t.me/doctoristishara

2021-09-17 15:53:12 الفطام من الرضاعه الطبيعيه
اكتب هالمره عن الفطام الكامل من الرضاعه الطبيعية و يفيد البوست الامهات اللي يرضعون صناعي كافكار عامه
احب اكتب ملاحظه انه الفطام يبدي من اول اكله تدخل لمعده الطفل
بس هذا البوست عن الفطام الكامل
امهاتنا عدهم الطريقه التقليديه اللي يفطمون بيها و اللي تخلي بيها لون او طعم على الثدي و بالتالي ما يتقبله الطفل
و هنا الام تعاني و الطفل يعاني
الام تعاني من مشاكل الالم اللي يصير بالثدي و ممكن حتى يصير عندها انسداد قنوات الحليب و الطفل يتنحس و شيجرعه
اكو طريقه ثانيه
اقل ايلاما
او اصلا بدون الم
هذا يكون تدريجي على مدار اسابيع او حتى اشهر
و نرجع لملاحظه ١ انه الفطام يبدي من اول اكله تدخل لمعده الطفل عدا الحليب
لذلك خططي للفطام ويه اول اكله
ابدي باعدي بين الرضعات لو كان كل ٤ ساعات خلي تصير كل ٥ ساعات و لما صارت ٥ ساعات خلي تصير ٦ ساعات و هكذا
ثاني خطوه شيلي رضعه منتصف اليوم لان اخر وجبه حتى ينام نومه عميقه و رضعه الصبح لان راح يصير عندك الم بصدرك اذا ما اخذها
وصلنا للمرحله الثالثه لا تلبسين ملابس سهله بحيث انه الطفل يكدر يوصل للثدي بيها بسهوله و لا تنومين الطفل بصفك بالليل حتى يتعلم شويه انه ماكو والدته بصفه يعني ماكو رضاعه
اوصيك اولا و اخيرا بزياده عدد الوجبات حتى لا يجوع و بالتالي نرجع للخطوات الاولى
قللي الحليب بس زودي اللبن و الجبن بعد عمر ٨ اشهر حتى نوازن بين الكالسيوم و فيتامين دي

هسه نجي نكتب عنك انت
الالم و كيفيه تقليل انتاج الحليب
ما اكولك سهل الموضوع
بس اكو طرق هوايه
اولا كمادات الماء البارد او الثلج راح يقلل انتاج الحليب
ثانيا لو بدا يصير احتقان اشفطي الحليب بالشفاطه بس شرط كميه صغيره حتى لا تحسين بالانزعاج و مو كل الكميه
ثالثا لو لا سمح الله صارت مناطق صلبه وومؤلمه بشده استخدمي الكمادات الدافيه و بعدها كمادات بارده
رابعا اذا الم قوي اخذي باريستول او بروفين او بونستان او نابروكسين
خامسا نامي زين اكلي زين و غيري نفسيتك عادي راح تشوفين شويه كابه كلها فتره و تعدي بس اهتمي بنفسك
اخر ملاحظه
مهم جدا تعويض الطفل عاطفيا بالفتره اللي بيها الفطام على وشك الحدوث و بعدها
لذلك عوفي الفيس بوك و الانستاكرام
و قضي وقت اكثر مع طفلك
و العبي وياه
و احضنيه
و بوقت اللي متعود بيه الطفل على الرضاعه لهيه بلعبه او بحضنه او اي شي اخر
ست الكل
انت الام
انت الاحسن
خلصتي اهم مهمه بالتاريخ
و ان شاء الله الفطام يكون سهل
د. سيف سمير البياتي
اخصائي طب الاطفال باز کردن / نظر دهید

2021-09-16 11:13:08 كيف تعزز اللغه و تعلم الكلمات
راح ارتبها حسب الاعمار
من الولاده الى ٦ اشهر :
قرب وجه طفلك من عندك و احجي وياه
كلش يحبون يشوفون الوجوه و يتفاعلون وياهن
احجي وياه على اللي كاعد تسويه
مثال : و هسه راح ابدلك او هسه راح نروح للحمام
غني لطفلك
الطفل يحب الغناء جدا و اللحن دائما يضحكون او ينسعدون من تنغيلهم
عيد الصوت اللي يسويه طفلك مره ثانيه و ثالثه
يعني من يبدي يناغي عيدها عليه بنفس الصوت
دائما سولف وياه باسلوب الاغنيه و اقرا له القصص من اول يوم
.
.
من عمر ٦ اشهر الى ١٢ شهر :
سمي الاشياء اللي دا تشوفوها سويه مثلا
شوف بابا هذه سياره او هذه كره او غيرها
دائما باوع وياه بالكتاب و احجيله القصه
اذا بعدك تستخدم الملهيه لا تتامل انه راح يحجي لان اذا انت مسويله ميوت من الرئيسي شوكت يسولف ؟
العب وياه و بالاخص الغميضه راح تعلمه هوايه اشياء
استخدم الصور لتعليم الطفل على الكلام
موجوده دفاتر مصوره تكدر تساعدك
الدفاتر اللي بيها صور نباتات و حروف و هكذا
.
.
سنه الى سنه و نصف ؟
اذا بدا يكول كلمات ابدي كولهن وياه و ابدا لا تضحك عليه من يكولها
مثلا يكول سياره كوله اي صح سياره و عيدها
⚘زيد الكلمات بالحديث بزياده الخيارات
مثلا تريد تفاحه لو موزه
تلبس تيشرت ازرق او اصفر
الالعاب و الكتب اللي بيها كلمات مثل اللعابه الناطقه و غيرها ممكن تساعد و هسه حتى ممكن استخدام الموبايل مثل سيري و غيرها من تطبيقات المحادثه
ارجع اوصيك انه تغني و دائما بلحن و لحن الجمل اللي تكولها اللحن يبقى بالبال اكثر
استغل كل مكان للتعليم و بالاخص الاباء
من تطلع طلع ابنك او بنتك وياك و سولف انه هذا عمود او هذه شجره و شجره لونها اخضر و هكذا
.
.
١٨ الى ٢٤ شهر
عيد الكلمات و استخدمها باكثر من صوره !!
مثال: وين القميص مالتك؟ القميص الازرك مو ؟ يلا البس قميصك
استخدم اوامر بسيطه مثل سد الباب او جيب مي او جيب جاكيتك
علمه على وين انفك وين فمك وين لسانك
لكل الاعمار السابقه ممنوع التلفزيون و لا الشاشات اللوحيه
.
.
عمر ٢ الى ٣ سنه:
علمه يكون جمله
عمر سنتين هو العمر اللي يكون بيه جمله
و عليه شجعه يكون جمله
مثل يكول انطيني !!
تكوله شنو انطيك حتى لو تعرفها للشغله اللي يريدها
لا تشجع لغه الاشاره ابدا
دائما كول اسمه ببدايه اي جمله تخصه حتى ينجذبلك
سولف و انت تؤدي شغل البيت مثل يلا ننظف و اوصف الجزء اللي تنظفه و اطلب منه يساعدك و هكذا
.
.
اتمنى فادكم البوست
د. سيف سمير البياتي
اخصائي طب الأطفال باز کردن / نظر دهید

2021-09-14 14:57:20 ملاحظات لمرضى الجرع الكيمياوي /

يفضل تتريك وتجي للجرعة الكيمياوية لا تجي انت وجوعان ... بس اقطع الاكل قبل ساعتين من الجرعة .

اشرب كميات سوائل جيدة اول يومين بعد الجرعة وهذا راح يقلل من الاعراض الجانبية للعلاج .

ياريت تخلي انواع الاكلات اللي تاكلها خفيفة اول يومين يعني تبتعد عن الباجة والسمج والاكلات الدعينة اول كم يوم حتى لا تتأثر معدتك .

كل انواع الاطعمة مسموحة طيلة ايام الجرع وياريت التنويع بالاكل .

الجرعة الكيمياوية ما تأثر على الاهل والاطفال والحوامل ؛ يعني اللي يكمل جرعته يرجع وية اهله اعتيادي .

ابتعدوا عن الاكل بالمطاعم اثناء الجرعات وابتعدوا عن الاكل البايت .

التزموا بمواعيد الجرعات ولا تأخرون الموعد الا بأذن وعلم الطبيب المعالج .

العسل والخضروات والفواكه هي اهم الاطعمة ؛ ياريت تكثرون منها .

شارك المنشور لطفا
د.فرات يحيى محسن اخصائي الاورام والغدد


====

إستشاره طبيه

معلومات عن مختلف الأمراض وعلاجها


https://t.me/doctoristishara باز کردن / نظر دهید

2021-09-13 15:44:56 ليش يكذب الطفل
دائما الطفل يكذب بعمر من سنتين إلى ٦ سنوات
بس ليش يكذب ؟
و شنو طرق العلاج ؟
ليش يكذب ؟
هذه الها أسباب هوايه
الاولى : إنها شافك تكذب
طبعا اكيد تعرف او تعرفين ان كل طفل امه و ابوه هم مثله بأول سنين فإذا انت تكذب طبيعي جدا انه هم يكذب
٢. ممكن جدا كتطور طبيعي و بالأخص بعمر سنتين من العادي انه يكذب لان جزء من خيالاته
٣. عدم التفريق بين الحقيقه و الخيال
انت شايفين انه اطفالكم يحجون ويه روحهم و يسوون قصص و كلشي
هو مدا يدري انه هذا اللي دا يصير حقيقه لو خيال و بالأخص الأطفال المنغمسين بالموبايلات و الاجهزه اللوحيه
٤. مجرد دا يتشاقه و هم يرجع الأمر الك لان من تضحكله راح تعزز هذا التصرف الخاطيء
٥. او اتعسها انه خايف من النتائج اذا كال الحقيقه بسبب اسلوبك او عقابك اله و اني اشوف هذا من اتعس الأسباب
٦. أحد ما سماه بالكذاب او الجذاب و هو دا يشوفه فد انجاز و يظل مصر عليه
.
.
.
طيب شنو العلاج
مبين العلاج من الأسباب :
١. أبدا لا تكوله انت كذاب او كذبت
٢. لا تنصدم و تنفعل و تبالغ برده فعلك من يكذب عليك
٣. لا تبالغ برده الفعل من يخطأ و لا تضربه حتى لا يكذب لتجنب العقاب
٤. تجاهل الأمر تماما و كانما ما سمعت الكذبه و لا حسيت عليه و لا تضحكله و لا تعاتبه
٥. من يكول الصدك و الكلام يكون واقعي هسه اللي عليك تمدح بيه و تشجعه و تدفعه للأمام
٦. استخدم القصص اللي تحكي عن اهميه الصدق و ان البطل دائما يكون صادق او حتى لو تسوي قصص من خيالك
٧. كن صادقا: و لا تنهي عن خلق و تأتي مثله
خليك انت الصادق و هو راح يتعلم منك
٨. اما قصه بينيكيو فكانت دائما احسن حل للأطفال للي يكذبون و شون خشمه( انفه) يطول كلما يكذب أكثر


د. سيف سمير البياتي اخصائي طب الاطفال باز کردن / نظر دهید

2021-09-12 18:56:30 الرضاعة الصناعية
الرضاعة الصناعية لازم تتم بقواعد و اساسيات و الا النتيجه تكون غير مرضيه من ناحيه المغص و الغازات و الالتهابات المعوية
هذا البوست ينخزن لكل الامهات الجدد في حال لا سمح الله اضطريتي لاستخدام الحليب الصناعي
الحليب الصناعي مو الا سعره غالي معناها زين
ماكو حليب زين لكل الاطفال
و ماكو طفل ياخذ كل انواع الحليب بدون تغيير
الحليب اللي يسوي امساك عند طفلك ممكن يسوي اسهال عند طفل غيرك
و شون راح اعرف؟
مالك غير تجربين
اختار دائما الحليب اللي يناسب جيبك و احسبها بالشهر
مهما صعد سعر الحليب و مهما ضافوا مكونات الا انه ما يقترب من حليب الام
و نقدر القطره اللي تنطيها فلا تستهونيها
ماكو جداول للرضاعه
و ماكو نظام كل ساعتين و توقيت ساعه و كذا
الا اذا كالك طبيبك
الرضاعه عند الطلب
باول اسبوعين ما يصير تمر ٤ ساعات دون رضاعه و بعد الاسبوعين عادي هو الطفل ينظم رضعاته و نومه مع تدخل بسيط منك
مصره على الرضاعه كل ساعتين؟
اذن غازات اكثر و مغص اكثر
الرضاعه عند الطلب هي الافضل
شكد انطيه رضاعه؟
ماكو رقم معين
دائما اكول الرضاعه الصناعيه سهله
شوكت ما يريد الطفل و شكد ما يريد
شفتيه جوعان ابدي زيدي
ما ياخذ اكثر من رقمين و عمره ٦ اشهر بس نموه طبيعي خلص لا نتوتر
شون اعرف يريد اكثر؟
من يبدي يخلص الرضعه كامله لمده يومين معناها نزيد
الرضاعه بس باول اسبوعين اي هوايه ممكن توصل 8 الى 12 رضعة
بس بعد الاسبوعين تقل الى ٦ الى ٨ رضعات
و بعد ٣ اشهر تقل اكثر
و من يدخل الاكل يقل الحليب
و هذا هو المطلوب
الرضاعه الصناعيه لازم تكون بعاطفه و حب
مو خلي المميه على كلينس و الطفل يرضعها
اخذي بحضنك و فكي قماطه و ارفعي راسه و احضنيه و عينك بعينه و رضعيه
مدة الرضاعة 10 دقايق و اكثر و هم مو ثابت الرقم لان طفل عن طفل يفرق
اختيار حلمه الببرونه هم لازم تكون بعنايه يعني لا تنزل حليب هوايه و لا ينشلع قلبه بالرضاعه
المفروض من تقلب المميه الحليب ينزل قطره قطره مو دوش
التعقيم ضروري و ضروري جدا و من غير المقبول اعطاء مميه ما معقمه او مغليه او داخله بجهاز التعقيم اذا عندك
لهذا من الاسهل توفر 6 الى 8 ممات حتى تفويرهم مره وحده باليوم و تنطيهم
ما عندك امكانيه لهذا العدد؟
خلص فوري بكل مره
شون نحضر المميه ؟
نقرا العلبه
نشوف المكياله
لان اكو مكيالات كبار تكفي لرقمين
و اكو مكيالات صغار تكفي لرقم
نضيف الماء
و ثم نضيف الحليب
نخلط عن طريق دعك المميه بين ايديك الاثنين مو بالرج و بالتالي غازات و مغص اكثر
حراره الماء شكد؟
هذا بيه اختلاف
قسم مصادر تكول من تضيفوه على الحليب لازم الماء يكون نوعا ما ساخن علمود اذا الحليب ملوث تقتله الحراره
و قسم يكولون لا عادي بحراره الجسم لان يخرب الحليب
اني اشوف النقطه الثانيه واقعيه اكثر
المتفق عليه انه حراره الحليب عند اعطاؤه للطفل يجب تكون بحراره الجسم 37 درجه
شوكت اغير الى حليب رقم 2 ؟
بعد 180 يوم
ما افتهم مصطلحات دخل بالشهر الفلاني
الطفل عمره 6 اشهر يعني 180 يوم
عمره 3 اشهر يعني 90 يوم
شكد يبقى بعد التحضير؟
24 ساعة اذا انخزن بالثلاجه
و ساعة وحده بحراره الغرفة
شكد يبقى صالح للاستخدام بعد ما نخلص الرضعه ؟
ما يبقى من تخلص من فمه هاهيه ارمي الباقي
ما تبقى
شنو اتوقع من تغييرات اذا قررت انطي حليب صناعي؟
ريحه الخروج كريهه
لون الخروج اخضر
امساك
مغص اكثر
التعقيم موجود بوست كامل عنه
لامهات الرضاعة الطبيعية اسف اخذت من وقتكم لقراءه هذا البوست الطويل استمروا فقط انت ترضعين ذهبا
د. سيف سمير البياتي اخصائي طب الاطفال باز کردن / نظر دهید

2021-09-12 14:07:04 كل ما تود معرفته عن التسنين :
التسنين المرحله المهمه بحياه كل طفل نحجي شويه عنها
شوكت يطلع الطفل اسنان ؟
العمر الاعتيادي هو من ٦ الى ٩ اشهر
ممكن بال ٣ اشهر و ممكن متاخر بال ١٣ شهر
اول اسنان تطلع هن الاسنان الاماميه
و اغلب شي هو الفك السفلي
بس ممكن يكون اسنان الفك العلوي
بعدها الاسنان المجاوره للاسنان الاماميه
و بعدها ما راح تطلع الانياب
و انما الاسنان اللي بعد الانياب
و بعدين الانياب
هذا اللي يصير بالغالب
بس ممكن جدا طفلك ما تشمله هذه القاعده و يكون الترتيب غير ما ذكر و هو شي طبيعي
صحيح التسنين يطول هوايه ؟
طبعا التسنين يطول هوايه
القواطع ال ٨ ما تطلع الا من عمر سنه الى ٣ سنين
لذلك الموضوع راح ياخذ وقت و قت طويل جدا
.
شون اعرف ابني بدا يسنن ؟
الموضوع اللي يمكن يصدم كثيرين مثل ما اصدم هوايه امهات و اباء من اشوفهم
اعراض التسنين تبدا من الشهر الثاني او الثالث
اي نعم مثل ما قريتوا
اعراض التسنين تبدا من الشهر الثاني و الثالث مثل كثره اللعاب و تورم اللثه و الانزعاج و البكاء بدون سبب
اهم علامه هو انه الطفل ياخذ ايده و يوديها لفمه
اهم اشاعه احاربها و نحاربها احنا الاطباء هو انه التسنين يسوي حراره
ابدا التسنين ما يسوي حراره
و لا يسوي اسهال
و لا يسوي اي طفح
الحراره المرافقه للتسنين و الاسهال هي بسبب انه الطفل ياخذ هوايه اشياء لفمه فيصير عنده التهاب امعاء
و الا الاسنان بريئه جدا مما يدعون
.
.
هل بزوغ الاسنان مؤلم؟
اي نعم مؤلم
ابدا لا تلوم طفلك لان يكون حاد الطباع و مزعج و تضوج و تتملل
اي فعلا التسنين مؤلم
.
.
كيف اخفف الم التسنين ؟
اولا خليه يمضغ شي بارد
مثلا قطعه شاش رطبه او قطعه ملابس و خليها بالثلاجه
عندي بوست منزله عن اللبن البارد و كيف يفيد و ممكن تسوي
.
طرق اخرى؟
حلقات التسنين مثل الصوره
و العاب التسنين كذلك مفيده حتى يحك بيها لثته
.
.
و اذا ما فاد كلشي ؟
ممكن تنطين الباريستول باسماؤه العلميه المختلفه مثل البنادول و الادول و الدولبران و البارازار و الانتي بايرول
و اذا طفلك عمره عبر ال ٦ اشهر ممكن نستخدم البروفين
بس اني افضل الباريستول لان اكثر امانا من البروفين
.
.
يصير استخدم جل التسنين؟
لا
جل التسنين اللي بيه benzocaine انمنع بامريكا من الزمن
اعرف بعض الأخوات ساكنات خارج العراق و عدهم بعض الحبوب اللي تباع كمسكن للالم
اسمها
Homeopathic teething tablets
هذه حبوب تذاب بالماء و تعطى للطفل و تروج على أنها حبوب طبيعيه
بس الجديد بالموضوع انه حتى هذه الحبوب انسحبت من اغلب الاسواق لحصول حالات فقدان وعي و شمرات بعدها
.
شوكت اكول على طفلي اسنانه متاخره ؟
اذا ما عنده و لا سن بعمر ١٨ شهر
اللي هي سنه و نص
.
.
اراجع طبيب اطفال او طبيب اسنان ؟
طبيب اطفال اولا حتى يسوي بعض التحاليل او ياخذ منك كم معلومه عن وضعيه فيتامين دي
او يسوي تحليل الغده الدرقيه
بس اذا مسويه تحليل غربله راح يستثني الدرقيه
و هنا يبرز دور فحص الغربله بالتدخل المبكر لمثل هذه الامراض
د. سيف سمير البياتي
اخصائي طب الاطفال باز کردن / نظر دهید

2021-09-11 12:24:16 وين أفضل نومه للطفل ؟
بين امه و ابوه او مجاور امه او بسرير منفصل ؟
موضوع نومه الطفل و استقلاله عن والدته بسرير منفصل موضوع جدلي و قديم
بس حمايه الاطفال اولويه طبعا
الجمعيه الامريكيه لطب الأطفال تكول انه الطفل لازم ينام وحده بسرير منفصل علمود متلازمه موت المهد
يعني بين قوسين يخافون لا تنامين انت او ابو الطفل على الطفل و يختنق
بالمقابل اكو اشياء تشجع على نوم الطفل بنفس سرير الأم و هي الرضاعه الطبيعيه لان تصير اسهل
اكيد نوم الطفل مع امه يسهل عليها المهمه و تنام اكثر
باختصارشنو فوائد و مساويء النوم مع الاهل ؟
نبدي بالفوائد
1. ساعات نوم اكثر اذا كانت ترضع طبيعي
2. سهوله بالنوم لان الطفل يفضل ينام بحضن احد من اهله
3. يساعد على تنظيم درجه حراره جسم الطفل بالاجواء البارده
و نروح للمساؤي :
1. النوم مع الاهل ما راح يعلم الطفل على استقلالية النوم و بالتالي يصير معتمد كليا عليم بتنظيم النوم
2. يؤثر نوم الطفل على نوم الاهل و راحتهم فمعروف ان الاطفال يتحركون كثيرا بالنوم و ممكن يدفعون او يضربون اللي بجانبهم
3. للاطفال الاصغر عمرا من سنه فيزيد احتماليه حدوث متلازمه موت الرضيع
لذلك نختصرها و نكول :
الاطفال الاقل عمرا من سنه لا تخلوهم بفراشكم و إنما بفراشهم لان امنهم اولا
الاطفال الأكبر من سنه نترك القرار الكم
ولو الأفضل انه يكون بسرير منفصل حتى يحقق الاستقلاليه و حتى ترتاحون بنومكم
د. سيف سمير البياتي اخصائي طب الاطفال باز کردن / نظر دهید

2021-09-10 11:08:26 هالمره البوست الي و الكم
اذكر نفسي بيه و اذكركم
احنا الاباء و الامهات اللي عدنا بنات بدوا بالمراهقه
من تسوين شغل البيت و انت ضايجه و تعبانه و كل شويه تكولين اووف و ساعه السوده و تعبت و ناقصك بس تنفثين النار
بنتك اللي ترديها تساعدك بالبيت عمرها ما راح تساعدك و هي دا تشوفك عينن كريسو كدامها ( كريسو = افلام كارتون قديم لتنين ينفث النار )
.
لما تكولين كدامها اني بعمرك و لا كنت اسوي شي و انه امك هي كانت كلشي تسوي و ترديها لبنتك تساعدك مو شويه بيها مبالغه؟
.
لما تكولين كدامها اوف لو ادري كاعده ببيت اهلي و انه الزواج سجن و ضيق و تعب راح تنطيها فكره سيئه عن الزواج و راح تشوفها صعبه اصلا موضوع الارتباط و نظرتها للجنس الاخر
.
جملك من توصفين الحمل و الولاده و شكد تعبتي بيهم و شكد تاذيتي بيهن راح ينطيها فكره عن مدى سوء المستقبل اللي ينتظرها
.
حتى الحجاب اذا انت محجبه و تكولين الحجاب حار و الحجاب مزعج و الحجاب مقيدك و بعدين تتمنين انه بنتك تتحجب مثلك
.
انت و اني و كل الاباء و الامهات نتعب ما اكول ابدا نجمل الواقع بس لا ننطيهم افكار سيئه عن المستقبل بهذا العمر
كلشي ننقله الهم بهذا العمر يعتبر تدريس و كل جمله نكولها كاعد ننقللهم معتقد و انطباع عن نفسها و عن العلاقات و عن العالم الخارجي
كل جمله تنحفر بمخها و تترسخ بمشاعرها
د. سيف سمير البياتي اخصائي طب الاطفال باز کردن / نظر دهید

2021-09-07 09:43:22 هل دغدغه الاطفال امينه ؟
لا دكتور سيف شدعوه راح تكتب عن هذا الموضوع و هم كول بيه مشكله اذا دغدغنا اطفالنا؟
اني راح اكتب و انتوا قرروا
حتى تعرف انه اي تصرف تجاه طفلك صحيح لو لا خلي نفسك بمكانه
هل يعجبك انه احد يدغدغك؟
هذا السؤال سالوه لبالغين
ثلثهم فقط كالوا اوكي ماكو مشكله اذا احد دغدغدنا في حين ثلثين منهم توزعوا كالتالي
انه ثلثهم يكرهون الموضوع
و ثلث اخر كالوا لا نحب و لا نكره
هذا المبدا لو تطبقه على اي تصرف ويه طفلك راح تترك هوايه تصرفات منها جبر الطفل على الاكل مثلا
لذلك قبل ما تدغدغ طفلك اسال نفسك هل طفلك يحب يتدغدغ؟
زين شون اقيس و هو ما يحجي اصلا
ما اعرف انت جاوب نفسك !
خلي ببالك موضوع انه طفلك يضحك و انت تدغدغه هو منعكس
هو مو دلاله انه هو مستمتع
صح؟
بدراسه بجامعه كاليفورنيا شافوا انه مقياس السعاده هو مو نفسه من تقارن الدغدغه مع النكات مثلا !
مع شديد الاسف هناك بعض الشخصيات تلح مع الاطفال بالدغدغه
و هذا يترك اثر سيء عند نفسيه الطفل
فيكره الشخص الى حد مزعج
نعود لتاريخ الدغدغه بالعالم
فلا ننسى انه الدغدغه كانت طريقه للتعذيب في عصر سلاله هان الحاكمه في الصين
الرومان كانوا يعذبون اللي يكسر القانون انه يخلون قدم المجرم بالملح و بعدين يخلون الماعز يلعق قدمه فيتعذب بالضحك !!!
لا ننسى انه الدغدغه لفتره طويله راح تخلي الطفل يفقد السيطره و ما يكدر يكول انه كافي توقف و ممكن هالشي ياثر على تنفسه
بالاخير اكول اعرف انه انتوا تدغدغون اولادكم حبا بس اكو الف طريقه و طريقه الطف حتى توصلون حبكم لاولادكم
د. سيف سمير البياتي اخصائي طب الاطفال باز کردن / نظر دهید

2021-09-05 13:11:46 باز کردن / نظر دهید