني بعدين يصفر ؟
-لان المشيمة( الجاره) راح تاخذ هذه الماده و تصفيها من يكون ببطنك
زين دكتور كلت هو ناتج عن تكسر الدم اللي يصير عدنا كلنا ليش عند الطفل يصير قوي أول أيام ؟
-بسبب انه انزيمات الكبد مو ناضجه عند الطفل و لهذا بس تنضج هذه الانزيمات يبدي ابو صفار شويه شويه يقل و انت عبالك الثوم طيبه
دكتور الله عليك بلا شقه الثوم ما يعالج الابو صفار؟
-اختي عيوني انت الكبد و الانزيمات و تكسر الدم شعليه بالثوم!!!!
دكتور و الخرزه ما تطيب الابو صفار بيت خالتي عدهم وحده ما تطيب ؟
- امي شله علاقه لخاطر الله هو انزيم يا خرزه يا ثوم يا شنو هالسالفه هاي
زين دكتور كلت اللي فصيله دمها سالب او فصيله دمها O لازم تعرف فصيله دم طفلها أول ما تجيب ليش؟
-لان اذا دم الطفل ما يشبه دم الأم ممكن الطفل يكون معرض لتكسر دم أكثر و بالتالي درجه ابو صفار أكثر فحتى تاخذ حذرها اكثر
دكتور ابو صفار لازم يصير بالطفل؟
-لا مو الا بس من كل ١٠ أطفال يصير ب ٦ تقريبا
دكتور يعدي ابو صفار حديثي الولاده؟
لا طبعا
ابني ما صار بيه ابو صفار بعد الولاده عادي ؟
- طبعا عادي
زين ممكن يصير بيه بعدين من يصير عمره بالسنين؟
- لا طبعا شله علاقه ابو صفار الأطفال الأكبر من شهر هوايه اله أسباب و من أهمها التهاب الكبد الفايروسي اللي أبدا ماله علاقه بابو صفار حديثي الولاده
دكتور علاج ابو صفار الكبار اله علاقه بالثوم أو يطيبه؟
هههههه لا طبعا
دكتور شنو مراحله او شوكت استشار الطبيب من يصير بيه ابو صفار ؟
اولا اللي تلاحظين ابو صفاره بأول ٢٤ ساعه من الحياه
ثانيا من تشوفين ابو صفاره بده ينزل للصدر أو أعلى للبطن لان ابو صفار من يبدي يبدي بالوجه و ينزل ع الصدر و بعدين للبطن و بعدين للرجلين و الأفضل من تشوفين بيه ابو صفار حتى طبيبك يفحصه و يقرر يحتاج تحليل او لا
ثالثا من الابو صفار أستمر فوك الاسبوعين او بده بعمر الأسبوع فلازم تراجعون طبيب
دكتور ابني خليته جوه الضوه مال الشمعه و شويه شويه راح و انتوا تكولون الضوه مال شمعه ما يفيد ؟ !
اختي الكريمة الابو صفار القليل و اللي هو اغلب الحالات بس يكبر الطفل و يصير عمره ٥ أيام إلى اسبوع انزيمات الكبد تشتغل و يطيب فيعني لا الثوم و لا الضوه أثر عليه
ليش الشمعه ما تفيد ؟
لان الشمعه ما بيها الطول الموجي اللي يكسر جزيئات البلوروبين
شنو علاج ابو صفار ؟
الضوء اللي بيه طول موجي معين راح يكسر جزيئات البلوروبين و يخليها تنزل بالإدرار و اذا ارتفاع عالي كلش ممكن تبديل الدم
ابو صفار خطر ؟
من يرتفع لأرقام معينه طبعا خطر و يسبب العوق و قد يؤدي إلى الوفاه
شكرا للمتابعه
موجوده بوستات خاصه عن داء الباقلاء و داء الحنطه و السكري و الحليب بالصفحه بنفس الاسلوب


د. سيف سمير البياتي اخصائي طب الاطفال باز کردن / نظر دهید

2022-10-29 19:17:36 باز کردن / نظر دهید