t.me/doctoristishara

2021-07-30 20:41:00 #ريجيم_المرضع
الرضاعه الطبيعيه تفقدك يوميا من ٤٠٠ إلى ٦٠٠ كيلوكالوري و أحيانا ٨٠٠ كيلوكالوري
بس رغم هذا ما كاعد تنزلين ليش ؟
الأسباب هن متعدده
و نبدي بأولا
١. انت ما كاعد تاكلين كفايه !!!!
تخيلي !!!
طيب ما اكل غير المفروض اضعف ؟
لا بصراحه
لان جسمنا مو غبي
جسمنا من ما تاكلين و تنتجين حليب يبدي يخزن الطاقه و ما يصرفها
و بالتالي راح يخزن الدهون أكثر و أكثر لإنتاج الحليب
عليك بخداع جسمك
شون؟
بعدم الجوع !!!
كل ساعتين إلى ٣ ساعات اكلي شي صحي
الاوراق الخضر رهيبه
الفواكه مناسبه لهذه الوجبات
الألياف بالخبز الأسمر
او الوجبات الدايت الجاهزه
و اكيد ابتعدي عن العصير و كل طاقه مشروبه
.
.
٢. الشد النفسي و العصبي
كلنا نعرف انت مشدوده عصبيا و مضغوطه نفسيا بسبب القادم الجديد اللي هو الطفل
و تريدين تتم الامور على وجه التمام
بس مو كلشي ترديه يصير
و الحل ؟
قللي توترك
افسحي المجال لوالد الطفل باخذ الدور لتربيه الأطفال
اطلعي
روحي نادي
استمتعي
استخدمي اليوغا كوسيله للراحه
.
.
٣. انت اقل فعاليه من قبل !
شووون دكتور
شون اقل فعاليه
اركض ويه الجهال و اطبخ و انظف و كلشي
شون اقل فعاليه ؟
ببساطه قارني نفسك بنفسك قبل
شكد كنت تمشين و اذا مشتركه بنادي هسه بطلتي
او كنت تمشين و ترحين للدوام و هسه انت كاعده بالبيت
كعده الصبح و ال ٦ الفجر نسيتي شكد تنطي boost للنظام الغذائي اللي عندك؟
و الحل:
كل تمرين صغير يعتبر إنجاز ويه الخساره اللي كلناها
و مو الا ترحين نادي رياضي
اذا البيت كبير تكدرين تاخذين جوله حوله
او اذا تمشين يوميه نص ساعه
او اذا عندك جهاز رياضي مركون تكدرين عادي تستخدميه بعد ما تسمحلك طبيبتك النسائيه
و شويه شويه تزيدين الرياضه
لا تتعبين جدا
.
.
٤. السبب الرابع لعدم خساره الوزن للمرضعات طبيعيا هي الهرمونات
هرمون الحليب اللي هو البرولاكتين هو اصلا يسببلك خمول و اصلا زياده بسيطه منه تسوي خمول فكيف انت عندك ١٠ اضعاف الشخص العادي
بس بالجهه الأخرى اكو ال adiponectin اللي هو الهرمون اللي يعاكس شغل البرولاكتين
و شنو اسوي بهاي الحاله و اعزز الهرمون هذا؟
الحل :
١. تمارين مثل ما كلنا بنقطه ٣
٢. الخضروات و الفواكه مثل ما كلنا بنقطه ١
٣. زيت السمك اللي ممكن تحصليه بتناول السمك اللي محفوظ بالمي حتى ما تاخذين كالوريات زياده بالدهون
٤. الألياف مهمه جدا جدا و بالأخص الخبز الأسمر او الخبز العادي اللي بيه نخاله
٥. استخدمي طريقه الماعون الصحي اللي بالصوره
نص الماعون اخضر و الباقي ربع بروتين و الربع الآخر خبز او تمن أسمر يعني اكل بيه ألياف
المهمه مو مستحيله
د. سيف سمير البياتي اخصائي طب الاطفال باز کردن / نظر دهید

2021-07-30 13:38:02 طلاب الكليات بصورة عامة ، والسادس بكلوريا بصورة خاصة ، ركزوا على هاي الفترة لانها مهمة بحياتكم ، طبقوا الطريقة الي راح اعلمها الكم والخطوات العلمية الي كتبتها ادناه لان راح تساعدكم بالدراسة وتقوي ذاكرتكم ، ولأن هذا اخر واهم منشور لهذا الاسبوع ، اذا تگدر اكتب ملخص للملاحظات ادناه واطبعها على ورق A4 وعلگها بغرفتك امام عينك حتى تتذكرها يومية وتنطيك حافز ..

_ مو مهم سعيك ودرجاتك _ المهم تركز بهاي الفترة لان ممكن تطلع معدلات فوگ ما تتصور بس لازم تتحفز وتدفع نفسك ضد الكسل وبهاي الفترة تقرأ بشكل مجنون _ ١٤ ساعة باليوم شي مثالي ، كل ٤ او ٦ ساعات مثلآ نام شي نصف ساعة او اكثر ، ليش ؟ لان النوم مهم جدآ لترتيب وخزن المعلومات الجديدة بالذاكرة وتكعد من نومك fresh كانما صفحة جديدة .

_ تكرار تكرار تكرار حاول تعيد قراءة المواضيع بشكل سريع اكثر من مرة حتى لو نظرة سريعة او قراءة سريعة بعدها قراءة بطيئة ، اخذ المفيد فقط واشر عليه واحفظ الي انت مفتهمه . الي تكدر ترتب عليه كلام .

_ اذا تكدر غير بيئة الدراسة _ بالغرفة اذا هوسة. اقرا بالسطح. بالحديقة وهكذا . والهاتف امسح تطبيقات التواصل حتى لا تنسى نفسك عليهن ، اذا تريد تونس روحك اطلع اتمشى غير جو — العب فيديو گيم وهكذا .
.
_ الغذاء ( بشكل يومي تناول نوع مكسرات سواء لوز او جوز او فستق ، ايضآ تناول حفنة من بذور السمسم او الكتان ونوع من التوت سواء زبيب او تكي او فرولة ، ايضآ اشرب عصير البرتقال طبيعي يوميآ ، تناول السمك الدهني والبيض المسلوگ والبقوليات ، القهوة ممكن بس الافضل الشاي الاخضر ك فائدة والافضل بعد هو مشروب الجوكليت مسحوق الشوكلاة الداكنة مع حليب .
للشم. اذا عندك مبخرة زيتية _ تشتم عطر اكليل الجبل يقوي الذاكرة ، حتى لو تاخذه وياك للامتحان تشتمه ،
______________________ .

_ اذا عندك صديق بنفس مرحلتك. اتفق معاه كل واحد يحفظ اسىئلة مهمة ويلقيها على الاخر . من تحفظ السؤال وتعلمه لشخص اخر راح يرسخ ابالك .. اذا ماكو احد هنا احفظ السؤال ، سد الكتاب وراجع الي حافظه بشكل عالي حتى تسمع صوتك لان هل طريقة تساعد المعلومة ترسخ بالذاكرة .

_ حاول تضع موسيقى هادئة. اسمها Lofi وضعت امثلة بالتعليقات . جانت تساعدني اقرا وتمنع عقلي يتشتت ، العقل اثناء الدراسة مثل الطفل يحاول يهرب ويشتت نفسه بمواضيع ، الموسيق تحفز العقل يركز وتصبره على بلواه.

_ بالامتحان لا تترك شي فارغ، رتب الورقة بشكل يسهل عل المصحح يقراها ، يعني اهتم بالتنقيط والترتيب . لا ترتبك ، اخذ مي وباونتي كاكاو وياك بحيث بنص الامتحان تاخذ بريك ، تاكل وتشرب مي وتاخذ طاقة وارجع كمل كتابة . ايضآ استخدام العلكة ممكن يساعدك بالدراسة واثناء الامتحان .

_ اخيرآ مو مهم شكد تاخذ درجة . المهم تقدم افضل ما عندك وبهل حالة انت راح تتحرر من الضغوط , كل الكليات بيها مستقبل ودراسات عليا ومجالات عمل ، المهم تقدم افضل ما عندك. وشنو الي يطلعلك خير من رب العالمين ، انتهى الموضوع، مودتي

، د غزوان فيصل باز کردن / نظر دهید

2021-07-29 22:32:22 حديث الولادة من الراس للقدمين!
شكل الراس يكون متراكب العظام و بيه فتحتين او فتحه صغيره اسمها اليافوخ
الخلفيه تغلق بعمر ٤ اشهر
و الاماميه اللي هي المشهوره تغلق بعمر ٩ إلى ١٨ شهر
الشعر ممكن يولد الطفل بشعر او بدون شعر و من العادي ان يتساقط كله و ما نحس بثخن الشعر الا بعد ٤ سنوات
طبعا هذا مو للكل فممكن يكون الشعر كثيف لبعض الأطفال بعمر سنه
انسداد القناة الدمعيه شائع و شائع جدا و يسبب الكثير من الدموع على الرغم انه الطبيعي انه ماكو دمع بالعين الا بعد عمر ٣ أشهر
كل اللي تحتاجه هي الكثير من المساج للعين
و ممكن تحتاج إلى تسليك للعين من قبل طبيب العيون بعد عمر السنه
الا انه في اغلب الحالات تفتح بالمساج
الخنفره ملازمه للاطفال بسبب ضيق تجويف الأنف و القيء المستمر ( الارتجاع )
و لا يحتاج إلى اكثر من القطرات الملحيه
الفطريات
هي من اكثر المشاكل اللي تواجه الرضع
بس الاغلب ما يعرفون تشخيصها
الفطريات تنتشر على اللسان و الجزء الداخلي للخدود
في حين ان الحليب فقط يصير على اللسان
و العلاج؟
راح اخليكم رابط العلاج بالتعليقات
التسنين
و يبدأ من عمر شهرين إلى ٣ أشهر و يستمر لغايه ٣ سنوات لما تكمل الاسنان و لا تسبب باي شكل من الأشكال اي حراره
كل اللي تحتاجه هي مساج للثه و احيانا باريستول مسكن
و الغي الترخيص لجل الاسنان
كبر حجم الثدي للرضيع
و هذا عادي بسبب الهرمونات اللي تعبر للطفل من أمه و هي حاله طبيعيه و تستمر لغايه ٣ إلى ٦ أشهر
و لا تحتاج لا شي
و اللي يكولك اعصريه لا تقبلين لان ممكن تؤدي الى خراج
انتفاخ البطن هو الملازم لأول ٣ أشهر
و عادي البطن تكون كبيره
شويه نصبر و ما نرضع هوايه و نهتم باكلنا لو رضعتي طبيعي
الله يخليكم لا لكثر الرضاعه و مو كلما يبجي راسا هاك رضاعه و بالتالي حليب اكثر مغص اكثر
السره لا تحتاج شيء فقط اتركيها خارج الحفاظ و عرضيها للهواء
و عادي راح توكع لغايه ٢١ يوم ماكو مشكله
فتق السره
يصير عند ٤٠ بالميه من الاطفال و هو ضعف بجزء البطن و ما يحتاج شيء و لا لصقه و لا فلس و لا حزام و لا اي شي لان اصلا تزيد المغص هذه الأشياء
كثر عدد مرات الخروج طبيعي و ما يعتبر اسهال بالأخص اذا الطفل رضاعته طبيعي
من الطبيعي ان يصير الخروج كل ٣ ايام عند الاطفال و الاهم قوام الخروج
الارتجاع يصير عند اغلب الاطفال و يتوقف وحده بعمر ٦ إلى ٩ أشهر و لو احيانا يستمر للسنتين عادي
الفتق المغبني؟ عمليه راسا
القيله المائيه وحدها تروح و نراجع عليها اذا استمرت بعد ١٨ شهر
الخصيه المعلقه ؟ ننتظرها لغايه ٦ أشهر ما نزلت عمليه
طفح الحفاظه ؟ تهويه و زنك و الكثير من التهويه و الزنك و تغيير براند الحفاظ
القدم المسطحة؟
ماكو شي اسمه قدم مسطحه قبل عمر ٥ سنوات لان التقوس يصير بعدين
طقطقه المفاصل طبيعي لان هذا صوت الاربطه اللي تتزلق على العظام
د. سيف سمير البياتي اخصائي طب الاطفال باز کردن / نظر دهید

2021-07-29 12:36:55 طفل عصبي،
متردد ،
خائف ،
دائم البكاء،
شخصية ضعيفة،
اتكالي ,
ميطور الاستقلال ،
ويبقى في حالة الاحتياجات العالية لما فوق ال5 سنوات وبكل سنه يضاعف حاجته بدل ما تتناقص
ويحول حياة الام الى جحيم لانها فعليا تحس بي مايرضى ولايقتنع بشي

وهو فعلا كذلك لان يحس هو جان مهمل والاهتمام هذا يحسه وقتي وخدعه ، لان شبع من الخدع في السنه الاولى من حيث الاهمال وتاخير تلبية حاجاته

والحل؟
الالتزام التام مع الطفل وعدم اهماله وانما العمل على اعاده بناء الثقة بشكل متوصل , وعندما يشعر الطفل بحقيقه الجهد حتبدي الام تلتمس النتائج، لكن سبق وان ذكرت بالبوست الاول يحتاج الموضوع شهور مو يوم ويومين

لذلك ارجع اذكر بقاعده مهمه في التربية
كلما اهتميتي بالطفل بشكل مبكر، وكلما انطيتي من وقتج بشكل وافر باول سنه
كلما وفر عليج هواي وهواي وهواي

كلما اجلتي الاهتمام وكلما اهملتي وكلما كلتي هو عود يتعود , كلما حيعود الموضوع عليج بتعب مضاعف
وبحالة الطفل ذو الحاجات العالية يكون التعب مضاعف اضعاف مضاعفة
وفي الوقت الي مفروض يبدي الطفل يطور استقلال وحضوره الاجتماعي يكون بعده بطور الطفل الرضيع

وحتكونين في موقف بين اعاده الثقة وبين دفعه للاستقلال

لذلك انطي كل مرحلة حقها احسن مما نرجع كل مره نصلح الخراب والاخطاء

د.اسماء اسماعيل البدري باز کردن / نظر دهید

2021-07-29 12:36:55 #تربية_الاطفال

الطفل_ذو_الاحتياجات_العالية
#high_need_baby

الجزء الثاني

نصائح للتعامل مع شخصية الطفل ذو الاحتياجات العالية:

1. ضرورة وجود شخص اخر يساعد في تلبية حاجات الطفل العالية من التصاق وتواصل ، توزيع حاجات الطفل على شخصين يخفف العبأ بشكل كبير عن الام ، ويلبي حاجة الطفل بشكل فعال ومتواصل

الشخص المعني يجب ان يتواجد منذ اللحضات الاولى لولاده الطفل كي يبدا بالمساهمه في تشكيل رابطه قوية مع الطفل

من الضروري جدا جدا توفر هذا الشخص في حال كانت شخصية الام لاتحب الالتصاق الدائم باطفالها، فهذا الحل يوفر وقت ممتاز للام لتستعيد طاقتها وتكون ايجابية بشكل اكبر

اما اذا كانت الام لاتفضل وجود شخص اخر يعتني بصغيرها ،
نرجوا ان تكون النقاط التالية توفر حلول اخرى:

2. تقسيم الوقت بشكل حقيقي وفعال والتخلص من كل مهدرات الوقت وكل الاعمال والمهام الغير اساسية
يعني ندخل بحالة طوارئ ، واهم بنود هاي الحالة
توفير وقت مشترك للام والطفل
وتوفير طعام صحي للعائله
وراحه ونوم للام
خصوصا بال 40 يوم التي تلي الولادة

مهدرات الوقت يعني:
مو ضروري نلمع زجاج،
ولا ضروري نقوم بواجبات الجيران والاصدقاء
ولا ضروري نحضر كل اعراس المنطقة

نقدم الطفل والام وطعام الاسىرة اولى الاولويات عداها اي شي يمكن يتعوض بعدين في وقت اخر

3.اداء المهام المنزلية والطبخ اثناء استيقاظ الطفل ذو الحاجات العالية هو اقرب للخيال واقرب للمهمه المستحيلة، لذلك من الافضل اداء المهام اما
اثناء نوم الطفل (اذا كدرنا نومه بدون ان يلتصق بالام) او
توكيلها لشخص اخر
او ان يكون الطفل بحضره الشخص الثاني ،

وهذا توكيد للنقطة السابقة بخصوص تقسيم الوقت بشكل فعال وعدم تراكم الاعمال على الام كي لاتشعر بالضغط وبالتالي تبدي بسلب حاجات الطفل تحت مسميات وذائع من ابرزها (علمود لاتطلع عينه وعلمود لايتعود )

4.استخدام نمط السرير المشترك للنوم او السرير الي يكون ملتصق بسرير الام مع مراعاة شروط الامان في السرير المشترك
(اذا تحبون نحجي عنه ببوست منفصل)

5.التواصل الفعال مع الطفل والحديث معه ، وتخصيص وقت خاص يكون فيه الهدف هو قضاء وقت مشترك ويكون غني بالتواصل واللعب والمتعة ، الوقت الخاص ممكن يكون ساعة يوميا او اكثر حسب طبيعة الطفل وتطلعاته ، ويكون هذا الوقت ملئ بالانشطه والفعاليات والي متعرف بالضبط شلون انصحها تتوجه لكروب عظماء المستقبل (الرابط بالتعليقات)

6.الاستجابة الفورية لنداء الطفل وبكاءة وعدم استخدام طرق الاهمال لانها تودي الى نتائج عكسية جدا

7.من الافضل اختيار الرضاعة الطبيعية ، لانها تلبي حاجه المص وحاجه الالتصاق بالام بشكل ممتاز وفعال
وفي حال اختارت الام رضاعة من الزجاجه فيجب وحتما ووجوبا والزاما ارضاع الطفل في حضن الأم ويكون هناك تواصل بصري ،

8.التدرج في الفطام وتحضير الطفل للفطام قبل مده كافية من خلال التحدث معه، وتقليل الرضعات بشكل تدريجي (في حال الرضاعة الطبيعية، وفي حال الرضاعة الصناعية يحول الطفل لكوب الاطفال بشكل مبكر من 4 الى 6 شهور ) وحسب قدره كل طفل بالتدريب

9.بعض الاطفال يرفض فكره الفطام من الرضاعة الطبيعية رفض قاطع وتشعر الام أنها لاتريد ان تفطمه، فلا بأس باستمرار الارضاع ان رغبا في ذلك حتى لو تجاوز الطفل عمر سنتان ، ليست نهاية الكون، يبدا الطفل بعد هذا العمر بتطوير الاستقلال بشكل جيد ويصبح مستعد بشكل افضل حوالي عمر 3 سنوات

اما الرضاعة من الزجاجه اوضحت ان الفطام يبدأ مبكرا كي لايطور الطفل علاقه عاطفية مع الزجاجه وبالتالي يصعب فطامه منها، واستمراره معها طبعا غير صحي ولا يساعد على تحسين وضعه لان الزجاجه لاتبادله مشاعر ولاعواطف بل تبادله تلف في الاسنان وضعف في صحته وفقر في الدم

10. اكيد ملخص كل هاي الخطوات زيدي جرعات الحب والاهتمام وخلي طفلج هو اولى اولوياتج

زين سوينا كل هاي الامور شنو نتوقع نحصل وشوكت؟

الشوكت تكول كل طفل يكون مختلف طبعا هذا شي لا شك فيه لكن اغلب الاطفال ذوي الاحتياجات العالية يكون قمه حاجته في السنه الاولى، فان تم تلبيتها بشكل ممتاز تلاحظ الام تحسن ملحوظ واستقرار وهدوء وتدني الحاجات وتطوير الاستقلال بشكل ممتاز حوالي في السنه الثانيه وتقل حاجته الى حوالي النصف 50%

فاذا استمرت بنفس النمط، سنحصل تقريبا في السنه الثالثة على الطفل مستقر استقرار تمام ويكون شخص لطيف ، معطاء ، ودود ، صاحب مسؤولية ويحب الام ويساعدها بشكل كبير ويقدر جهودها وينطيها مساحتها ويتعاون فعليا وياها ، ويدافع عنها ويقدم لها الكثير وهو فعليا يجازيها على الجهد الي بذلته وعلى الحب الي سقته بي

اما اذا الام سمعت كلام فلانه وعلانه وهملت الطفل وهو باقصى حالات حاجته،
تتوقع التالي: باز کردن / نظر دهید

2021-07-28 19:26:03 ابني ما ياكل
الجمله الأكثر ترددا في كل مكان و زمان و في كل حين
في الوقت الحالي على الاقل
في حين ما كان هذا الموضوع شغل الأمهات الشاغل فيما مضى او في وقت الحصار الاقتصادي مثلا ! !!
اول ما احب أوضح هنا و في كل البوستات
الطفل طفل
و يحتاج ان يعامل كطفل
مو ان يجبر على الاكل
عمر الجبر على الاكل ما راح يجيب نتيجه جيده !
نحتاج نغير بأسلوبنا
اسلوب تقديم طعامنا
فكرتنا عن الأكل و الطعام و كميه الغذاء و ما يحتاج الجسم
حتى الطريقه اللي نقدم بيها الطعام نغيرها
على كل خليني اشرحلكم كم نقطه حول الموضوع و كيفيه زياده شهيه الاطفال
الفطور ضروري و ضروري جدا حتى لو بسيطه
عسى قطعه تفاح او موز
اي وجبه بسيطه بالفطور راح تزيد الشهيه
إعطاء الماء قبل الوجبه يزيد الشهيه
بالأخص قبل نصف ساعه من الوجبه
الاطفال ما يحبون ياكلون مثلنا وجبات ٣ كبيره او وجبتين
يحبون ياكلون كل شويه شويه
كميه الطعام اللي تشبعهم هي بحجم قبضه ايدهم
اللبن صديقي و حبيبي و لازم يكون صديقك
ممكن خلط الموز معاه او التفاح
اللبن يفتح الشهيه
زبده الفستق كفطور تدعم النظام المناعي و الغذائي و تفتح الشهيه
قدمي الاكل اللي يحبوه اول و بعدين قدم الأكل اللي ما يحبه ثانيا
حتى يحبه مره على مره
ما حبه ما نجبره
كافي حليب و إفراط بالحليب
كميه الحليب ما تتجاوز كوبين باليوم لاعمار السنه و فوق
كافي عصير طبيعي او صناعي او مشروبات غازيه
الحلويات تسد الشهيه يوم كامل او يومين على اقل تقدير
اضافه بعض البهارات و المطيبات البسيطه ممكن تزيد الشهيه كونها تضيف طعم جديد مثل الكزبرة و القرفة
خليهم مرتاحين فرحانين بالوجبه مو متضايقين و مضروبين حتى ياكلون
مدا أكدر افتهم هذا المنطلق مال جبر الطفل على الطعام إلى وين راح يودي الطفل
بالنهايه الطفل من يجوع ياكل
هذا التوتر يضيف توتر
و يزعج الطفل
المرض يقلل الشهيه فلا تجبر لطفا لان راح يتقيء عادي
مثله مثل الجو الحار فأكيد شهيتهم تقل خلال الصيف
اللعب يزيد الشهيه
و مع الأسف جو العراق الحار حارم الاطفال من اللعب
لو تكدر تكون غرفه صغيره للعبهم كلش راح تلاحظ فرق بالشهيه
ابني او بنتي ياكلون بالروضة اكثر
اي نعم الاطفال يحبون المشاركه
مو غريب و لا عجيب
لذلك تشوفهم ياكلون اكثر من يرحون لبيت جدهم ! و يشوفون أطفال اكثر
الزنك يفتح الشهيه
و هذا العنصر موجود بالبيض و الفطر و الكازو
فقر الدم حقيقي و يسد الشهيه
لذلك إعطاء اللحم او الحديد ممكن جدا يحسن الشهيه
لطفا اهتمي بأشكال الطعام و أشكال الصحون
نفس الصحن مال ابوه من كان طفل يقدم بيه الطعام
و نفس الملعقة التاريخيه من بلاد الأناضول
شويه نغير بالطقوس و طريقه الطعام و الوان الطعام لان التكرار ممل
و بس
د. سيف سمير البياتي اخصائي طب الاطفال باز کردن / نظر دهید

2021-07-27 15:06:34 باز کردن / نظر دهید

2021-07-27 15:06:29 البيض !
افضل انواع البروتين تلكوها بالبيض
راح اكتب عن البيض بالطريقه اللي تحبوها
من اي عمر أكدر انطي البيض ؟
خلونا نتفق انه بالأكل ما عاد اكو جداول لإدخال الطعام مثل قبل عدا بعض الخطوط العريضه اللي منعتها الجمعيه الامريكيه لطب الأطفال اللي تكول بيها انه السكر و الملح و العصير و العسل و الحليب الكامل الدسم ممنوع تحت عمر السنه
لذلك البيض ممكن باي عمر بس بشرط انه الطفل عبر عمر ال ٤ أشهر
هنا نجي لتفصيله صغيره مني اني دكتور سيف فعن نفسي أفضل بعمر ٦ أشهر و اكثر
اي شي أكدر ابدي بيه البياض اول الصفار ؟
الصفار اولا و بعد ٣ ايام البياض
أكدر انطيه نيء مع الحليب ؟
لازم جايزه من طفلك ! فالبيض النيء قد يحتوي على جرثومه السالمونيلا اللي ممكن تسبب تسمم معوي شديد
ابني ياكل بيضه يوميا هل زينه عليه ؟
او ابني بس يحب البيض و ياكل اكثر من بيضه يوميا هل مو زين عليه ؟
الجواب كلمه وحده
الاعتدال فقط
البيضه الوحده تنطي للطفل خمس ( ١ على ٥ ) احتياجه من البروتين اليوم
و تنطي بحوالي ١ بالميه من الدهون المشبعه اللي المفروض الطفل ما ياخذ أكثر من ١٠ بالميه
لذلك اني اشوف انه بيضه او ٢ يوميا مقبوله و الأفضل بيضه وحده فقط
زين اني ابني ما ياكل بيض ما يحبه او يتحسس منه شاسوي ؟
و لا شي تسوين
فكاتب هذه الأسطر ما يحب البيض
و ابنته البكر ما ماكله البيض بحياتها و عادي عايشين
البيض ممكن تبديله بمصدر اخر للبروتين مثل اللبن و الجبن و اللحم و البقوليات
صدك البيض يدعم النمو؟
اجيبكم بتجربه من الاكوادور
جابوا ١٦٣ طفل أعمارهم بين ٦ إلى ٩ اشهر
قسموهم مجموعتين
مجموعه ما أنطوهم بيض
و مجموعه انطوهم بيضه يوميا لمده ٦ اشهر
بعد ٦ اشهر قاسوا اطوالهم و اوزانهم شافوا ان مجموعه البيض احسن و نمو احسن و وزن احسن و طول احسن
و هذا يعزز دور التغذيه المبكره للبيض بحوالي عمر ال ٦ اشهر
الا اذا ظهرت أعراض التحسس فهنا مالها غير ننتظر و نتامل انه تروح حساسيه البيض بحدود بعد السنتين
شنو اعراض التحسس للبيض؟
اعراض جلديه مثل الشري و الاكزيما
اعراض بالجهاز الهضمي مثل القيء و الاسهال و المغص
اعراض بالجهاز التنفسي مثل السعال و ضيق التنفس
اعراض بجهاز الدوران مثل هبوط الضغط
لعد اني عمتي تكول البيض بعد عمر سنه شتكول دكتور ؟
شوفي هنا نتفق
فبالبدايه كانت هناك جداول لإدخال الطعام للاطفال
الا ان تغير العلم غير الصوره
الجمعيه الامريكيه لطب الأطفال مثلا بأحد توصياتها منعت البيض لبعض الأطفال اللي مستوى التحسس عدهم عالي بسنه 2000 و بعدين عاودت عن رأيها و نصحت بالبيض باعمار ٤ اشهر الى ٦ اشهر لان شافوا انه مستوى التحسس يقل اذا تم ادخال البيض مبكرا !
افكار لطبخ البيض ؟
ممكن مسلوق كاملا
او ممكن مقلي بعد الخفق مع القليل من زيت الزيتون
ممكن خلط البيض بعد سلقه او تقليته مع الافوكادو او اللبن
اسهل طريقه و ما تاخذ منك أكثر من ٥ دقايق هي بتحضير البان كيك مصنوع من البيض و الموز و الشوفان
رولات البيض طريقه صحيه جميله و لطيفه و تصنع من مكونات متعدده مثل البيض و الجبن و الحنطه
الكثير من وصفات البيض موجوده و ممكن تقديمها لطفلك بس تكتبها على يوتيوب
د. سيف سمير البياتي اخصائي طب الاطفال
اترككم مع صور لرولات البيض باز کردن / نظر دهید

2021-07-26 19:56:25 قواعد حديثي الولادة - 40 قاعدة مهمه جدا

١- رضعي طبيعي

٢- بلا ثوم على أساس ينزل ابو صفار

٣- كثري شرب الماء انت الأم مو الطفل الطفل ما يحتاج ماء

٤- بلا مي و شكر

٥- ڤيتامين "د" من أول يوم ٤٠٠ وحده يوميا اذا رضعتي طبيعي

٦- اللقاح بأول يوم و بأول ساعه و اذا تأخرت لا تتجاوزين عمر الاسبوع

٧- اتركي السره مكشفه

٨- ممنوع الحفاظة تغطي السره.

٩- تأكدي انه طفلك اخذ فيتامين K بأول ساعه بعد الولاده

١٠- رضعي طبيعي .. بس.

١١- بلا شكوى و تململ انه الطفل يبجي لان ما يعرف غير شي يسوي

١٢- تحليل الغربله ضروري ضروري ضروري .

١٣- حديث الولادة إنسان و يحتاج النظافة لذلك نظفي ايديه ورجليه بس ما نغسله كامل الا توكع السره

١٤- ممنوع بوس الطفل من الفم.

١٥- الختان بأول شهر احسن شي و كلما أصغر احسن.

١٦- تطعيم التدرن "لقاح الكتف" ..نفضل بأول اسبوع

١٧- زياره طبيب اطفال قريب ضروريه ضروريه ضروريه

١٨- تكحيل الطفل بكل عقلك يكبر العين ؟
هي خلقه رب العالمين مالها علاقه التكحيل

١٩- التهاب العين راجعي عليه خصوصا بأول اسبوع و اذا الإفرازات كثيفه

٢٠- تابعي هذه الصفحه يوميا و اقري البوستات القديمه

٢١- ركزي مع وزن طفلك ساعة الولادة ..احفظيه، و تأكدي منه لان راح يقيس مدى النمو بكل مرحله

٢٢_٦٠٪ من المواليد يصير وياهم ابو صفار و علاجه باغلب الحالات هو الرضاعه بس هذا ما يمنع مراقبته كل فتره

٢٣- ابو صفار يحتاج رضاعة و متابعة أو دخول مستشفى و علاج ضوئي لا يحتاج ثوم و لا بصل .

٢٤- المولود إنسان ..إحساسه بالجو مثلك..بلا المبالغه بالتغطيه و التدفئه و اللف الزايد

٢٥- الشهكه و انسداد الانف و الحازوقه ظواهر طبيعية شويه شويه تقل

٢٦- اشياء تقلقك : الطفل رافض الرضاعة أو ما كادر يرضع ، لونه ازرق بالأخص فمه، نفسه ثكيل و سريع و صعب أكثر من ٦٠ نفس بالدقيقه .

٢٧_اهتمي بنفسك و صحتك حتى تقدرين تهتمين بمولودك..اكلي أكل صحي و متوازن ، بلا أدوية من غير داعي، اشربي ماء هوايه و بلا كهوه و كثره منبهات طفلك ما يعرف يتعامل ويه الكهوه

٢٨- حديث الولادة بينام كتير بس متقطع..نومك راح يتغير هو هذا العادي

٢٩- حديث. الولادة يسمع من و هو جنين فاخر شهور الحمل فاقريله و غنيله قدر الامكان

٣٠- لازم طفلك يصير عنده خروج في أول ٢٤ ساعة ..لو ما صار استشيري الطبيب.

٣١- أنماط الخروج مختلفة عند حديثي الولادة..اكو طفل بعد كل رضعة يصير عنده خروج و اكو طفل يعمل مرة في اليوم. و اكو كل ٣ ايام مره و اللي على الرضاعه الطبيعيه ممكن يمر اسبوع يلا يصير عنده خروج

٣٢- النوم على البطن ممنوع ..إلا بعد الرضاعة للتجشؤ و انت كاعده و طفلك كاعد .

٣٣- غيري الحفاض من ٥ إلى ٦ مرات يوميا و جففي جيدا. و ادهني منطقه الحفاظه باي مرهم يحتوي على الزنك.. بهيجي طريقه راح تحميه من التسلخات.

٣٤- لو بنت اتأكدي من وجود فتحة المهبل..لو ولد اتاكدي من وجود الخصيتين و شوفي فتحة البول للذكر في مكانها و لا لأ..

٣٥- الأب: وينك يا معود ؟! ..مشتاقين و الله

٣٦- صحيح الرضاعه الطبيعيه مانع حمل بس تأكدي من منع الحمل الا اذا كنت راغبه بطفل آخر
خلي فاصل بين طفل و آخر و تأكدي من منع الحمل بعد ولادتك للطفل

٣٧- طفلك يبجي هوايه ..عليك تخمنين شنو السبب و مع الوقت راح تفهميه.
جوعان _رضعيه ،، شبعان و منفوخ _حركي رجله بايسكل و طبطبيه،، عنده مغص دلكيه ،، يريد احد يشيله شيليه ..ماكو شي اسمه عوفيه يبجي حتى يتعود على الشيل..هو إنسان و عايز اهتمام مو اكثر

٣٨- ارتفاع درجه الحراره و السعال في حديثي الولادة مو طبيعية و مو حميدة ..لازم دكتور و تحاليل.

٣٩- حبي طفلك ..ولد أو بنت..أسمر أو ابيض ..سليم أو مريض.

٤٠- مع نهاية الشهر الأول الطفل يبدأ يبتسم لو لاعبتيه ..لو يبجي و تكلمتي معه راح يهدأ ..
اتعاملي معاه على إنه إنسان محتاج غذاء و ماء و مشاعر
د. سيف سمير البياتي
اخصائي طب الأطفال باز کردن / نظر دهید

2021-07-25 14:03:45 شون اسوي وجبه متكامله للاطفال فوك عمر السنه؟
من اساسيات صنع وجبه متكامله للاطفال انه تكون محتويه على العناصر الثلاثه بالغذاء اللي هي النشويات و الدهون و الروتين
شون اسوي وجبه كامله؟
بسهوله قسم الصحن إلى نصفين
نصف بيه خضروات و النصف الاخر نقسم إلى نصفين نصف بيه بروتين و نصف كاربوهيدرات مركبه
كم وجبه باليوم ؟
٣ وجبات و بين الوجبات مرتين او مره باليوم
يعني تقريبا ٤ إلى ٥ وجبات يوميه
يصير الجبس و النستله يعتبر اكله بين الوجبات؟
لا
الوجبه بين الوجبات لازم تكون صحيه مثل الاكل الباقي عن اليوم مثلا لبن او كرزات او فواكه
امثله ع الفطور ؟
-بيضه و قطعه خبز و وياه خضروات او جزر
-قطعه جبن اريش وياها خبز اسمر و شويه زيت زيتون
- بان كيك مصنوع من شوفان حبه كامله مع عسل او زبده الفستق
- طماطه و بيض بزيت الزيتون مع فلفل او بصل و خبز اسمر
-كورن فلكس صحي بالالياف مع الحليب و وياه كميه فواكه
-شوفان و حليب مثلا و مع كميه خضروات
امثله على الغداء ؟
هذا نفسه اكل البيت و استعجلوا عليه من عمر 10 أشهر
اي احنا نشجعكم عليه من وقت انه ياكلون مثلنا بس نقلل الملح و البهار قبل السنه و بعد السنه عادي بس نقلل الملح لصحتكم و صحه طفلك
ماكو داعي تطبخ لطفلك غير شكل بعد عمر ال 10 أشهر
المهم غداكم نفسه و لا تنسى حصه الخضراوات تكون ويه الاكل
و الخضراوات مو الا تكون طازجه فالباميه و الفاصوليا و الباذنجان هي خضروات مطبوخه
العشاء :
-شوربه دجاج مع الخضروات
-كريمه اللحم مع الفطر
-الاخوان المصريين عدهم الكشري و هذا يكون كلشي بيه من رز و عدس و طماطه و بصل
-البركر اللي يحبوه الاطفال و ضيف وياه بطاطا و طماطه مع صمون او شوفان كامل الحبه
-و ممكن ويه عجينه البركر نضيف البيض !
- الكفته هي سحر ممكن تضم بيها كل الخضراوات اللي ما يحبها طفلك
هذه امثله لوجبات كلنا نسويها و هي صحيه قدر الإمكان
ما حب ياكل اليوم عادي نعبر لثاني يوم
و نعيد التجربه
اخر شي
السناك اللي هي طعام بين الوجبات
- لبن مع موز
- محلبي و جوز هند
- موز و تفاح و كرزات
- لبن مع فراوله
- كوب حليب
- لبن مع بذور الشيا او مع السمسم
و مثل ما تشوفون اللبن رائع لأكل بين الوجبات
اللبن غذاء خارق بيه كالسيوم و بيه بروتين و بيه دهون و بيه بكتريا نافعه و يعزز المناعه
اذا ما يحب الحليب او اللبن فنبدله باي مصدر اخر غني بالكالسيوم مثل حليب اللوز او حليب الصويا او السمسم
و ضيف السمسم لأي وجبه باليوم
و راح تضمن انه طفلك راح ياخذ احتياجه من الكالسيوم
#تغذية_الاطفال_بالمختصر
د. سيف سمير البياتي اخصائي طب الاطفال باز کردن / نظر دهید