الشاعر حيدر مطر العبادي

2022-01-14 13:50:57 عين تقره الواقعه .. وعين تنعى الفاجعه
هاذه حال أم البنين بفكد الأولاد ..
عنهه من كرب أجلهه صارو أبعاد ..
والله حيره .. والله حيره
.........................
تضحيات أم الغيارى ماكو منهه ..
ماشطت فرعون ماحزنت حزنهه ..
الكواكب والكمر رضعت لبنهه ..
شكد عظيمه الوالده العباس أبنهه ..
ياعظم هاي المره .. عالنوايب صابره
فاكده مو كبد واحد أربع أكباد ..
عنهه من كرب أجلهه صارو أبعاد ..
والله حيره .. والله حيره
...........................
تذكر الوليان وكت المغربيه ..
شما تدير العين تلكه الغاضريه ..
تريد واحد يحضر بيوم المنيه ..
أربعه ولحسين أنطتهم هديه ..
تكول لو باجر أروح .. عالكبر ياهو الينوح
ياهو يقرالي دعاء ويقره الأوراد ..
عنهه من كرب أجلهه صارو أبعاد ..
والله حيره .. والله حيره
.............................
والله ياناس الوِلد عازتهه عازه ..
ياعظم عباس وبأمه أعتزازه..
ويه جبرائيل ساعتهه أيتوازه ..
يطلع من الكبر ويشيل الجنازه ..
يعتني أمه بلا جفوف .. مبّخر بعطر الطفوف
عالكبر يجري دمعته وحزنه يزداد ..
عنهه من كرب أجلهه صارو أبعاد ..
والله حيره .. والله حيره
................................
رغم فكد الأربعه شكد شيباهه ..
بس بقت للموت مفتخره برباهه ..
الجنازه لو مشت محد وراهه ..
هاي معناهه الكبر غيّب ضناهه ..
تنطي كل غالي وتكول .. مقصره حيل ويه البتول
أحنه لأجل الدين مانبخل بالأعداد ..
عنهه من كرب أجلهه صارو أبعاد ..
والله حيره .. والله حيره
.............................
نمرد جبد الوالده بفكد الميامين ..
والله بفراك الغوالي اللحظه سنتين ..
حايره من تموت ياهو يغمض العين ..
وتلهج بأسم أبو فاضل وأسم الحسين ..
كبل ماتدفنهه كاع .. ويه الوِلد رادت وداع
روس ظلت كل ولدهه بلايه أجساد ..
عنهه من كرب أجلهه صارو أبعاد ..
والله حيره .. والله حيره
..............................
بقت تسعر بالكلب جمرات العتاب ..
من يشيعون النعش بغياب الأحباب ..
نفترض عباس حاضر هذا المصاب ..
شلون أبو جفوف الكطيعه يهيل التراب ..
أبو فاضل ترتجي .. ها يجي ها مايجي
ويه الأماجد عدهه بالفردوس ميعاد ..
عنهه من كرب أجلهه صارو أبعاد ..
والله حيره .. والله حيره
.............................
حيدر مطر العبادي باز کردن / نظر دهید

2022-01-14 13:36:14 لو ردت همك ينزاح أم البنين أنخاهه
......................................
مغركني خير ام عباس أفضال الهه هوايه ..
عدهه كرامات هواي كد الفرات ومايه ..
وصت ابنهه الضرغام بالك تطيح الرايه ..
لمن سمعهه عباس فوك النجم علاهه ..
.................................
مكضيه كل شده تهون أبحر الكرم وأمواجه ..
اليرفع اديه وينخاج تنطينه بيده الحاجه ..
يالبيج شرع الله انصان بأسراءه وبمعراجه ..
البجت دم على حسين خل نبجي كلنه وياهه ..
...............................
فدوه النشامه لحسين صاحت وأنه الممنونه ..
راحت تعاين عباس تلكه حسين بعيونه ..
جعفر وعبد الله وعون الاخو ماينطونه ..
وصتنه أمنه وهاليوم أنجازي حك ارباهه..
.................................
صاح ابو فاضل عباس اليوم أوفي أوعودي ..
لزينب أجيب انه الماي لو كطعولي ازنودي ..
نهر الفرات العطشان راح ارويه من جودي ..
بيوم الحشر أمنه نريد الزهره تتلكاهه ..
....................................
بحسره ومدامع واهات عكبك اكضي اسنيني ..
يوليدي يالب أحشاي يالشوفتك ترويني ..
الخوه وكفات تريد موبس هاك وأنطيني..
وطاهه بمثل هذا اليوم وكفتك ما ينساهه ..
....................................
كلج وفه يم عباس منبع بطوله وغيره ..
الطف تريد الشجعان بس عندج التأشيره ..
ارتجز بالطف عباس من كبّر التكبيره ..
الخيل تردم بالخيل أتفر الزلم خلاهه ..
...................................
حيدر مطر العبادي باز کردن / نظر دهید

2022-01-11 21:35:48 صارت أحلام ..أمنياتج بالشباب الأربعه ..
صارت أحلام .. لا تتانين الشمل شيرجّعه ..
أيسي يم عباس ماينفع حنينج ..
حسين مايرجع ولاترجع بنينج ..
صارت أحلام .. صارت أحلام
...........................
طشرت كل الأماني الغاضريه ..
هنانه جف وهنا نحر وهنا سبيه ..
ذكرياتج عالنهر ظلت رميه ..
وصدر مسحوك بحوافر أعوجيه ..
عشتي مأسات .. بحالج اشسوت يمولاتي الطفوف ..
عشتي مأسات .. عالنهر عباس باقي بلا جفوف ..
خلي نهران الدمع تجريهه عينج ..
حسين مايرجع ولاترجع بنينج ..
صارت أحلام .. صارت أحلام
.............................
تربي عينج عالدرب منتظره الأخبار ..
االحزن فارش عباته ولاخبر سار ..
صابره وجمرة دليلج تستعر نار ..
جانت الشبان تطرد وحشة الدار ..
عندج اولاد.. أبد متقصّر ولا تخلف وعد ..
عندج أولاد .. ماوصل واحد شجاعتهم أبد ..
على فراك الأربعه الله اليعينج ..
حسين مايرجع ولاترجع بنينج ..
صارت أحلام .. صارت أحلام
...............................
شلون كلبج يالوفيه يحمل غياب ..
شابحه عيونج تناطر دكة الباب ..
بشوك تنتظرين يمته تعود الأحباب ..
ردتي بس واحد يهيل عليج التراب ..
بعد متعود .. ذيج جمعتكم وكعدتكم سوه ..
بعد متعود ..وجان وكت الظلمه عباسج ضوه ..
للزجيه بأربعه وفيتي دينج ..
حسين مايرجع ولاترجع بنينج ..
صارت أحلام .. صارت أحلام
.............................
فاطمه والله ونعم ربيتي الأسباع ..
تعبج وسهر الليالي والله ماضاع ..
كربّت ليج المنيه وردتي الأوداع ..
يلهج لسانج بأسمهم يبقه كلساع ..
ثاري الاولاد ..ماتقصّر أبد ويه الوالده ..
ثاري الأولاد .. ورد مات وأبد ماشاف النده ..
بلوعه وآهات وحزن خلصن سنينج ..
حسين مايرجع ولاترجع بنينج ..
صارت أحلام .. صارت أحلام
...........................
الولد وكت المنيه ألهه عازه ..
راد كلبج يلتقي بنبضه وأعزازه ..
والنعش بس بأربعه يصير أرتكازه ..
وأنتي محتاجه أربعه تشيل الجنازه ..
جوه التراب ..هاي أول ليله وحشه بالكبر ..
جوه التراب .. تفرحين بكمر هاشم من يمر ..
حتى وأنتي باللحد نسمع ونينج ..
حسين مايرجع ولاترجع بنينج ..
صارت أحلام .. صارت أحلام
...........................
بكربله لأم الحسن وفيتي نذرج ..
وانتي تنتظرينهم خلصتي عمرج ..
نزل وياج الكبر وأندفن صبرج ..
وردتي يَم حسين مو بالغربه كبرج ..
يَم الحسين .. للوفيه تنبني كبه وصحن ..
يَم الحسين .. للحيارى مرقدج يصبح وطن ..
وننصب هناك المواكب بأربعينج ..
حسين مايرجع ولاترجع بنينج ..
صارت أحلام .. صارت أحلام
.................................
حيدر مطر العبادي باز کردن / نظر دهید

2022-01-08 14:03:12 بالكلب شوك وحنين ...ارد ازور ام البنين
شاركت فاطمة الزهرة نفس الاحساس
هاي محسنهه شهيد وهاي عباس
يالوفيه .. يالوفيه.
...............................
راح اقره الفاتحه وأبدي كلامي ..
الج يابحر الكرم كل أحترامي..
الزجيه شابهت بنت الخزامي..
تشابهن باللوعه مو بس بالاسامي ..
هاي دم تجري الدمع ...وهاي مكسورة ضلع
للوفه دم المناحر صار مقياس..
هاي محسنهه شهيد وهاي عباس..
يالوفيه .. يالوفيه.
............................
وصت العباس عينك عالعقيله ..
ناظرك عن المخيم لاتشيله ..
انت كافل زينب الحره الاصيله ..
ما أريد الدمع بوجودك تسيله ..
ردتك لزينب سمه ....تمطر بيوم الضمه
أحبابي بعدك عالعقيله تبقى حراس..
هاي محسنهه شهيد وهاي عباس..
يالوفيه .. يالوفيه.
..............................
تعرف العباس من يوم الولادة..
حتى رمشة عينه تسبيح وعباده ..
قائد وتتشرف باسمه القياده ..
ويدري من الله الكرامه بالشهادة..
الغيره عنده من المهد ..تزيد ماتنقص ابد
وعمره خمس سنين شايل سيفه والطاس..
هاي محسنهه شهيد وهاي عباس..
يالوفيه .. يالوفيه .
..........................

قدمت اربع ولدهه فدوه لحسين ..
أنطت الوليان كلهه ووفت الدين ..
شاهدت منظر ابنهه وسهمه بالعين..
وشافته يم الشريعه بلايه جفين ..
وآلله شيال اللوه ....عدهه أغلى من الهوه
تفتخر يم الصميده وترفع الراس ..
هاي محسنهه شهيد وهاي عباس..
يالوفيه .. يالوفيه .
............................
بالحلم جن فاطمه الزهره الزجيه..
تكلهه يم عباس شكرا يالوفيه ..
القدمت لحسين كل غالي هديه ..
واجب أحضرهه أنه بيوم المنيه ..
بيدي أهيل انه التراب ....على الضحت بالشباب
وأقره قرأن على كبرج وأنثر الياس ..
هاي محسنهه شهيد وهاي عباس..
يالوفيه .. يالوفيه.
.....................................
صرنه كل جمعه نعاين بالملامح ..
الكلب عينه لظهورك والجوارح ..
ويانه حاضر بالمجالس ابو صالح..
يكلي يالرادوود كثر بالنوايح ..
خلي الطم واستثاب .... ياعظم هذا المصاب
على التحضر بالشدايد تشهد الناس ..
هاي محسنهه شهيد وهاي عباس..
يالوفيه .. يالوفيه .
...................................
لخادم الحسين
حيدر مطر العبادي باز کردن / نظر دهید

2022-01-03 00:54:02 ضلعي أنكسر وبصدري بسمار .. وجفوف أديه أحتركت بنار
ياوسفه أطيح على الترب .. مهضومه والمدمع يصب
وجفوف أديه أحتركت بنار
...................................
هجمت أعليه العصابه من رحل نور النبي
صوت أسمع وإن فاطم صاح حيل الناصبي
زمره ملعونه وخبيثه من الحرق حد السبي
وعلي مجتوف بوصيه والحسن بعده صبي

هاي الضغينه والحقد ليش .. أباب النبوّه أهل الغدر جيش
حسبالك بساحة حرب .. مهضومه والمدمع يصب
وجفوف أديه أحتركت بنار
...................................
يانبي الله ورسوله أشلون بابك يندفع
دمي عالحايط تناثر وأثر عالخد منطبع
الظالم بأيده سطرني عيني دم تجري ودمع
وطاح من عندي جنيني أوّن مكسورة ضلع

ما أكدر أنهض أزحف زحوف .. ريتك محمد حاضر تشوف
ترضه أم أبوها تنضرب .. مهضومه والمدمع يصب
وجفوف أديه أحتركت بنار
...................................
صحت يافضه أسنديني أتوجه عالحايط وأطيح
حيل هدتني الرزيه ربي سترك كمت أصيح
أنهض وأعثر وأطيحن مثل طير ملاكي ريح
جني أشوف الغاضريه حسين عالغبره ذبيح

كلما يأذيني الضلع حيل .. أبصدره أشوفن تسحك الخيل
محروم من ماي الشرب .. مهضومه والمدمع يصب
وجفوف أديه أحتركت بنار
......................................
تآمرت أهل السقيفه والنبي على المغتسل
كل قناع أنشال عنهم من مشه الهادي ورحل
على تشييعك محمد أبد ما واحد سأل
أتكفل بغسل الجنازه والدفن خير العمل

وكت الكلافه أتبين الناس .. ياهو الصديق وياهو وسواس
حتى العرف صارو غرُب .. مهضومه والمدمع يصب
وجفوف أديه أحتركت بنار
.........................................
سِمَعت الصوت وأجتني وشافت آثار الرفس
ركضت وشبكتني زينب تشعر بأمهه و تحس
وين حماي الحميه تهمس بأذني همس
خل أبوي يسل فقاره خل يرد أهل الرجس

أهل السقيفه أتمادت هواي .. بالنار رادت تحرق الماي
رادو خلافتهم غصب .. مهضومه والمدمع يصب
وجفوف أديه أحتركت بنار
......................................
لو متت باجر يحيدر كبل مايطلع فجر
بليل تدفني وصيتي وتخفي آثار الكبر
ما أوصييك أبنيني والعقيله أم الخدر
خاف بأرض الغاضريه بسوط يضربهه الشمر

لو راح محسن تلكه عباس .. نعم الأخو بي ترفع الراس
وخلافه للمجلس تطب .. مهضومه والمدمع يصب
وجفوف أديه أحتركت بنار
.......................................
حيدر مطر العبادي باز کردن / نظر دهید

2021-12-17 00:59:59 فاطم يمولاتي ياكرة العين ..
............................
يفاطم .. شوفي شيعة حيدره ..
يفاطم .. بالمجالس حاضره ..
يفاطم .. والدمع عالخد جره ..
وويلاه .. وويلاه
يفاطم .. احنه وقعنه العهد ..
يفاطم .. نقسم بواحد أحد ..
يفاطم .. أبد ماننساج أبد.
وويلاه .. وويلاه
بالمجلس ينهمل .عالزهره وعالطفل .
دمعي وأظل ألطم على الراس ..
واحبابج تنفجع . عالمحسن والضلع .
مأتمج باقي الكطع الانفاس ..
............................
كرامات .. عندج بكد السمه ..
كرامات .. كوثرج يروي الضمه ..
كرامات .. الدنيه بعدج مظلمه ..
وويلاه .. وويلاه
يزهراء .. بدارج الحركو حطب ..
يزهراء .. والبغضكم والنصب ..
يزهراء .. عليهم الباري غضب ..
وويلاه .. وويلاه
والكالولج وإن . زرعو بدارج حزن .
وأطفال تصرخ ظلت بصوت ..
وحيدر ظل ممتحن . يطحن بروحه طحن .
وأهون عليه من الجره الموت ..
...................................
يخدام .. خلو اديكم ترتفع .
يخدام .. عيونكم تهمل دمع .
يخدام .. الزهره مكسورة ضلع .
وويلاه .. وويلاه
يخدام .. نوحو وبحركه اللطم .
يخدام.. مثل نوح الفاكد أم..
يخدام.. الليله أمنه تنهضم ..
وويلاه .. وويلاه
يامشكاة الضوه .. يانسمات الهوه .
يجري اسمج بدم الشرايين ..
باجر يحجي الصدك . الباب المنطبك.
ويشهد غدر فعل الملاعين ..
.....................................
يشيعه .. منذبح ليش الورد ..
يشيعه .. الدفو غاطيه البرد ..
يشيعه .. أمنه راحت ماترد ..
وويلاه .. وويلاه
يشيعه .. هالليالي مؤلمه ..
يشيعه .. مصاب أمنه فاطمه ..
يشيعه .. الحزن برض وسمه ..
وويلاه .. وويلاه
ظلّت ذكره وصور . حيدر محني الظهر .
شلون الجبل مايكدر يكوم ..
ظل يخط بالجدم . ركن البيت أنهدم .
وعيونه أبد ماشافت النوم ..
...........................
يمهدي .. الجمعه نقرالك ندب..
يمهدي .. أظهر لهذا السبب ..
يمهدي .. خاطر تطفي الحطب ..
وويلاه .. وويلاه
يمهدي .. تربتك والمسبحه ..
يمهدي .. عيونهه تظل شابحه ..
يمهدي .. الليله أقره الفاتحه ..
وويلاه .. وويلاه
وحاسب أهل الغدر . لاتسمع أي عذر .
بيدك نريدك تاخذ الثار ..
وتقيم المحكمه . والظلمو فاطمه .
ياسيدي احركهم بنار ..
................................
حيدر مطر العبادي باز کردن / نظر دهید

2021-11-29 22:21:52 مستهل القصيده على طور مشتاكه وبعيد الدرب روحي الحاج باسم الكربلائي
أمي .. يالساكنه بوسط الكلب ..
أمي .. صدكيني غيرج ما أحب ..
أمي .. فراك الحنينه شكدصعب .. أمي
............................................
أمي باقة ورد يتناثر عطرهه ..
الجنه تحت أقدامهه الله نذرهه..
أمي حتى الصبر ياخذ من صبرهه..
أمي طيبه من رحت فدوه لعمرهه..
عاشت.. مابين لوعات وحزن..
عاشت.. لو أنهضم تبجي وتون..
عاشت.. من أمرض دموعج تصب.. أمي
.....................................
أتصفح أوراق الزمن وأقره بكتابه ..
الكال أفّ الأمه شيصير بشبابه ..
بوجهه كل خير ويسر مسدوده بابه ..
وكل دعاء الوالده ربنه أستجابه ..
تدعي .. الربيته بأحضاني طفل ..
تدعي .. على جنازتي يشد الحبل ..
تدعي .. يدفني أريده وينتحب .. أمي
.......................................
هزت الكاروك من عدهه أبتدينه ..
أمي دين الباري وبحبه أهتدينه ..
الخير بوجود الحنينه ترس أدينه ..
أمي شمس الله وتنّور عالمدينه ..
رايد .. كبل أمي أموتن وأندفن ..
رايد .. ولا أعيش آهات وحزن ..
رايد .. كبلج يغطيني الترب .. أمي
.................................
ربي خالق أمي كتله من المشاعر ..
لو رضت عني أبد ما أبقه حاير ..
لأم سوالف دافيه فدوه النواظر ..
شكبر حظه الترضه عنه أمه باجر ..
باجر .. يحتار وسط المكبره ..
باجر .. االيدفن أمه بالثره ..
باجر .. وياهه يتمنه يطب .. أمي
.........................................
تبقه أقدس ما خلق رب الجلاله ..
بحضرة أمي كل ورد ذب أستقاله ..
من على المنبر أريد أبعث رساله ..
فاز دنيه وآخره الأمه على باله ..
أدري .. اليرعاهه نال الغانمه ..
أدري .. ويرضى عليه رب السمه ..
أدري .. وما يدخل الجنه اليسب .. أمي
.........................................
أنتي باب الله الوسيعه الطيبه ذاتج ..
كل ركن بالدار شايل ذكرياتج ..
والله ستر الكون كله من عباتج ..
كل حياتي فدوه يايمه الحياتج ..
حقه .. الفاكد أمه ينفجع ..
حقه .. ويسيل نهران الدمع ..
حقه .. يا أصفه من ماي العذب .. أمي
......................................
حيدر مطر العبادي باز کردن / نظر دهید

2021-11-26 13:47:19 أحضر المجلس وأهِل دمعاتي ..
وألطم على أم الحسن مولاتي ..
...............................
بمجلس الزهره أون واعلن حداد ..
بالليالي الفاطميه ألبس سواد ..
حزني اكبر من ربيع ومن جماد ..
عالزجيه الطاهره باب المراد ..
ماتقصّر تقضي كل حاجاتي ..
.................................
الليله عن المرتضى يروح العشك ..
اشلون عن الزهره يكدر يفترك ..
الليله بالعبرات حيدر يختنك ..
تنسمع دكات كلبه من يدك ..
تكول هسه كربن ساعاتي ..
.................................
عالكبر حيدر يوّن بالمكبره ..
غسّل الزهره بدمع عينه الجره ..
بيده نزّل للكبر أعظم مره ..
دفن كل أحلامه ويه الطاهره ..
الماضي والحاضر رحل والآتي ..
...........................
ثمنطعش شمعه أنطفت لأم الحجاب ..
وصارت الاحلام أوهام وسراب ..
ترف غصن الورد ما يحمل عذاب ..
فاطمه الزهراء خدهه على التراب ..
وظلت تهل الدمع كلماتي ..
............................
بحزن يامولاتي نحضر هالعزاء ..
باللطم والنوح وأبيات الرثاء ..
حكهه تبجي عليج أملاك السماء ..
وعلى حسين المنذبح في كربلاء ..
ودمع عيني يحفر بوجناتي ..
..............................
اليوم كل شيعي موالي منفجع ..
يلطم على الراس ويهل الدمع ..
اليوم دينك يامحمد ينصدع ..
على البضعه الطاهره وكسر الضلع ..
وعلى السطره ياخلك مأساتي ..
....................................
حيدر مطر العبادي باز کردن / نظر دهید

2021-11-17 00:27:05 لسانه يحجي . وعينه تبجي ..
بابي من عظم المصيبه ..
ماكطع دمعه ونحيبه ..
لسانه يحجي .. وعينه تبجي
.......................
سولف الباب على الجره من الخجل تبجي عيونه ..
الما يدري بأصحاب الغدر عالطاهره يدفعونه ..
ما أكل يوسف ذيب أبد لا بيهه دم أسنونه ..
الباب ماعنده ذنب بالفاجعه يتهمونه ..
ناره كبره .. بكلبه حسره ..
عيونه عالمحسن قريبه ..
ماكطع دمعه ونحيبه ..
لسانه يحجي .. وعينه تبجي
......................
حارس العتره الطاهره محبوسه ليش أنفاسه ..
وملطخ بدم فاطمه من الجدم حد راسه ..
الحرس جان على الخدر مجروح ليش أحساسه ..
اشلون على بستان الورد يندفع يكطع ياسه ..
موّطي هامه .. من الندامه
وحالته حاله رهيبه ..
ماكطع دمعه ونحيبه ..
لسانه يحجي .. وعينه تبجي
............................
دوم بوجه كلمن سأل باب الكرم مفتوحه ..
المجروح للباب أعتنه حتمن تطيب جروحه ..
لو ميت كباله عبر باب الوفه ترد روحه ..
جا ليش بأعتابه أصبحت روح النبي مذبوحه ..
بصدره ناره .. ووجهه داره
من الظلم ماخذ نصيبه ..
ماكطع دمعه ونحيبه ..
لسانه يحجي .. وعينه تبجي
...........................
مايدري بسماره نبت بصدر الزجيه البضعه ..
كباله تلوج من الألم والباب يهمل دمعه ..
وجهه بوجه أم الحسن عالطفل تبجي وتنعه ..
العاش هاي النايبه بيا حال صاير وضعه ..
صعبه حاله .. من الجراله
وصارت أطباعه غريبه ..
ماكطع دمعه ونحيبه ..
لسانه يحجي .. وعينه تبجي
........................
أبصوت صاحت فاطمه لاتندفع يابابي ..
ريض شويه عالأقل حيل أرد أشد حجابي ..
يرضيك ياباب أنعصر وتبجي وتنوح أحبابي ..
أنه الأبد ما أنهضم متروسه دم أثيابي ..
وني سكته .. وتدري أنته
الطفل أيّس طبيبه ..
ماكطع دمعه ونحيبه ..
لسانه يحجي .. وعينه تبجي
...........................
مهضومه كالت فاطمه ياباب أرحم حالي ..
ردتك ألي عون وسند وردتك ستر لأطفالي ..
من عصرتك ضلعي أنكسر وخجلان أنته أكبالي ..
ما أكدر أندب ياعلي مقيود شفت الغالي ..
ردته يحضر .. أدري حيدر
ياخذ بثار الحبيبه ..
ماكطع دمعه ونحيبه ..
لسانه يحجي .. وعينه تبجي
..............................
حيدر مطر العبادي باز کردن / نظر دهید

2021-11-13 14:03:06 بجّه ملك الموت يوم أفراكهه ..
رحمة الله أبين أديه وباكهه ..
أمي أغله من العمر .. شلون ياخذهه الكبر
أمي .. أمي
..................
شايله طيبه ومحنّه سمه وتمطر بس حنان ..
الغاليه الجمعتنه كلنه ويمهه نشعر بالأمان ..
وصّه بيهه الباري خلّه جوه رجليهه الجنان ..
ماصخه الدنيه بلهاته الفاكد أمه بهالزمان ..
يمه جلمة بحلكي يامحلاهه ..
راحت وراح الحنان وياهه ..
العلمتني أعله الصبر .. شلون ياخذهه الكبر
أمي .. أمي
....................
كبل ما أحجي وأسولف وألهه بأسراري أبوح ..
أكبالهه من أكعد ثواني همومي تنزاح وتروح ..
يمهه راحت بالي جانت أمي بلسم للجروح ..
شيحمل فراك الحنينه حكي لو أبجي وأنوح ..
الغمّض عيون أمه بيده شلونه ..
كون وياهه يغمّض أعيونه ..
عيونه ظلمه بلا فجر .. شلون ياخذهه الكبر
أمي .. أمي
.....................
صافيه وعذبه العزيزه الماي من عدهه أرتوه ..
مو مثل بعض النساء غلاف بس ماكو نوه ..
والله ظلمه البيت صاير موحش بلايه ضوه ..
يعينه الله الراحت أمه بنار فركاهه أنجوه ..
أشلون بيه الراحت أمه من أيده ..
يبجي بس دمعاته أبد متفيده ..
حتى لو دمعه جمر .. شلون ياخذهه الكبر
أمي .. أمي
......................
كل ركن بالبيت شايل ذكريات أم الوفه ..
رحمة الله أبين أديهه من الألاه مشرّفه ..
تدعي جانت للمريض أنشاالله يشوف الشفه ..
أمي مليانه مشاعر كلهه حب وعاطفه ..
البلكلب تلكاه بطرف السانهه ..
الكون كله يشهد بأحسانهه ..
صارت أعيونه حمر .. شلون ياخذهه الكبر
أمي .. أمي
.......................
غبشت أعليهه المنيه وصوبت كلبي بسَهم ..
والنعش شال أمنياتي وحلمي صار أكبر وهَم ..
أجدامي من هول المصيبه ثكلت وحيلي أنهدم ..
أشسوت أبحالي الليالي والزمن كلش ظَلم ..
فدوه ملك الموت لتخليني ..
بلايه أم الباقي من أسنيني ..
بينهه وبيني شبر .. شلون ياخذهه الكبر
أمي .. أمي
.......................
اللحد ضيك عليهه وأمي أكبر مفخره ..
وَسدِت خدهه التراب وهيه وصتني تره ..
إبقه أول ليله يمي مره و تدري بالمره ..
تخاف من الظلمه حيل وحيل وحشه المكبره ..
عالكبر ضلت تصب ادموعي ..
صار حالي مثل حال أضلوعي ..
محني وبكلبي كسر .. شلون ياخذهه الكبر
أمي .. أمي
........................
حيدر مطر العبادي باز کردن / نظر دهید