2021-07-11 00:53:27
گطرة كحل
((گنطاري))
«زنجر قفل روحي..
وحاير بناري
ومن گلبي اعله گلبي..
انگطعت اخباري
ذكرتك..
يا عشر تِيّامْ تفّاحَات
عشره ابْكل حياتي..
وصارن اسراري
چَمْ ليله اعله ليله..
ايِعِزْ عليّ النوم
بس حلمك توالي الليل خطاري
وتْحمَرْ بالعَتَبْ وجنَات خطّاري
يالطخَةْ كِحل بطوارف القُمصّان
من كل ما گضيته وياك تذكاري
يا وردة بنفسج.. والگمر نعسان
وعيونك گمر.. للصبح گمّاري
يا رفّةْ نبض.. هنيال من حبّاك
واندگلك نذر.. للصوت.. للطاري
للبسمة التشّعْ بالروح.. شَمسْ اسطوح
وتتناثر شِعر.. ما توصله اشعاري
لعيونك.. عيونك حيرتي بدنياي
جلّت من حَوَرْهِنْ.. قدرةْ الباري
وتگلي.. اتغيرت.. شُو مو رسومك ذيچ
تحچيها ابعفه.. ومن ضميك اغياري
تمّنيتَك تحبني.. وتنچوي بناري
وگبالي اگعدَكْ.. عَاشِگ ومَعشوُگْ
واحِچيلَك بحالي اشصَار وشجَارِي
واكاسرلَك حناني.. ابطعَم خَمرةْ ديِرّ
وتسكرْ الزمن وتلاعب اوتاري
وأغنيلك.. غِنَه.. بهداي.. بهداي
إعله هضمتنه... إعله خيبتنه
وسُفنّه الراحت.. اوَيه الروج حدّاري
وازعْلك لّذتَكْ.. بالعِشگ من تغتَاظْ
واتگطر اشفافك.. عسل گنطَارِي
وارّضْيِكْ ابوِلَكْ.. يابعد هاي.. وهاي
واتعذّر سنَه.. وما تقبل اعذارِي
واحبْك من صِدِگْ.. من حب اهلنه الراح..
مو حب هالوكت.. والعِشِگْ طَيّارِي»
ــــــــــــــــــــــــــ
عريان السيد خلف،
الأعمال الشعرية الكاملة (ط؛١ بغداد: دار سطور، ٢٠٢١)، ص٢٩٦،٢٩٧،٢٩٨.
348 views21:53