2021-11-13 12:25:55
(( گعديـّـــه ))
چذّبوا چذبـه .. وصدّگـــوا بيها
لحيـدر الرتبه .. وركضوا إعليها
والصَدّگ الچِذبه .. إبّاله الأمر لعبه
ما تعب بيها ومن تالي جاها
ــــــــــــــــــــ
چانت اثگيله الخلافه وچان بس حيدر وزنها
الناس چانت طرشه عالحگ كل أصابعها بذنها
والكحيله تريد واحد لو صعد يندل رسنها
وادم عيوب إمترّسه
ناس اتعرف ومغلسه
والخلل واحد أسسه ..وطابت إعليه عياب چنها
راح أمثّلهـا .. إبواحد إمفلِّس
إو وادم إتگلّه ..صيرنّه ريّس
وسوّه الذّي إيعجبه.. إباله الأمر لعبه
ما تعب بيها ومن تالي جاها
ــــــــــــــــــــ
وصعد بيها الماعرفها وعالحفر ضل يمشي جدمه
وگام يحرگ درّت الله بكيفه ويقدّس له فحمه
هم شفت واحد مهندس جاهل إيقوده ويعلْمه
تريد اليعرف المصلحه
مو بالمحابس والـ لِحَه
مو ما يعرف الفاتحه .. وما يفسّر منها چلمه
المغتسل فارغ .. هوسه السقيفه
اليوصل الأول .. صـار الخليفـه
المتونس إبحزبه.. إباله الأمر لعبه
ما تعب بيها ومن تالي جاها
ــــــــــــــــــــ
عافوا اكتاب الله كله وعلى الحاجب عين صعدَت
خذوا بس چلمة الشورى إتگول بس هالچلمه نزلَت
إموصّى چان بجيش اسامه وللسقيفه اجدامه ركضَت
الگال الله عنهم شرذمه
الكرسي الحكم متحزّمه
فرهدوا كلشي لفاطمه .. تحالفوا والسبحه كملت
الوادم إلتمّـت .. محّـد يهمّـه
والحقد فايض .. والغِيره أزمه
وحطباته عالعِتْبَه .. إباله الأمر لعبه
ما تعب بيها ومن تالي جاها
ــــــــــــــــــــ
الما عرف حجمه عليمن حاطيله ألقاب كومه
واللّي يصعد على أسياده بفلس واحد مانسومه
كلها تنفخ ما لگاله اخمسطعـش واحد يلومه
شايف أميـر بهالشـكِل ؟
يصفن شهر من ينسئِل
والحطّه ربـك ينعـزل .. وقُنفُذ إيشكّل حكومه
غَمها من دنيا .. النازِل تِرُفْعَه
اليامر وينهـي .. خالد وربعـه
و الـ مو إله إيسِلْبه .. إباله الأمر لعبه
ما تعب بيها ومن تالي جاها
ــــــــــــــــــــ
وعلي يگلهم هالخلافه امفصله تفصال إعله گدّي
أگدر أگلبها بدقيقه يضيع ذكره اليدنه حدّي
بس بختكم بالوصيه وچي محمد گلي عَدِّي
وهالمنصب يلوگ إلـ هَلَه
الـ يعرف مواسـم سنبله
مو يِحِش ورده إبمِنجَلَه .. وحقده إليجيب ويُوَدّي
ويحرگ الورده .. هيه وإبنها
والصِعَد بيها .. تيّـه رسنها
ونكبه بأثر نكبه .. إباله الأمر لعبه
ما تعب بيها ومن تالي جاها
ــــــــــــــــــــ
مهدي التقي
583 viewsمهدي التقي, edited 09:25
م
