2022-04-30 00:12:37
حسین خان کیونکہ بجلی کا کوئی بھروسہ نہیںبھارت میں بجلی کو لے کر کئی سنگین مسائل چل رہے ہیں ۔ شاید اکثریت ان سب سے بے خبر ہو ۔ کیونکہ میڈیا کبھی ان حقائق کو سامنے نہیں لاتا اور عوام کو اندھیرے میں ہی رکھا جاتا ہے ۔ کیونکہ عوام کو اندھیروں میں رہنے کی عادت ہوچکی ہے ۔ دنیا بھر کی عافتیں ہوں مگر سیاستدان اور میڈیا یہی کہتے ہوئے دکھائی دیں گے کہ "
سب چنگا سی "
مگر حقیقت یہ ہے کہ "
سب چنگا سی اور دیش ننگا سی " .
تو آئیے بجلی کی بڑھتی ہوئی کٹوتی سے متعلق چند احتیاطی تدابیر ذہن میں رکھ لیتے ہیں ۔
1.اگر آپ الیکٹرک مشین سے حجامت بنواتے ہیں جو آجکل عام ہے تو حجام سے بتادیں کہ قینچی سے حجامت بنائے ۔ اگر مشین سے بنوائیں گے اور درمیان میں بجلی چلی گئی تو ایک طرف کا کام ہوا ہوگا اور دوسری طرف کا رہ گیا ہوگا۔ کیونکہ بجلی کا کوئی بھروسہ نہیں۔
اگر خدانخواستہ اسی ادھوری حالت میں آپ گھر تشریف لائیں گے تو پھر کچھ اور ہی منظر ہوگا۔بچے پہچان نہیں پائیں گے اور کہیں گے " امّی دیکھو کوئی آدمی گھر میں گھس آیا ہے " ۔
2.جن عورتوں کو روز روز تازہ سالن کے لئے مسالہ مکسر میں پیسنے کی عادت ہے وہ عادت بدل لیں اور تین دن یا ہفتہ بھر کا مسالہ پیس کر فریج میں رکھ لیں۔ کیونکہ بجلی کا کوئی بھروسہ نہیں ۔
3.اگر آپ اینڈرائڈ موبائل استعمال کرتے ہیں جس کا بیٹری بیک اپ 8 سے 10 گھنٹے سے زیادہ نہیں ہوتا تو گھر پر ایک دو پاور بینک ضرور رکھیں یا پھر کال کرنے کے لئے چھوٹا بیسک موبائل رکھیں جسکی بیٹری ہفتہ بھر تک چلتی ہے ۔ موبائل کو بیٹری سیور اور ڈارک موڈ پر رکھیں اور وائبریٹ موڈ پر ہرگز نہ رکھیں ۔ کہیں باہر نکلیں اور فون بند ہوگیا تو بڑی پریشانی ہوگی اور چارجنگ صحیح وقت پر نہ ہوپائی تب بھی دسیوں مسائل ہیں ۔ کیونکہ بجلی کا کوئی بھروسہ نہیں۔
4.جنریٹر اور انورٹر ( UPS) پر بالکل بھروسہ نہ رکھیں ۔ پٹرول و ڈیزل کی قیمتیں تو آسمان کو چھورہی ہیں اور انورٹر کو چارج ہونے میں فل پاور گھنٹوں تک چاہئے ہوتا ہے۔ آخری درجہ میں ہر کمرہ میں ایک چھوٹا سا امرجنسی چارجنگ بلب لگالیں۔کیونکہ بجلی کا کوئی بھروسہ نہیں۔
جن کو نلکا کھول کر نہانے کی عادت ہے وہ عادت بدل لیں اور بالٹی میں پانی لے کر بیٹھیں۔ ایسا نہ ہو کہ نہاتے رہے اور پانی بند ہوجائے ۔بجلی رہے گی تو پانی کی ٹنکی بھی بھرتی رہتی ہے ۔ بجلی نہیں تو پانی نہیں ۔ کیونکہ بجلی کا کوئی بھروسہ نہیں ۔
عورتیں گھر کے سارے کام جتنا ہوسکے مغرب سے قبل نمٹالیں۔ شام کے لئے کوئی کام باقی نہ رکھیں ۔ کیونکہ بجلی کا کوئی بھروسہ نہیں ۔
بیت الخلاء میں نلکے سے پانی کے بھروسہ نہ بیٹھیں پتہ نہیں کب پانی بند ہوجائے اور عین ضرورت کے وقت نلکے میں سے صرف ہوا نکلے اور آپ درمیان میں پھنس جائیں اور پھر اندر سے چلّانا پڑے اور مدد مانگنی پڑے ۔ بچے تو شریر ہوتے ہی ہیں۔ ایسا نہ ہو کہ آپ کو گھر والی پانی ڈال رہی ہو اور بچے دو چار فوٹو لے لیں کہ ایسی حالت میں تو کبھی ابو کی فوٹو نہیں کھینچی ہے یہ موقعہ نہیں چھوڑنا چاہئے ۔ ستم تو جب ہوگا کہ بچے ابو کی یہ تصاویر کسی دو چار واٹس اپ گروپوں میں شئر کردیں ۔پھر تو غضب ہوجائے گا ۔
اپنی سواری میں حسب سہولت پٹرول معمول سے زیادہ رکھیں کیونکہ بجلی نہیں تو پٹرول پمپ نہیں چلے گا۔کیونکہ بجلی کا کوئی بھروسہ نہیں۔
گیہوں چاول وغیرہ پسوانے جائیں تو اس سے عام طور پر بجلی کٹنے کا وقت معلوم کرلیں ۔ اگر بلا تحقیق پسوایا اور ادھورے کام میں بجلی کٹ گئی تو بڑا مسئلہ ہوگا ۔کیونکہ بجلی کا کوئی بھروسہ نہیں۔
ریفریجریٹر میں زیادہ سامان نہ رکھیں۔ خاص کر کچی چیزیں ترکاری گوشت وغیرہ ۔ اگر گھنٹوں تک بجلی گئی تو سب غارت ہوجائیگا ۔کیونکہ بجلی کا کوئی بھروسہ نہیں۔
جب بھی موبائل ریچارج کو لگائیں۔ موبائل سیوچ آف کرکے لگائیں ۔ اچانک بجلی کے آنے جانے سے موبائل خراب ہوجائیگا۔کیونکہ بجلی کا کوئی بھروسہ نہیں۔
جن کو روزانہ کپڑے استری کرکے پہننے کی عادت ہو ۔وہ عادت بدلیں اور ایک ساتھ ہفتہ بھر کے تیار کرکے رکھ لیں ۔ ایسا نہ ہو کہ ایک پاجامہ کا ایک حصہ استری ہوگیا اچانک بجلی چلی جائے اور اسی طرح پہن کر آپ کو باہر نکلنا پڑے۔
کیونکہ بجلی کا کوئی بھروسہ نہیں۔
کسی بھی الیکٹرانک چیزوں کو بجلی جاتے ہی بند کردیں ۔اچانک بجلی آنے سے وہ خراب ہوسکتے ہیں۔کیونکہ بجلی کا کوئی بھروسہ نہیں ۔
گرمی کے علاقوں والے چھوٹا سا دو سو روپئے میں چارجنگ والا دستی فین ملتا ہے وہ خرید لیں ۔ چھوٹے بچے گرمی سے بہت پریشان ہوتے ہیں۔انکے لئے کام آئیگا۔ پنکھا کب تک چلے کسے معلوم ۔ کیونکہ بجلی کا کوئی بھروسہ نہیں۔
جو عورتیں سلائی مشین کو موٹر سے چلاتے ہیں وہ پاؤں سے چلالیں کہ کب اچانک بجلی چلی جائے ۔کیونکہ بجلی کا کوئی بھروسہ نہیں۔
بڑی مساجد میں نمازوں کے لئے مکبر مقرر کرلیں کہ درمیان نماز بجلی چلی جائے۔کیونکہ بجلی کا کوئی بھروسہ نہیں۔
یہ چند عام مسائل ہیں۔بقیہ مسائل کا حل خود تلاش کرلیں۔
454 views21:12
ط
