2021-03-20 10:01:14
صباح الفل ")
هيربطوا في ذهنك:
النجاح (بعلامة الدولار)
والتميز (بلوجوهات الشركات العالمية)
والأثر (بالكتب الأكثر مبيعًا بالأسواق)،
والطموح (بالتنافس فقط على منصب الرئيس التنفيذي CEO)،
والذكاء (بعلماء اختراعوا قوانين ونظريات رياضية)،
والحب (بالممارسات الجنسية فقط)،
والشغف (بالي ساب جامعته وأسس شركته وبقى ملياردير).
والجمال (بدرجة معينة من المكياج والإضاءة ولون البشرة والعيون والجسم والعُري وزاوية التصوير.. إلخ)
والإنجاز (بالأرقام والكميات).
- هيقنعوك إن الموظّف الي شغال شغلانة حلال ومكفي بيته وعياله وحياته بسيطة وهادئة وراضي بيها = فاشل، ودرويش وجاهل ومتخلف ومش طموح وبيسرح بسبح على باب السبتية وأمثاله الي ودونا في داهية، وكان لازم يدخل الصراع.
- هيقنعوك إن الأم الطيبة الي عاشت تربي عيالها وطلعتهم مسلمين موحدين بالله = فاشلة وضيّعت حياتها هدر في سجن من أربع حيطان، وكانت لازم تتحرر من كل ده وتدخل الصراع.
- هيقنعوكِ إن شكلك في المراية قبيح وعادي، ولازم تدفعي الآلاف وتدخلي في صراع الجمال عشان تبقي مبهرة زي الي في الشاشات، وتعجبي.
- هيقنعوك إن صبرك على أذى أهلك، وتغافلك، واحتسابك الأجر عند الله تعالى ما دمت قادر تستحمل والحياة ماشية = من الحُمق والفشل والجهل، ولازم ترميهم في مصحة أو في شقة، وتبقى (حُر).
- هيقعنوك إنك مش ذكي وقدراتك العقلية على قدك عشان مجبتش (الأرقام) الي حطوها معيار للذكاء، ولازم تدخل في صراع إثبات إنك مش أقل منهم بنفس لغة الأرقام.
- هيكرهوك في أي شيء عادي لمُجرد إنه (عادي)!
مش هيحكولك عن العالم "العبقري" الي أسرته كانت مُدمّرة وولاده كانوا مرضى نفسيين في مصحات، ولا هيحكولك عن الشركات "العملاقة" الي بتفسد في الأرض بألوان مختلفة، ولا هيحكولك عن مئات الي "تحرروا" وضاعوا في الشوارع، ولا هيحكولك عن الكتب الأكثر مبيعًا الي مليانة باطل وهراء.. ولا هيحكولك عن فريق التجميل الي قعد بالساعات ينحت في خلقة الممثلة عشان تطلع كده.
ولا هيفهومك إن الذكاء أنواع، وعطاء ربنا متفاوت، ونقطة تميزك قد تكون في أمر آخر تماما، وإنت مش مضطر لهذا الصراع.
.
عمرهم ما هيخلوك تشوف الصورة كاملة أبدًا.. عمرهم ما هيُطلِعوك على ما وراء الكواليس.. لازم تفضل شايف (السراب) شكله جميل من بعيد عشان تستمر في الجري.
.
لأن مش مطلوب إنك تكون راضي ومطمئن وشبعان رُوحيًا وبتعبد ربنا بما في وسعك، المطلوب تكون كلب يلهث دائمًا في حلبة الصراع دون شبع، عشان يقدروا يستنزفوك في أسواقهم حتى آخر نفس.
#دين_السوق
أحمد عبد المنصف
1.1K views07:01