الشاعر حيدر مطر العبادي

2021-07-10 22:27:08 عذرن مولاي ..سامحني بهاي ..
غلطان وغارك بذنوبي وندمان هواي ..
.........................
يالمهدي لو سال الدمع يشرح عمق أحساسي ..
مختنك بالهم والحزن بالكوه أجر أنفاسي ..
دنكت راسي من الخجل يالبيك رفعت راسي ..
الشيطان غاويني شكثر وشكبره شر وسواسي ..
الأعمه يشوف .. درب المعروف ..
ودمعي المذروف بوجناتي عللخد جواي ..
...........................
حالي صعب وأبقه أرتجي بيا ساعه أصلح حالي ..
وصارن أذنوبي بلا عدد لا أول ولا تالي ..
ياقائدآ ياناصرآ من الخجل دمعي يلالي ..
يالمهدي وعيونك تره بس أنته شاغل بالي ..
يابحر الجود .. أنته الموعود
وجفي الممدود اليتأمل تغفر بلواي ..
...............................
نهر الندامه والأسف ياسيدي يصب دمعه ..
تعبان من هذا الوضع وأتنطر بكل جمعه ..
عصر المآسي والفتن من تظهر احنه نودعه ..
عجل علينه بطلعتك ممشي عليك البضعه ..
لو رف لواك .. تنذل أعداك
صحراء الدنيا ومنتظره من جفك ماي ..
..................................
الينتظر يايوم الفرج يحس الفرج يدناله ..
كون اليناطر طلعتك لازم يراجع حاله ..
والطلب عفو ومغفره متندم على أفعاله ..
زارع عيونه على الدرب بلكن يشوف هلاله ..
تمر الأيام .. وعام يجر عام ..
ونيران غيابك يالمهدي تسعر بحشاي..
.................................
بالندبه أقره سيدي ودموعي عالخد تجري ..
وأدعي بقنوتي بالفرج لصاحب زماني وأمري ..
الطلعه البهيه بيا وكت ماظل صبر مو تدري ..
رايد أكحل ناظري ومرتاح أروح الكبري ..
دوم بطرواك .. لا ما أنساك ..
رغم أخطائي ورغم أذنوبي لاكن وفاي ..
................................
كد السمه وكد الأرض أنه أعتذر عن جرمي ..
وبكل وكت أتصورك يالمهدي حاضر يمي ..
مايوفي حقك كل شعر يالحجه وأسأل قلمي ..
يكتب وهوه منحني خاطر يخفف همي ..
ودمعي الأحبار .. يبن الأطهار ..
لو تنشف دمعات عيوني أكتب بدماي ..
..............................
حيدر مطر العبادي
١/١/٢٠٢١ باز کردن / نظر دهید

2021-07-10 12:28:14 فيض الدموع .. يطفي الشموع
ابد ما نلبس جديد ..
شنعتذر لأبن الشهيد ..
يطفي الشموع .. يطفي الشموع
************************
احساسهم مثل الورد روحه وعبيره ..
أزغار بس أحلامهم كلش جبيره ..
الترافه شلون خدهه على الحصيره..
وكلمن يغض النظر ماعنده غيره ..
تبجي وتنوح .. بدمع مسفوح ..
والفرح غايب أكيد .. شنعتذر لأبن الشهيد
يطفي الشموع .. يطفي الشموع

************************
أطفال بس تريد تسمع دكة الباب ..
وتبقى تتنطر يرد البالنجف غاب ..
بالكلب جرح الأبو لليوم ماطاب ..
جلمة البويه عزيزه هنا يالاحباب ..
هاي الاطفال .. تنطر هلال
وبعد مامر بيهه عيد .. شنعتذر لأبن الشهيد
يطفي الشموع.. يطفي الشموع
************************
أيتام ندري الفرحه عنهم مو بعيده ..
وتنجرح من كلمة أيامك سعيده ..
حضن دافي تريد مو لعبه جديده ..
جانت بحضن الابو وتغفه اعلى ايده ..
الوالد الراح .. بجنه مرتاح
أجره ماينقص يزيد.. شنعتذر لأبن الشهيد
يطفي الشموع .. يطفي الشموع
***********************
الصور بالمكبره تبجّي الحياطين ..
كل محب كابل الصوره بدمعة العين ..
من رحت وياك راحت أحلى السنين..
يالنذرت سنين عمرك فدوه لحسين ..
مظلمه الدار .. عكب الأنوار
والضوه هاجر بعيد .. شنعتذر لأبن الشهيد
يطفي الشموع.. يطفي الشموع
***********************
كل طفل يالغالي وكت المغربيه ..
تهمل عيونه ويوّن ونه شجيه ..
أمه هداهه الحزن يا ابو الحميه ..
وأخته تبجي اتذكرت لوعة رقيه ..
بحلم مذبوح ..وكلب مجروح
موقف يذوب الحديد .. شنعتذر لأبن الشهيد
يطفي الشموع.. يطفي الشموع
************************
لوعة أيتام الحسين ونفس الاحساس ..
بس فرق بين الاثنين البطل عباس ..
الامل معقود ويه الرايه والطاس ..
طاحن وصدر الحسين بخيل ينداس..
ضاعت أحلام .. هاي الايتام
لمن انحز الوريد .. شنعتذر لأبن الشهيد
يطفي الشموع .. يطفي الشموع
...................................
لخادم الحسين
حيدر مطر العبادي باز کردن / نظر دهید

2021-07-08 02:16:44 لسان حال العليله ع
سفرهم صار موضوعي .. دعيت الباري بدموعي ..
يرجعون .. يرجعون ..
أخَذ مرسالي الأعرابي .. وانه أتنطر أحبابي ..
يرجعون .. يرجعون ..
.................................
فاطمه آنه العليله .. وكلبي مشتاك ويحن ..
زغيره عالهم والأذيه.. بآاه وبحسره أمتحن ..
الأهل من فاركوني .. ليلي بس ابجي وأون ..
خلافهم أظلم ولاجن .. بيت حسبالك سجن ..
عليله ومنهدم حيلي .. وأترجه بحلم ليلي ..
يرجعون .. يرجعون ..
الأبو مايحمل غيابي .. وآنه أتنطر أحبابي ..
يرجعون .. يرجعون ..
.....................................
وحدي بالبيت وأتاني .. أحلام عندي وأمنيات ..
هلبت يعودون أهلي .. لو تظل بس ذكريات ..
هنا جنت أشبك رقيه .. هنا أصلّي وي البنات ..
تذكرّت جمعت أهلنه..البيهه أحس طعم الحياة ..
وحشه البيت ليليه .. أكولن هلبت عليه ..
يرجعون .. يرجعون ..
أبد محد يدك بابي .. وأنه أتنطر أحبابي ..
يرجعون .. يرجعون ..
..................................
بدمعي خطيت الرساله .. ونزلت وياهه الجفون ..
وصار مرسالي ثكيل .. وشايل آلام وشجون ..
راحو وخلّوني وحدي .. وأنتظر هلبت يجون ..
خاف منهم ماكو رجعه .. راودتني شكد ظنون ..
تنطي وتاخذ أفكاري .. بصلاتي أدعي الباري ..
يرجعون .. يرجعون ..
يقره الوالد كتابي .. وأنه أتنطر أحبابي ..
يرجعون .. يرجعون ..
...................................
كمت أون ونه خفيه .. وعيني ماتقبل تنام ..
ظل يحن وينوح يمي .. كابلت طير الحمام ..
طفله مشتاكه لأبوهه .. ياهو اليوصّل سلام ..
خايفه بأرض الطفوف .. وينذبح راس الأمام ..
كلمن يقره مرسالي .. هلي والوالد الغالي ..
يرجعون .. يرجعون ..
بلّغ شوكَي وعتابي .. وآنه أتنطر أحبابي ..
يرجعون .. يرجعون ..
........................................
الكربله تحدي الضعينه .. والطريق شكد طويل ..
ظلت عيوني بدربهم .. والدمع منهه يسيل ..
أشعر بصبري وعذابي .. هوايه أحسّن بيه قليل ..
عن صبر عمتي السبيه .. لو مشت ويً العليل ..
عليل ومحد يعينه .. يريد ودمعته بعينه ..
يرجعون .. يرجعون ..
أبد ماجان بحسابي .. وأنه أتنطر أحبابي ..
يرجعون .. يرجعون ..
........................................
أنه أريد وأهلي رادو .. والله يفعل مايريد ..
آنه ليليه بمنامي .. قهري وآهاتي تزيد ..
والدي بأحلامي أشوفه .. وناري تسعر ماتهيد ..
والشمر جاثي على صدره .. من الكفه يحز الوريد ..
يذبح والنحر ضامي .. ردت لوحته بأحلامي ..
يرجعون .. يرجعون ..
أهلي خدري وحجابي .. وآنه أتنطر أحبابي ..
يرجعون .. يرجعون ..
.........................................
حيدر مطر العبادي باز کردن / نظر دهید

2021-07-04 01:21:14 صدى الصوت .. أجه الموت .. والمرض حيل أنتشر ..
شنو الراي .. يمولاي .. يالأمام المنتظر ..
.............................
سيدي ومولاي لمته تهل علينه ..
عين تربي الكوفه عين على المدينه ..
دوم تبقى بالفرج مرفوعه أدينه ..
بحيره عشنه وهالوباء شخله بينه ..
الاعراض . والامراض . هدمت حيل البشر ..
شنو الراي . يمولاي . يالأمام المنتظر ..
...........................
والله من هذا العمر ماشفنه راحه ..
سيدي غيابك بجي وّون ومناحه ..
الحزن بكلوبنه ثبّت رماحه ..
خيط فجرك كلنه نتنطر صباحه ..
يحماي . يوفاي. صارت اللحظه بشهر ..
شنو الراي . يمولاي . يالأمام المنتظر ..
...........................
ياهو غيرك يبو صالح نشتكيله ..
وندري قائمة الذنوب شكد طويله ..
والندامه والأسف نشعر قليله ..
وأحنه غير حسين ماعدنه وسيله ..
بالفراش . بالأنعاش . ننعى محزوز النحر ..
شنو الراي . يمولاي . يالأمام المنتظر ..
..........................
شلون لو متنه قبل منشوف رايه ..
لو قبل عاشور تلفينه المنايه ..
يا بو صالح أمنيه وردناهه هايه ..
كون موتتنه بمجالس للقرايه ..
بالدموع . والشموع . وبمحرم لو صفر ..
شنو الراي . يمولاي . يالأمام المنتظر ..
........................
هالمحن مرت علينه واحنه ننخاك ..
حتى لو غايب يمهدي مانسيناك ..
عجّل أظهر سيدي هواي أنتظرناك ..
ندري من تظهر تجيب الفرج وياك ..
يموعود . هالجنود . رادت تكحل النظر ..
شنو الراي . يمولاي. يالأمام المنتظر ..
.........................
أحنه كل جمعه نتاني هلال عيدك ..
سيدي وتهل علينه الرايه بيدك ..
يا لثارات الحسين يظل نشيدك ..
نظره منك ينتظر كلمن يريدك ..
عشكناك . هويناك . غيبتك تحني الظهر ..
شنو الراي . يمولاي . يالأمام المنتظر ..
..........................
حيدر مطر العبادي باز کردن / نظر دهید

2021-07-03 01:10:24 أكصد لقاضي الحاجات باب المراد وزوره ..
.......................................
لو تحس نفسك محتار أكصد لباب الحاجه ..
شما كثر همّك ينزاح أبحر الكرم وأمواجه ..
بالكاظميه نورين بيهم تظل وهاجه ..
بس صفّي نيتك وزور روحك ترد مسروره ..
......................................
لوجبل همك ينزاح من توصل أنت الغايه ..
هذا الجواد الينخاه لا ما يردله حجايه ..
لا مايرد الزوار وأفضاله ندري هوايه ..
وأحنه بسجّل الخدام سجلنه بين أسطوره ..
......................................
وكت الفتن والأمراض فارش علينه جناحه ..
خوف ومعانات وضيم ماشفنه يوم الراحه ..
من عدنه راحت أعزاز بدمع ولطم ونياحه ..
بحفاره تقبل مولاي أكبورهم محفوره ..
.....................................
لو زرنه صحنك مولاي ما داعي للكمامه ..
ندري اليزورك مولاي جنة عدن كدامه ..
وأفضالك علينه هواي من الجدم للهامه ..
وزوارك بهذا اليوم رسمولك أجمل صوره ..
.....................................
انته الجواد وتنخاك زوارك الموجوده ..
جف الكرم ظل مفتوح بس بابك المسدوده ..
لمصابك بعلو الغيم رايتنه رفت سوده ..
أتعنت تزورك هاليوم زوارك ومأجوره ..
......................................
كل زاير بهذا اليوم دمع الحزن بعيونه ..
عنه يباب الحاجات أدفع مرض كارونه ..
وأحفظ بلاد النهرين من كل فتن مدفونه ..
نلطم على حسين أنريد ننصب عزه بعاشوره ..
.........................................
نرفع ادينه وننخاك باب المراد الليله ..
هدنه المرض والآهات غيرك منو النشكيله ..
بالكاظميه الدكتور كلهه تصيح دخيله ..
دخيلك يقاضي الحاجات أنته الكرم وبحوره ..
..........................................
حيدر مطر العبادي باز کردن / نظر دهید

2021-07-02 10:03:16 برز بالميدان فارس حيّر الناس ..
ترتجف منه العساكر أسمه عباس ..
........................
شمرت السيف بيمينه مثل حيدر من يكر ..
ترتعب منه العساكر تشرد يردهه الشمر ..
بسيفه طشرهه ويلمهه خله كل عشره بكتر ..
ساعه يمنه وساعه يسره بروسهم طايح بتر ..
واليصير أكبال عينه برجله ينداس ..
............................
مثله أرض الغاضريه أبد ماشافت أبد ..
هذا شبلك يالصميده بالحرب مثل الأسد ..
سيفه بركاب الأعادي مثل منجل لو حصد ..
من يشن غاراته يقره القل هوه الله أحد ..
بجّه كل فرسان أميه وكل الأرجاس ..
..........................
هذا شبل أم البنين السوّه بالطف معجزه ..
أبد ماواحد وصلهه بجاله أخته معززه ..
اليكرّب صوب زينب ينصب الروحه عزه ..
حلم كابوس السبايه أبو فاضل فززه ..
الحره بوجود الكفلهه شلون تنجاس ..
...........................
هناك ملك الموت حاضر بيده لزمهم سره ..
صار أشجعهم جبان يكله خليني وره ..
زلزله ونزلت عليهم سيف سبع الكنطره ..
انسدت عليهه المعابر كل كتر بيه سيطره ..
هذا ضرغام الطفوف اليرفع الراس ..
............................
هذا صكار الأعادي الكمر شيال اللوه ..
كافل الحره الأبيه عنده أغله من الهوه ..
حتى أنفاسه ويَ أخيته الكمر يقسمهه سوه ..
ولوعطش نهر الفرات بأيد عباس أرتوه ..
يانهر يروي العطاشه بجوده ينقاس ..
.............................
عاشت أيدك يبو فاضل أرض صاحت والسمه ..
بطل والجايبته حره والنعم من فاطمه ..
من برز بالغاضريه شبل حماي الحمه ..
يكطر السيف بيمينه من مناحرهم دمه ..
صار أحمر لون جوده وسيفه والطاس ..
..............................
حظر للتجوال بالطف سوّه شيال العلم ..
رسم لوحات البطوله وسيفه صارلهه قلم ..
والنعم عباس حارس تشهد عليه الخيم ..
حتى لو جفه كطيعه ونابت بعينه سهم ..
أبد ماتمشي العقيله بلايه حراس ..
................................
حيدر مطر العبادي باز کردن / نظر دهید

2021-07-01 02:17:05 محتار ميمونك.. من فارك عيونك
اشلون يرجع للمخيم خالي..
وعيون زينب تسأل على الوالي..
من فارك عيونك .. من فارك عيونك
............................
والله هد حيله الحزن يصهل ويبجي ويون ومدنك الراس..
يمشي ويخط الجدم ويعثر بجف و علم
للبطل عباس..
بحيره من رد للخيم بروحه جانون الالم
جمره من الاحساس ..
عاش بالطف ملحمه جروح وأسهام ودمه
من الجدم للراس ..
ومن فاضت دموعه.. عالرضو ضلوعه
صاح أنه غير حسين ما يحلالي..
وعيون زينب تسأل على الوالي..
من فارك عيونك.. من فارك عيونك
.....................................
ظلمه بعيونه السمه ويبس ريجه من الضمه
وبعيونه حيره ..
يريد من زينب عذر خجلان من عدهه شكثر
وجهه يديره..
من السمه راح الضوه وأختنك حتى الهوه بحّر الظهيره..
تنظر عنان المهر زينب وهم تنتظرتشتم عبيره..
تسجل ألك موقف.. من دمك الينزف
وعالمهر شافت دم اخوهه الغالي ..
وعيون زينب تسأل على الوالي..
من فارك عيونك.. من فارك عيونك
.....................................
شاف بعيونه صور من العطش يشكي النهر
ويدور الماي..
ماكو شمس ولاكمرزينب اتلكي الخبر
عالغبره مولاي..
حسين جثه موذره عاري ظل على الثره
ومطبر هواي..
تحترك كل الخيم والهواشم والحرم أتّيه الراي..
ياللونك أتغير .. الفكد ابو الاكبر
رديت خالي و خيبّت أمالي ..
وعيون زينب تسأل على الوالي..
من فارك عيونك.. من فارك عيونك
........................................
السمه سوده مكدره ابن بت خير الوره حزو وريده..
تربع بصدره الشمر وتسحك الخيل بصدر شبل الصميده ..
شفت خنصر منكطع شيبّك هذا الوضع المحنه شديده ..
شلون يقبل نفترك والمخيم يحترك مثل الرعيده..
ولصوب ابو سكينه .. تشبح بقت عينه
وينسلب بيت المصطفى أول تالي..
وعيون زينب تسأل على الوالي..
من فارك عيونك.. من فارك عيونك
........................................
أنت شاهد يالمهر الشمس وكت الظهرذبحو ضواهه..
الدنيا ظلت مظلمه على أبن حامي الحمه وضمت سناهه..
فتحت الباب السمه وجنهه امه فاطمه رادت ضناهه..
صار ملعب للسيوف اتطشر بكاع الطفوف روحك يطاهه..
ذبحو حلم جده .. وظل عالرمل خده
ونار الفجيعه بمهجتي ودلالي..
وعيون زينب تسأل على الوالي ..
من فارك عيونك .. من فارك عيونك
............................................
اتربع بصدر الورد ذبح عطره بكل حقد شمر الخنه العار..
ماقبض روحه الملك وبجه كل كون الفلك ويعاين الصار..
ذبّل الورده العطش لجسد ما لمه نعش أوصاله طشار..
هذا باب المغفره راح لأمه الطاهرة وحيدر الكرار..
شافه النبي وكبر.. مظلوم أبن حيدر
ونزلت الأملاك تبجي أكبالي ..
وعيون زينب تسأل على الوالي ..
من فارك عيونك .. من فارك عيونك
..........................................
لخادم الحسين
حيدر مطر العبادي باز کردن / نظر دهید