الشاعر حيدر مطر العبادي

2022-04-21 11:21:18 كعديه لوفاة امير المؤمنين الأمام علي ع
واويلاه .. راعي اليتامه ..
واويلاه .. مطبوره هامه ..
بمحرابه حامي الجار ..
وبسجدت أستغفار ..
مطبوره هامه ..
.........................
ويلي من الگلب تطلع تذهل وصعبه الرزيه ..
بيمن يخلص حياته الماله حماي الحميه ..
منجرح بس اليتامه نصبت الجرحه عزيه ..
يدرون اذا راح الولي ..
محد يسد خلت علي ..
بهل دنيا وليه تنولي ..
ومحد يكلهم خطيه ..
ناس اشرار ... من بعده تحكم ..
ناس اشرار ... للفقره تظلم ..
آه الوكت لو جار ..
وبسجدت أستغفار ..
مطبوره هامه ..
........................
حيدر الحاكم العادل والظلم راحت أيامه ..
أمنيات الفقره شايل وراسم أحلام اليتامه ..
حاضره حتى بصلاته بالتشهد والأقامه ..
شرّع قوانين ونظم ..
مابيهه ذره من الظلم ..
محد بحكمه ينهضم ..
كلمن يعيش بسلامه ..
بالمحراب .. يناجي بخشوعه ..
بالمحراب .. تنزل أدموعه ..
يدري الخصم غدار ..
وبسجدت استغفار ..
مطبوره هامه ..
...........................
نعقت بدربه النواعق وهوه متعني لصلاته ..
أبد ما رجّعت حيدر وأبد فرض الصبح فاته ..
محد مسويهه قبله بالركوع أنطه زكاته ..
شد الحيازيم ونوه ..
والباب سداه الهوه ..
عالتربه يتطشر ضوه ..
وينغدر آخر حياته ..
آخر يوم .. وصه الوصيه ..
آخر يوم .. قبل المنيه ..
صار العِلم طشار ..
وبسجدت أستغفار ..
مطبوره هامه ..
.....................
صار لون الوجه أصفر ومنه ملك الموت يكّرب ..
عاليمين الحسن حاضر وعالشمال حسين ينحب .
ونهر عالخد المدامع يساعد الله كلب زينب ..
الكسّر اللات وهبل ..
يشوفون بعيونه الأجل ..
وسّبل أديه خير العمل ..
موقف من الصعب أصعب ..
وملك الموت .. يم راسه ناده ..
وملك الموت .. شاف الوساده ..
منه الدمع مدرار ..
وبسجدت أستغفار ..
مطبوره هامه ..
........................
ياعظم هاي المصيبه والحسن عذبت حاله ..
دموعه هماله على خده وعالأبو يكثر سؤاله ..
وحسين مابطل ونينه ودّع سنينه ودلاله ..
وشلون زينب تقتنع ..
الراح ميرّجعه الدمع ..
ماناسيه كسر الضلع ..
بس توّن كعدت أكباله..
رب الكون .. هوّن عليهم..
رب الكون .. وأنته أدره ييهم ..
عترت نبي وأطهار ..
وبسجدت أستغفار ..
مطبوره هامه ..
........................
ياطعم ذيج الليالي البيهه ابوالحسنين حاضر ..
يمسح دموع اليتامه ولا فقير اليبقه حاير ..
دولة أنصاف وعداله لا ظلم لا حكم جائر ..
كل جرح صايرله دوه ..
العطشان لو شافه أرتوه ..
كل الشعب عنده سوه ..
وما جرح يوم المشاعر ..
ليل نهار .. شعبه على باله ..
ليل نهار .. يسمع سؤاله ..
بعدله الخصم محتار ..
وبسجدت أستغفار ..
مطبوره هامه ..
.........................
حيدر مطر العبادي باز کردن / نظر دهید

2022-04-20 12:36:11 على طور يامحله الوداع بهالمسيه

عليك أتوّن يبو حسين اليتامه ..
بدموع الملامه ..
تمنّت ياعلي تكوم بسلامه ..
......................................
أمير المؤمنين انصاب بالمحراب . على سجادة صلاته ..
كتاب ألله أنطبر ينزف عِلم وآيات .وبسيف الشماته ..
ياليل الموادع ليلة العشرين . وي ولده وبناته ..
يودع فاطمه الزهراء بآخر يوم . جانت امنياته ..
المابطل دمعهه .. من كسرت ضلعهه
وره الباب أنكسر جنح الحمامه ..
...................................
فطورك بس تمر والخبزه بالماعون . شاهد عالبساطه ..
الزاهد بالحياة وراضي بالمقسوم . بالباري ارتباطه ..
ضرغام الحروب ويشهد الفقار .نهج الحق صراطه ..
رفع أيده النبي بيوم الغدير وصاح . بلا قربه ووساطه ..
هذا أول خليفه .. مو أهل السقيفه
اليواليه يرتفع قدره ومقامه ..
........................................
ألله يساعد السبطين هذا اليوم . ويعين العقيله ..
على المحنه الجبيره وبليالي الصوم .يقروله العديله ..
زينب والحسن وحسين والأيتام . عليهم أقسه ليله ..
صبغ لون الوساده دم أبو الحسنين . والمحنه ثجيله..
بعد أمنه الزجيه .. انطبر حامي الحميه
أبن ملجم غدر شاطرله هامه ..
........................................
ظل صوت اليتامه ينادي يابو تراب .ريض ياولينه ..
بعدك ياهو يمسح دمعة المسكين . ويسّكت ونينه ..
محد يلتفت ويدك عليه الباب . غيرك يا علينه ..
دخيلك ياعلي لا ترحل أترجاك . يبو الروح الحنينه ..
لا ترحل يغالي .. يمنور الليالي
يالنورك محه الليل وظلامه ..
..........................................
برمضان ومحرم تكثر الآهات . وتزيد المواجع ..
نبقى نصوم كلنه ونفطر بحسرات .وتسيل المدامع ..
على اول خليفه المرتضى الكرار . الكالو عنه رابع ..
مجالس بالحسينيات وقرايات . ومن نلطم نبايع ..
عالفطره عشكناك .. لحد الموت وياك
كل شيعي يظل حبك وسامه ..
........................................
أركان الهدايه تهدّمت وآللاه . من راح الصميده..
يظل للموت كل شيعي فلا ينساه . دم يجري بوريده ..
يظل أسمك شرف بيه تفخر الأجيال . يا أجمل قصيده..
نصرخ ياعلي الكرار حامي الجار . الما عيد بعيده ..
صرخه حيدريه .. تسمعهه البريه
الما يصرخ يعض أصبع ندامه ..
.........................................
حيدر مطر العبادي باز کردن / نظر دهید

2022-04-19 02:36:11 بمحرابه مطبور . هالليله حماي الحمه .
بمحرابه مطبور .
أبيت الله مغدور . متخضب بفيض الدمه.
أبيت ألله مغدور .
........................................
بالبسمله من نبتدي قصة وليد الكعبه..
ما ركع أبدن للصنم جن كطن ابيض كلبه..
تنزل دموعه على الوجن لمن يناجي ربه ..
أبيت الله مولود الولي واستشهد على التربه..
وجناحه مكسور . جبريل ناده بالسمه. وجناحه مكسور
أبيت الله مغدور .متخضب بفيض الدمه. أبيت ألله مغدور
................................................
لمحرابه كاصد حيدره قرأن يقره بقرأن..
المسجد يرحب بالولي أهلا بنور الايمان ..
نعقت نواعق بالدرب بتسطعش من رمضان..
شد الحيازيم ومشه وما همه غدر الشيطان ..
بالجنه مسرور . يلتقي بروحه فاطمه. بالجنه مسرور
أبيت الله مغدور . متخضب بفيض الدمه .أبيت ألله مغدور
......................................................
تبقى اليتامه تنتظر يا أبو الحسن دكة باب..
تتقاسم الخبزه سوه وياهه جنت يابو تراب..
حتى المريض البيه علل يتشافه وبأيدك طاب ..
بليلة قدر ظلمه السمه ليش الكمر عنج غاب..
من غادر النور . صارت الدنيه مظلمه. من غادر النور
أبيت الله مغدور .متخضب بفيض الدمه . أبيت ألله مغدور
...........................................................
صوت الزجيه فاطمه صاحت الك مشتاكه..
أشتاكيت ألك يا بو الحسن بالجنه خل نتلاكه..
لاتنتظر طف كربله ونار العطش حراكه..
تشوف الغوالي على الرمح وزينب سبيه بناكه..
ادري انت مقهور. لو صاب ذريتك ضمه. أدري انت مقهور
أبيت الله مغدور . متخضب بفيض الدمه. أبيت ألله مغدور
....................................................
بموقف صعب شفت الحسن والدمع يوصف حاله..
سبّل اديه المرتضى وغمض أعيونه اكباله..
وحسين غطاه الحزن بحر الدمع من ساله..
وام البنين الطاهرة ظلت تصبّر أعياله..
وحسين معذور . بالكلب ينصب مأتمه . وحسين معذور
أبيت الله مغدور . متخضب بفيض الدمه. أبيت ألله مغدور
......................................................
خير العمل ماينوصف عدله وأحسانه وعطفه..
ربي العلي انطه العلي من رحمته ومن لطفه..
ينطي زكاته بركعته بحنيه وبكل رأفه ..
مثل الأسد وكت الحرب خيبر قلعهه بجفه..
هالليله عاشور .. ونبجي على راعي الغانمه.. هالليله عاشور
أبيت الله مغدور . متخضب بفيض الدمه. أبيت ألله مغدور
......................................................
لخادم أمير المؤمنين
حيدر مطر العبادي باز کردن / نظر دهید

2022-04-17 19:32:19 اليتامه ودعت راعيها ..
سافر اليمطرحنان عليهه ..
..............................
ياعلي ماعون جفك للفقير ..
بجالك يعيش بكرامه ومايحير ..
الفقير بدولتك عايش أمير ..
بلا أماره وعازته مغطيهه
.......................
ياعلي يالشوفتك للفقره عيد ..
لو رحت تحلم بعد تلبس جديد ..
ينزف على التربه ظل دم الوريد ..
من دماك الطاهره محنيهه
.......................
ياعلي ظليت بس أنت الأمل ..
لليتامه أنت الأبو وانت الأهل ..
جان باب الفقره جف خير العمل ..
كل صباح وكل مسه يمر بيهه
.......................
راسك المطبور بجفوف الكفر ..
مثل قرآن أنفتح ليلة قدر ..
وأنت ساجد ياعلي سجدة شكر ..
صار نهرين الدمه جاريهه ..
...........................
نور وجهك ياعلي يمحي الظلام ..
ياعلي وبسيفك الدين أستقام ..
المايحبك ياعلي نطفت حرام ..
خله يتأكد من أمه شبيهه ..
..........................
كل فقير عيونه ظلت شابحه ..
ويسمع أصوات اللطم والنايحه ..
عليك يامولانه يقره الفاتحه ..
العروة الوثقى اليجلب بيهه ..
.............................
يجري دمع الفاجعه عللخد نهر ..
جن شهر عاشور هل بهالشهر ..
نلطم على الراس وننوح بقهر ..
وصرخه لعنان السمه نعليهه ..
...........................
ياعلي يالحاضر بوكت الشدد ..
ياقسيم النار والجنه مدد ..
شيعتك للموت ماتنسه أبد ..
بالحشر حيدر علي ينجيهه ..
...........................
حيدر مطر العبادي باز کردن / نظر دهید

2022-04-15 03:40:29 مولد الأمام الحسن ع
تعله الأصوات .. بالصلاوات
الليله ميلاد الحسن بهجه ومسّرات
.........................
بالمهد من شعشعت أنواره ..
امكمط وياه الكرم بأكتاره ..
من الزغر كاروكه بيه دله و مضيف
أبد مايحتار كلمن زاره ..
باسط الأيد .. شوفته العيد
مبتسم ثغره شحلاته وطيب الذات
.............................
ياحلاته وياجمال أعيونه ..
ياعلي ضم وجهه ليحسدونه ..
بالمدينه نوّر ويزهي ضواه
ياكمر والدنيه ظلمه بدونه ..
الليله أفراح .. والحزن راح
حنه وأبخور وشمع عدنه أحتفالات
..........................
الكون محتار بجمال أوصافه ..
العسل يتناكط من أشفافه ..
أنت يكفيك الفخر أول أمام
شايله طاهه النبي على أجتافه ..
شايل النور .. وكلبه مسرور
يدري سبطه المجتبى بحر الكرامات
.............................
الزجيه بهالولد تتباهه ..
وَجنته تشع نور يامحلاهه ..
خمسطعش رمضان أفراح و سرور
حيدر الكرار بشّر طاهه ..
بأحلى مولود .. بعطر الورود
بالتسع تشهر حمل تقره أمه آيات
............................
أذن آذان النبي بأسماعه ..
وأبتسمله يعني أمر وطاعه ..
بالشجاعه والكرم ماله مثيل
من الزغر محد يلاوي أذراعه ..
نوره وضاح .. وجهه مصباح
يكتب بحبه الشعر أحلى العبارات
..............................
الكون هالليله حلت أفراحه ..
لحد مايطلع فجر مصباحه ..
ياعطر جوري الورد جاك و يريد
يالحسن منك عطر قداحه ..
حبك أنفاس .. تشهد الناس
يالحسن صيتك وصل سابع سماوات
..............................
حيدر مطر العبادي باز کردن / نظر دهید

2022-04-13 03:37:05

باز کردن / نظر دهید

2022-04-11 11:10:21 حالي /بروحتك يقهر
وعمري /بلحزن يكبر
ودمعي/بغيبتك سير
وينك وينك
##########################
اخظـر جـرح بـت الـنبي ماطـاب جـرح الـزهرة
ولـهسة عـيني صـب دمـع شـلال لا مو كـطرة
والحسرة جن نار بكلب حركت كليبي الحسرة
ودور جملهـة الـوكـت جـابـالي جـرح الـطـبـرة
```````````````````````````````````````````````
عليكم/كلبي يأذيني
ومرة /صايرة سنيني
وكلبي/عليكم اتفطر
وينك وينك
##########################
انتـه الـوطن يا ابا الـحسن وبغيـابك أنا بـغربة
وجن وردة حالي بروحتك مشلوعة من التربة
والـبين مـن عـندي أخـذ ويـن الـدليلي يرغبة
حـال الـبنية بـلا أهـل يابـوية حيـل اشـصعبة
````````````````````````````````````````````````
عيوني/رايده عيوانك
وليلي/يخنك بدونك
ويطْوِلّ /ليلي مايكصر
وينك وينك
#########################
مو حـلوة صـارت دنيتي بروحتك لا موحـلوة
بلون الـحزن واللـه اصبحت مابيه ذرة سـلوة
من راسـك الطاهر نزف والسبب ناس القسوة
الماعدها گطرة من الخجل ولاعدها اي مروة
```````````````````````````````````````````````
ماتت/بعدك الظحكة
ونبتت/بذرة الحركة
وطك سـَ/باحها وخظر
وينك وينك
########################
كلشي بحياتي أبيض قبل صار برحيلك أسود
وكليبي ذاك الينعشـك بجيوش حـزني تفرهد
وحتى الهوى عليه اختـلف صـاير أبد ماينود
ويابوية حيلي وفرحتي بغيبتك حايط ونهد
``````````````````````````````````````````````
كلها/ تـبجـي لـمصـابك
ايتامك/اهلك اصحابك
وروحي/عليك تتحسر
وينك وينك
########################
وبليل من اسمك يمر يـخنكني احـس دلالـي
وابجي وانن للـصبح جن كصبة صـاير حـالي
والبيت من دونك بقى موحش يبوية وخالي
الله يسـاعد كل شخص فاكـدلة واحد غـالي
``````````````````````````````````````````````
بُعـدك /يـعصر ابـروحـي
وحضنك/بلسم اجروحي
وّني/بـغيبتـك يـكـثر
وينك وينك
#######################
المـن اروح اشكي الـحزن بعـدك يماي عـيوني
متـعودة مـن ابجي بصغر يمـك هلي يجيبوني
وهسة اختنك من الخلك عن حالي لو سئلوني
تعـبـانه بـعـدك ياعـلـي والـحزن صـايـر لـونـي
`````````````````````````````````````````````
وظعي /الصخرة بجاهة
ردلي /يا أسد طاهة
فكدك /بالكلب خنجر
وينك وينك

خادم السيدة زينب ع
قيصر السماوي باز کردن / نظر دهید

2022-04-09 02:47:54 لاأمير ولاولي ....عدنه غيرك ياعلي
ياعلي عيون اليتامه تعاين الباب ..
تنتظر تمسح دمعهه بيد ابو تراب ..
ياولينه ... ياولينه
.............................
حاربونه وفجرونه الناصبيه ..
بحب علي الكرار يامحله المنيه ..
نموت والله ومانساوم عالقضيه ..
أحنه كل قطره بدمانه حيدريه ..
عدنه أغله من الهوه .. لكل جرح حيدر دوه
يجوي دمع العين عالخد والكلب ذاب ..
تنتظر تمسح دمعهه بيد ابو تراب ..
ياولينه ... ياولينه
............................
بالمصادر دورت كل المراجع ..
بس علي يؤتي الزكاة وهوه راكع ..
رفع أيده المصطفى وأطره المسامع ..
علي من بعدي خليفه بلايه رابع..
اليوالي المرتضى ... عهد بالجنه حظه
يوكف بيوم الحشر لو صار الحساب..
تنتظر تمسح دمعهه بيد ابو تراب..
ياولينه...ياولينه
.............................
ابن ملجم هدم اركان الهدايه ..
وطشر القران بيده أيه أيه ..
الحسن وحسين حضرو بالرزايه ..
وزينب الحوراء تعثر بالعبايه..
نزلت املاك السمه... يم علي ويم فاطمه
كابلت ام البنين وتنعه المصاب ..
تنتظر تمسح دمعهه بيد ابو تراب..
ياولينه... ياولينه
.................................
باب خيبر انقلع وبخنصرك طار ..
وابن ود العامري سويته طشار ..
لافتى الا علي وبس سيفه فقار..
وبالحشر انت قسيم الجنه والنار ..
بس علي فحل الفحول... بات بفراش الرسول
درس بالايثار هذا من اجل الاطياب..
تنتظر تمسح دمعهه بيد ابو تراب..
ياولينه .....ياولينه
..................................
عدنه بارض النجف للشيعه مناره..
مستقر للرافضي هناك قراره ..
كل موالي حيدر يردد شعاره..
يبقى يندب ياعلي بليله ونهاره ..
ياعلي يصيح المدد... انت حاضر بالشدد
يريد بيمينه علي ينطيه الكتاب ..
تنتظر تمسح دمعهه بيد ابو تراب..
ياولينه .... ياولينه
.................................
حيدر مطر العبادي باز کردن / نظر دهید

2022-04-06 00:23:19 خضب الدم شيبتك والهامه ..
وودّع وياك الفقير أحلامه ..
بمحراب حيدر فاجعه .. التربه بالدم ناكعه
يا أميري ياعلي .. يا أميري ياعلي
................................
ساعة الناده المؤذن صوت حي عالفلاح ..
شد حيازيمه وتعنه حيدر لمحرابه راح ..
راكع وسيف المرادي بالغدر دمه أستباح ..
وسفه قالع باب خيبر حيدر على التربه طاح..
بهالمصيبه وما ضعف أيمانه ..
يلفظ بأسم الجلاله لسانه ..
والحسن هل مدمعه .. التربه بالدم ناكعه
ياأميري ياعلي .. ياأميري ياعلي
..................................
اليوم أركان الهدايه أنهدمت بسيف الغدر ..
وحزنت الكعبه على أبنهه بطل صفين وبدر ..
شمس غابت بس ضواها ظل يضّوي بكل كتر ..
وبقت دمعات اليتيم التنتظر جفك يمر ..
خلاف جفك ياعلي الممدوده ..
ياهو يمسح دمعته من أخدوده ..
دموعه صارت مشرعه .. التربه بالدم ناكعه
يا أميري ياعلي .. يا أميري ياعلي
..................................
مصابك الينزف حميه مانفع بيه الضماد ..
الدنيه غركانه بدمعهه ولبست هدوم السواد ..
االسمه وكل الكواكب تعلن عليك الحداد ..
راح قرآن الهدايه وظلت تنوح العباد ..
انت رديت الشمس بجفوفك ..
الكون كله يشهد بمعروفك ..
الدنيه عكبك ضايعه.. التربه بالدم ناكعه
ياأميري ياعلي .. ياأميري ياعلي
...............................
حتى بيبان اليتامه تضوك من أيدك شهد ..
تعرف الجف اليدكهه أبد ماتنساهه أبد ..
عاليتيم أشكد حنين وبالحرب مثل الأسد ..
وأبد متفارك لسانك قل هو الله أحد ..
علي بأسمك تلهج المعموره ..
طاهه وضّح بيده هاي الصوره ..
بالغدير وبايعه .. التربه بالدم ناكعه
يا أميري ياعلي ..يا أميري ياعلي
................................
علي ماكمّل صيامه وسافر الجنة عدن ..
يساعد الله عالمصيبه كلب مولاي الحسن ..
زينب وأم البنين بدمع من دم من بجن ..
والحسين يهل دمعته رادك ليوم المحن ..
والحسين بكلبه ناصب فاتحه ..
وكل يتيم عيونه ظلت شابحه ..
حلم حيدر ودعه .. التربه بالدم ناكعه
يا أميري ياعلي .. يا أميري ياعلي
...................................
بالركوع انطه زكاته والفقير يمدله أيد ..
صايم بمحرابه تنزف هامته بدم الوريد ..
صار رمضانه محرم والمرادي جن يزيد ..
وصارت الدنيه سبيه وشاخت الجانت عبيد ..
صارت بكل بقعه شام وكوفه ..
سافر التمطر حنان أجفوفه ..
الحجر بفراكه نعه .. التربه بالدم ناكعه
يا أميري ياعلي .. ياأميري ياعلي
.................................
حيدر مطر العبادي باز کردن / نظر دهید

2022-04-04 04:13:18

باز کردن / نظر دهید