الشاعر حيدر مطر العبادي

2021-07-18 01:09:41 هية ليلة وغيرت احوالي..
للصبح ظلت دموعي تلالي ..
ليله بيهه أشبع قهر .. ليلة الحادي عشر
...........................
وضع هاي الليله أبد ماينوصف ..
بيه بس حروف جر بلا عطف ..
النهر زعلان حيل على الجرف ..
يمه راعي الجود مر بأصعب ظرف ..
هاي ليله وأبد ما أنساهه ..
ودعت كل الأماني وياهه ..
وعيني ذبلهه السهر .. ليلة الحادي عشر
............................
ليله صعبه وبيهه أحس كلبي أنجوه ..
خاف أروح ويه الشمر أمشي سوه ..
بيهه أحسّن مختنك حتى الهوه ..
ظلمه دنيانه وندّور عالضوه ..
خنكه والدخان صاير غيمه ..
وآنه زينب بالعره بلاخيمه ..
والسمه بلايه كمر .. ليلة الحادي عشر
.............................
بقت بيه خوفه الشمر من الحرب ..
كام يشتمني وأنه بموقف صعب ..
ليله زينب بيهه كامت تنضرب ..
الدنيا مدري شمالهه وماتنكلب ..
شفت أحمر كلشي صاير لونه ..
الغيم يبجي دموم من أعيونه ..
نزل دم حتى المطر .. ليلة الحادي عشر
...............................
شلون ليله بيهه خدي ينسطر ..
وآنه عشت مدلله طول العمر ..
آنه زينب ويني ووين اليسر ..
شلون أمشي ويمشي وياي الشمر ..
أنه المحد شاف أبد خطواتي ..
لليسر أمشي وتصب دمعاتي ..
عفيه كلبي أشكد صبر .. ليلة الحادي عشر
..............................
ليله صعبه وشيبت راس الطفل ..
أخواني راحو مارجع واحد عدل ..
ليله صعدت بيهه زينب عالهزل ..
دمع يجري وأيد مجتوفه بحبل ..
عكب عينك يالكمر شتموني ..
وأنطبع سوط الشمر بمتوني ..
وأنت مرمي على النهر .. ليلة الحادي عشر
...........................
هيه ليله وبيهه جدمي شكد عثر ..
رغم عدله الكاع بس جنهه حفر ..
والحوافر ترسن الحومه وذر ..
صعبه هاي الليله حسبالك شهر ..
هاي ليله وجنهه أبد موليله ..
حيلي والسجاد منهد حيله ..
ليله وتعادل دهر .. ليلة الحادي عشر
...............................
حيدر مطر العبادي باز کردن / نظر دهید

2021-07-15 22:49:41 دم وضوه يجري النحر ... شفت السهم طفه الكمر ..
ظل كلبي حايط للحزن .. للخوّه بس شايل صور ..
........................................
من أبعيد أعاين وأنتظر هلبت تجيني أخباره
عالتل شفت عين الكمر دم ودمع تتجاره
خجلان من عندي أشكثر والسهم طفه أنواره
واتبده غيره ومرجله ودلالي شبت ناره
الطاح ميلمه النعش ..والجود يشكي من العطش ..
وأجفوف شيال اللوه .. مكطوعه وآنه أشبع قهر ..
...........................................
دمعّت عيني وما بجت خفت الدموع تلجمه
والسهم مشتاك امن اجه من عينه راد يشمه
سافر كمر من دنيتي حسدت ضواه جم نجمه
مو عميه هيه المشكله ما ارهم اويه الظلمه
من لبّسوا نوره الدمه ... وحشه وبقت عميه السمه ..
ونجومها تباجت ضوه ... ياهو اليردلهه النظر ..
..........................................
دليت ردني اعله الدمع من ابجي يفزع وحده
يرجع شما غاب الكمر ما ينشبع من عنده
بس كمر هاشم بالسفر طوّل بعد شيرده
لو شاف جرحي وما اله جفين بيش ايشده
جرحي شكثر عكبه انلجم ... يباوعلي ويمنعه السهم ..
جفينه ظلن ع الجرف ... من الله لا يطي النهر ..
............................................
ما تعثر النار بخيم تركض وتحرك بيهن
بجفوفها فاس الحقد بي كسّرت رجليهن
طاحن بطيحة كافلي راح الكبل واليهن
وتبدت الجربه وبعد يا علكمي يطفيهن
ياهو اليطفيلي الخيم .... والماي بالجربه انعدم ..
طفوا كمرنه وما طفت .... والعين يلجمهه السهر ..
........................................
يلجمني جرحي وما أهم عندي المهم عباسي
من شفته حتى التل بجه وبيّن الشيب براسي
ادري انه حيل تغيرت بس باقي نفس احساسي
لو شفت عاكول انجرح اركضله انه وياسي
ادري الملامح شيبن .... اطباعي ما يتبدلن ..
من أمي اني أتعلمت ... أمن الزهره يكفيني فخر ..
.........................................
احتاريت اشدن يا جرح من شفته طايح دامي
مدري أركض آنه على الكمر مدري أركض اعله ايتامي
المن عنده مبيوك الضوه راسه أنرفع كدامي
بالطف عشت خوف وبجي وداست الخيل أحلامي
بالحومه ماظل كل ضوه ... والخنكه داست ع الهوه ..
ياخويه عني من رحت .. كلبي أحس بيه أنكسر ..
............................................
حيدر مطر العبادي باز کردن / نظر دهید

2021-07-15 15:19:55 بجّه ملك الموت يوم أفراكهه ..
رحمة الله أبين أديه وباكهه ..
أمي أغله من العمر .. شلون ياخذهه الكبر
أمي .. أمي
..................
شايله طيبه ومحنّه سمه وتمطر بس حنان ..
الغاليه الجمعتنه كلنه ويمهه نشعر بالأمان ..
وصّه بيهه الباري خلّه جوه رجليهه الجنان ..
ماصخه الدنيه بلهاته الفاكد أمه بهالزمان ..
يمه جلمة بحلكي يامحلاهه ..
راحت وراح الحنان وياهه ..
العلمتني أعله الصبر .. شلون ياخذهه الكبر
أمي .. أمي
....................
كبل ما أحجي وأسولف وألهه بأسراري أبوح ..
أكبالهه من أكعد ثواني همومي تنزاح وتروح ..
يمهه راحت بالي جانت أمي بلسم للجروح ..
شيحمل فراك الحنينه حكي لو أبجي وأنوح ..
الغمّض عيون أمه بيده شلونه ..
كون وياهه يغمّض أعيونه ..
عيونه ظلمه بلا فجر .. شلون ياخذهه الكبر
أمي .. أمي
.....................
صافيه وعذبه العزيزه الماي من عدهه أرتوه ..
مو مثل بعض النساء غلاف بس ماكو نوه ..
والله ظلمه البيت صاير موحش بلايه ضوه ..
يعينه الله الراحت أمه بنار فركاهه أنجوه ..
أشلون بيه الراحت أمه من أيده ..
يبجي بس دمعاته أبد متفيده ..
حتى لو دمعه جمر .. شلون ياخذهه الكبر
أمي .. أمي
......................
كل ركن بالبيت شايل ذكريات أم الوفه ..
رحمة الله أبين أديهه من الألاه مشرّفه ..
تدعي جانت للمريض أنشاالله يشوف الشفه ..
أمي مليانه مشاعر كلهه حب وعاطفه ..
البلكلب تلكاه بطرف السانهه ..
الكون كله يشهد بأحسانهه ..
صارت أعيونه حمر .. شلون ياخذهه الكبر
أمي .. أمي
.......................
غبشت أعليهه المنيه وصوبت كلبي بسَهم ..
والنعش شال أمنياتي وحلمي صار أكبر وهَم ..
أجدامي من هول المصيبه ثكلت وحيلي أنهدم ..
أشسوت أبحالي الليالي والزمن كلش ظَلم ..
فدوه ملك الموت لتخليني ..
بلايه أم الباقي من أسنيني ..
بينهه وبيني شبر .. شلون ياخذهه الكبر
أمي .. أمي
.......................
اللحد ضيك عليهه وأمي أكبر مفخره ..
وَسدِت خدهه التراب وهيه وصتني تره ..
إبقه أول ليله يمي مره و تدري بالمره ..
تخاف من الظلمه حيل وحيل وحشه المكبره ..
عالكبر ضلت تصب ادموعي ..
صار حالي مثل حال أضلوعي ..
محني وبكلبي كسر .. شلون ياخذهه الكبر
أمي .. أمي
........................
حيدر مطر العبادي باز کردن / نظر دهید

2021-07-14 22:47:07 من واحد محرم بيتدي عمري ..
عالخدين دمعي من الزغر يجري ..
خلص كل عمري عاشور .. أون وكلبي مكسور
...............................
آنه وي شهرك محرم عمري أحسّنه أبتده ..
من الزغر ألطم وأنوح بحضن أمي الوالده ..
حسين كل عمري وحياتي والله لعيونه فده ..
ودنيتي بلايه مجالس ورد ومفارك نده .
آنه من الولاده حسين محبوبي ..
عليه أسود لبست من الزغر ثوبي ..
ودمع أعيوني ناعور . أوّن وكلبي مكسور
.................................
يبتدي بواحد محرم عمري بس أبجي وأنوح ..
ترفرف الرايات سوده للحزن فوك السطوح ..
من يهل أهلاله أعيش أبين طعنات وجروح ..
بلا شعور أجدامي تمشي تريد للمجلس تروح ..
من يوم الولاده الدمعه بعيوني ..
وآنه بالمهد خادم يسموني ..
على الخد دمعتي تفور .. أون وكلبي مكسور
..........................
تبدي آهاتي وعذابي وي محرم من يهل ..
حتى رمش العين شّيب من وكت وآنه طفل ..
شما تشم دخان ريتي وعيني لو شافت حبل ..
أشعر بلوعة رقيه ونار كلبي تشتعل ..
كل هاي المواقف عايشه أبالي ..
وسكينه بلايه خيمه بعازة الوالي ..
ويمهه ذبحو النور .. أون وكلبي مكسور
............................
بلوعه وآهات ومآسي أستقبلت هذا الشهر ..
أهلاله مرسوم على وجهه دمعه وأحزان وقهر ..
وبيه أشوف أجفوف طاحن لأبو فاضل عالنهر ..
وشفت حافر خيل شال لصدر ابو اليمه وذر ..
أحس حتى الهوه مخنوك بأنفاسي ..
ومأساة العقيله تعيش بأحساسي ..
من أطبر راسي معذور .. أون وكلبي مكسور
.............................
أشسوت بحالي المصيبه آآيعملة كربله ..
وتسعر النار بدليلي عالحرم والعايله ..
النهر خجلان طايح يمه راعي المرجله ..
وزينب بلايه كفيل وصوت الأطفال أعتله ..
راح اليروي جفه كل عطش بينه ..
لازم ظهره بيده بلا أخو حسينه ..
عليه العسكر أتدور .. أون وكلبي مكسور
..............................
بيوم عاشر يبو الأكبر على الغبره من طحت ..
والشمر حز الوريد شكد بجيت شكد نحت ..
راحت وياك الأماني يبو اليمه من رحت ..
ياحسين وياحسين بصوت من كلبي صحت ..
يهل عاشور ويهل دمعي بخدودي ..
وألطم بالمجالس وأوفي بعهودي ..
اليلطم صدره مأجور .. أون وكلبي مكسور
................................
حيدر مطر العبادي باز کردن / نظر دهید

2021-07-14 01:18:31 الحسين أشلون أنسه أفضاله ..
على فراش الموت هم أقراله ..
........................
مجلسك هالسنه لو منه أنحرم ..
موكب الزنجيل تطبير ولطم ..
ياحسين الما يخدمك ينهضم ..
خدمة حسين بسّجل أعماله ..
.........................
أن شاء الله كل المساجد تنفتح ..
أبمجلسك يحسين صدري ينشرح ..
أقره مجلس لحد ما يطلع صبح ..
اللطم صدره أبمجلسك هنياله ..
..........................
والله هنياله التصب عينه الدمع ..
وحاضر ويانه العزه ويعلك شمع ..
لا حظر تجوال خاف و لامنع ..
يستثاب يريد جاب أطفاله ..
..................................
جاب كل أطفاله بالمجلس حضر ..
حتى واحد عمره يمكن بس شهر ..
طلّع أيده من الكماط وما صبر ..
يلطم وخله الدمع يبراله ..
..............................
لوشهر عاشور بأحزانه أبتده ..
دمعي ينزل عالورد مثل النده ..
حسين عَبره وعِبره والبيه أقتده ..
تعيش مأسات الطفوف أباله ..
...............................
من تهل علينه ياشهر الحزن ..
أه يحسين ومصابه نظل نوّن ..
بالمجالس كون أموتن وأندفن ..
الكبري أروح ودمعتي هماله ..
............................
يالحضرت المجلس بعينك تشوف ..
تعيش صوره وصوت مأسات الطفوف ..
وتبجي عالعباس مكطوع الجفوف ..
الشافت أرض الغاضريه أفعاله ..
................................
يامصاب حسين ما مثله مصاب ..
حيل عالمظلوم نلطم يا شباب ..
الصرف درهم واليوّزع بيه ثواب ..
والله يتضاعف عليه بأمواله ..
..............................
حيدر مطر العبادي باز کردن / نظر دهید

2021-07-13 15:16:39 أبقه للموت حسيني .. أبقه للموت ..
حسين رفعت راسي .. والهوه البنفاسي
أبقه للموت حسيني .. أبقه للموت ..
....................................
آنه أبوي على الخدامه من الزغر رباني ..
حسين معشوكي الوحيد وما أبدله بثاني ..
من كثر ما أذكر أسمه منطبع بلساني ..
آه يحسين ومصابه عايشه بوجداني ..
ياحبيبي الغالي .. عايش بدلالي
ابقه للموت حسيني .. ابقه للموت ..
...................................
حسين فاتحة الكتاب وقل هو الله أحد ..
على نهجه أمشي دوم وأبد ما أعوفه ابد ..
يبتعد عن جنة الله ال عن الحسين أبتعد ..
كلمن يموت على حبه موتته أحله من الشهد..
أغله من عيوني .. بحبه لا تلوموني
أبقه للموت حسيني .. أبقه للموت ..
...............................
ألتزم دوم بصلاتي ولحظه ماأنساهه ..
حسين من أجل العقيده حتى روحه أنطاهه ..
شرف هاي الخدمه عندي وبيهه دوم أتباهه ..
بيه سبع حظوظ خلت خدمته شمحلاهه ..
يبقه دمعي يلالي .. خادم وهنيالي
أبقه للموت حسيني .. أبقه للموت ..
...............................
كل سنه بلهفه المحرم ابقه دوم مناطر ..
كاشخ انه بثوب الأسود بالمجالس حاضر ..
وألطم على الراس وأبجي بحركه يوم العاشر ..
أجعلني ياربي وجيها للحسين وناصر ..
حسين رافع شاني .. أبد ما ينساني
أبقه للموت حسيني .. أبقه للموت ..
...............................
تمشي وي دمي الخدامه بالكلب مشدوده ..
ياحسين وكربلاء بكل وكت موجوده ..
مايفاركني المخيم والكمر وأزنوده ..
موتتي بمجلس حسيني أمنيه ومريوده ..
على حب حسيني .. كون تغمض عيني
أبقه للموت حسيني .. أبقه للموت ..
................................
آنه خادم للعقيله ودمعتي تبرالي ..
راح من عدهه الكفيل وراح منهه الوالي ..
جبل ياصبر العقيله ودعت جم غالي ..
تصعد الناكه سبيه أم الخدر بالتالي ..
لبوه ويجتفونهه .. والدمع بعيونهه
أبقه للموت حسيني .. أبقه للموت ..
.................................
حيدر مطر العبادي باز کردن / نظر دهید

2021-07-13 02:22:04 ماهمني المرض بس همني الفراك ..
لحسين الكلب كل لحظه يشتاك..
عليله ووحدي ظليت.. وحشه خلافك البيت
لحسين الكلب كل لحظه يشتاك ..
...........................
فاطمه أنه العليله عند ألحسين شغلاتي..
فاركت اهلي الاحبهم والمرض هدم حياتي..
بكل ركن بالدار أشتم ريحة أهلي وذكرياتي ..
أعزاز راحو عالهوادج حمّلو كل أمنياتي ..
جنت أغفه كبل بأحضان الحسين..
وهسه انه وحيده وتهمل العين..
عني شما يبعدون .. أهلي بوسط العيون
لحسين الكلب كل لحظه يشتاك ..
..............................
أهلي لمّن ودعوني ودعّت عزي ودلالي..
فاركت عيني المنام خلافهم وحشه الليالي..
يمته أغفه ابحضن أبوي ونلتم ويرتاح بالي..
كلبي يلجمني ويكلي ماكو رجعه للغوالي ..
البنت بحضن ابوهه تنسى الآهات..
بس كلبي يكلي والدج مات..
أيسي ولاتظنين.. بعد يرجعلج حسين
لحسين الكلب كل لحظه يشتاك ..
.................................
شابحه عيوني على بابي وأنه اتنطر يجوني..
شما يزيد المرض بيه أفكد أهلي الفاركوني..
حايره وأحسب ليالي ودمعي مافارك أعيوني..
ما وصل مرسال منهم وبسفرهم عذبوني..
عيني على الدرب وأنطر مراسيل..
المرض هدالي حيلي و دمعتي تسيل ..
بوكت المغربيه .. أتذكر رقيه
لحسين الكلب كل لحظه يشتاك ..
...............................
عندي كابوس بمنامي جنت أشوفه بكل مسيه..
مرمي عالتربان ابوي ومنذبح بالغاضريه..
وعمتي زينب سبيه وعالهزل سكنه ورقيه ..
ومن أفز دمعي يتلاله وأمسح دموعي بأديه ..
عكب ذاك الدلال وذيج الايام..
المحد شاف ضلهن أسره بالشام ..
هاي أضغاث أحلام .. لو محروكه الخيام
لحسين الكلب كل لحظه يشتاك..
..............................
لاخبر منهم وصلّي وأنه أتاني ليله ليله..
أهلي ميكطعون بيه وهمه يدروني عليله..
لا حسين ولا أبو فاضل لاخبر من العقيله..
بداخلي أحساس ويكلي حيل سفرتهم طويله..
أصيحن آه صوتي من يسمعه ..
من أهلي وأخوتي ماكو رجعه..
زغيره على الرزيه.. طفله انه شبديه
لحسين الكلب كل لحظه يشتاك..
......................................
بيدي راح أكتب رساله تحمل آهاتي وسلامي..
عتب وأشواك ومحبه وأختصر بيهه كلامي..
شعطّل ضعون الغوالي أهلي واخواني وعمامي..
خايفه من الغاضريه وموت أشوفنهه بمنامي..
ردت شوفت هلي كبل المنيه..
دخيلك يا علي من الغاضريه..
والله شمحله موتي.. بين أهلي وأخوتي
لحسين الكلب كل لحظه يشتاك ..
........................................
حيدر مطر العبادي باز کردن / نظر دهید

2021-07-12 23:33:53 خادم أنه المنبرك يبن الزجيه ..
وتبقه يحسين الهويه رافضيه ..
خادمك طول العمر.. وأدري تحضر بالكبر
وتبقه يحسين الهويه رافضيه ..
............................................
أنه خادم وأفخر بهذا ولائي ..
يبقه بأسمك يرتفع صوتي وندائي..
كربلائي كربلائي كربلائي ..
يشهد الله لا مغالي ولا ريائي ..
لساني بأسمك يلهج ليوم المنيه..
وبالمجالس تشهد عيوني وأديه..
بدمعي وبلطم الصدر .. وأدري تحضر بالكبر
وتبقه يحسين الهويه رافضيه ..
......................................
كل موالي ساكن حسين بضميره..
حسين هوه الوالد وهوه العشيره..
المايوالي حسين مشكلته جبيره..
باجر بيوم الحشر ياهو نصيره..
أنه كل قطره بدمائي حيدريه..
وأبد ما أنسه كسر ضلع الزجيه..
أطبر أمشي على الجمر .. وأدري تحضر بالكبر
وتبقه يحسين الهويه رافضيه ..
.....................................
ياحسين وبالمجالس دمعي يجري ..
بالمواكب دوم زنجيلي على ظهري..
أنه دوم أحيي الشعائر والله يدري..
ولو شربت الماي أذكرك طول عمري..
شما يمر عاشور انصبلك عزيه..
وللعقيله زينب وسكنه ورقيه..
والهواشم والخدر .. وأدري تحضر بالكبر
وتبقه يحسين الهويه رافضيه ..
.........................................
شما شفت طفله يتيمه تذوب روحي ..
أذكر الصار لرقيه يزيد نوحي ..
خضره تنزف وأبد مانشفت أجروحي..
يادمعتي سولفي وبأسراري بوحي..
يبقه دمعي يسولف اسراري الدفينه..
على السكنو كربله وارض المدينه..
سنين عمري ألهم نذر .. وأدري تحضر بالكبر
وتبقه يحسين الهويه رافضيه ..
.................................
من يمر عاشور البس سود الهدوم ..
حيل أون وأبجي المصابك آه يمظلوم..
بدمعه وأهات وعذاب وحسره وهموم..
وابقه واليوم اربعينك كلبي ملجوم ..
شلون أنسه المرمي عاري على الوطيه ..
ظل ثلث تيام بأرض الغاضريه ..
تربع بصدره الشمر .. وأدري تحضر بالكبر
وتبقه يحسين الهويه رافضيه ..
....................................
علمّاني الوائلي شنهي الخدامه..
والزغير والرميثي أكبر علامه ..
وكاظم المنظور دوم معلي هامه ..
والله هنياله الأخذ منك وسامه ..
ووطن لو رد القصيدة المنبرية..
يصّبن عيوني الدمع غصبن عليه..
حقنه بيهم نفتخر .. وأدري تحضر بالكبر
وتبقه يحسين الهويه رافضيه ..
.........................................
لخادم الحسين ع
حيدر مطر العبادي باز کردن / نظر دهید

2021-07-12 23:25:47 لاتتكبر مادامك خادم لحسين..
تكبر لوتحضر مجلس و تهل العين..
والخادم لحسين يطيعه.. يمشي بمنهاجه وتشريعه
تكبر لو تحضر مجلس وتهل العين ..
...................................
كل عاشور أمي تحضرلي هدومي السود ..
وتنطيني الزنجيل وقامه ورايه وجود ..
وأحمد ربي شما عاشور عليه يعود ..
يارب كون بعاشور القادم موجود ..
جانت أمي تلوليلي بدمعات ونوح ..
وأذكر عبد ألله بحضن حسين ومذبوح ..
وتهل أدموعي بأحلامي .. عالمذبوح ونحره الضامي
شفته بأحلامي يرفرف طير بجنحين ..
تكبر لوتحضر مجلس و تهل العين ..
..........................................
مأجور الرادوود اليقره وكل لطام ..
كل خادم لحسين يظل مرفوع الهام ..
وأشكر ربي الخلاني أخدم هذا العام ..
والزهره تسجل كل أسماء الخدام ..
كلمن يحضر يسّجل يم الزهراء ..
بيوم المحشر وي الاصحاب السعداء ..
كل مخلص طابت أنفاسه .. بالخدمه يظل رافع راسه
وكل دمعه تضويلك شمعه بيو البين ..
تكبر لو تحضر مجلس وتهل العين ..
.......................................
كلما تتواضع يالخادم ملك اتصير ..
ومن تلطم هل الدمعه وعوف التصوير ..
وأحضر بالزنجيل وشارك بالتطبير ..
باجر تاج حسين يلبسّك لا لتحير ..
خدام حسين التتفاخر حد الموت ..
وأحرار العالم خل تسمع هذا الصوت ..
ودوم يظل راسك بالعالي .. خادم لحسين ومتبالي
منهج خطه حسين وشعشع نور الدين ..
تكبرلو تحضر مجلس وتهل العين ..
......................................
كبّر تكبيره وصلّه أبيّن العدوان ..
متعني حسين الحومه بكلبه الايمان ..
صلي بوكتك من تسمع صوت الاذان ..
هيج حسين يريد المبدأ والعنوان ..
ويريدك قدوه وتتفاخر بيك الناس ..
من عنده اخلاقك تاخذهه ومن عباس ..
والخادم كلمه شمعناهه .. بميزان أعمالك تلكاهه
والميزان بكيفك انت وبيه جفين ..
تكبرلو تحضر مجلس وتهل العين ..
..........................................
لا تتكبر لا تتراءه ولا تغتاب ..
خاطر بيمينك ينطيك الباري كتاب ..
بأعمالك تفتح للجنه هواي أبواب ..
وحتمن لأجلي ولأجلك دم حسين خضاب ..
لأجل المذهب ضحه حسين وللاصلاح ..
بوجه الطاغوت وكل باطل حبه سلاح ..
حبك مقياس الأيماني .. بس واحد ما أعشك ثاني
مطلوبين ولازم كلنه نوّفي الدين ..
تكبرلو تحضر مجلس وتهل العين ..
...................................
حسين يريد الخادم قدوه لكل الناس ..
ما ينغر يوم ويحذر من كل وسواس..
لهلبنيان العالي حسين الخله الساس ..
ولأجل المذهب أنطه الجفين العباس ..
ما رايد منك منظر رايد مضمون ..
بأرض الطف سجّل موقف حتى الميمون ..
بالمحشر لا ماينسانه .. حسين بموكب يتلكانه
باجر بالمحشر وي عابس وأبن القين ..
تكبرلو تحضر مجلس وتهل العين ..
.................................................
حيدرمطر العبادي باز کردن / نظر دهید

2021-07-12 00:35:29 عين تقره الواقعه .. وعين تنعى الفاجعه
هاذه حال أم البنين بفكد الأولاد ..
عنهه من كرب أجلهه صارو أبعاد ..
والله حيره .. والله حيره
.........................
تضحيات أم الغيارى ماكو منهه ..
ماشطت فرعون ماحزنت حزنهه ..
الكواكب والكمر رضعت لبنهه ..
شكد عظيمه الوالده العباس أبنهه ..
ياعظم هاي المره .. عالنوايب صابره
فاكده مو كبد واحد أربع أكباد ..
عنهه من كرب أجلهه صارو أبعاد ..
والله حيره .. والله حيره
...........................
تذكر الوليان وكت المغربيه ..
شما تدير العين تلكه الغاضريه ..
تريد واحد يحضر بيوم المنيه ..
أربعه ولحسين أنطتهم هديه ..
تكول لو باجر أروح .. عالكبر ياهو الينوح
ياهو يقرالي دعاء ويقره الأوراد ..
عنهه من كرب أجلهه صارو أبعاد ..
والله حيره .. والله حيره
.............................
والله ياناس الوِلد عازتهه عازه ..
ياعظم عباس وبأمه أعتزازه..
ويه جبرائيل ساعتهه أيتوازه ..
يطلع من الكبر ويشيل الجنازه ..
يعتني أمه بلا جفوف .. مبّخر بعطر الطفوف
عالكبر يجري دمعته وحزنه يزداد ..
عنهه من كرب أجلهه صارو أبعاد ..
والله حيره .. والله حيره
................................
رغم فكد الأربعه شكد شيباهه ..
بس بقت للموت مفتخره برباهه ..
الجنازه لو مشت محد وراهه ..
هاي معناهه الكبر غيّب ضناهه ..
تنطي كل غالي وتكول .. مقصره حيل ويه البتول
أحنه لأجل الدين مانبخل بالأعداد ..
عنهه من كرب أجلهه صارو أبعاد ..
والله حيره .. والله حيره
.............................
أنمرد جبد الوالده بفكد الميامين ..
والله بفراك الغوالي اللحظه سنتين ..
حايره من تموت ياهو يغمض العين ..
وتلهج بأسم أبو فاضل وأسم الحسين ..
كبل ماتدفنهه كاع .. ويه الوِلد رادت وداع
روس ظلت كل ولدهه بلايه أجساد ..
عنهه من كرب أجلهه صارو أبعاد ..
والله حيره .. والله حيره
..............................
بقت تسعر بالكلب جمرات العتاب ..
من يشيعون النعش بغياب الأحباب ..
نفترض عباس حاضر هذا المصاب ..
شلون أبو جفوف الكطيعه يهيل التراب ..
أبو فاضل ترتجي .. ها يجي ها مايجي
ويه الأماجد عدهه بالفردوس ميعاد ..
عنهه من كرب أجلهه صارو أبعاد ..
والله حيره .. والله حيره
.............................
حيدر مطر العبادي باز کردن / نظر دهید